O le ā Nei La‘u Mea a Fai?
O se Tusi Mai i Benin
O le ā Nei Laʻu Mea a Fai?
O SE taeao fou i Aferika i Sisifo ma o loo feagai tagata ma fuafuaga masani. Ua sasala le manogi o meaʻai ma araisa. O loo savavali ane fafine ma avega tetele i luga o o latou ulu, ma ua faalogoina le taliē o tagata a o fai a latou fefaatauaʻiga. Ua susulu malosi mai foʻi le lā.
Ina ua vaai mai ni tamaiti iā i matou o papalagi (Yovo), ona amata loa lea ona pepese ma sisiva. Na amata le pese e faapea “Yovo, Yovo, bon soir,” ae faaiʻu i le fesili mai “Pe e iai se foaʻi mo le faafiafiaga?” Ae e iai se tamaitiiti e leʻi pese, ma a o faaauau laʻu savaliga, sa mulimuli mai ma fai mai ni tāga i ona lima e pei o loo faagūgū mai. A o ou iai i Amerika, sa ou aʻoaʻoina le auala e sipela ai upu i le Gagana Faagūgū a Amerika, ae o Benin e tautatala i le gagana Falani.
Sa ou taumafai e sipela atu loʻu igoa i le gagana faagūgū. Na matuā fiafia le tamaitiiti ma tago mai toso atu loʻu lima ma taʻitaʻi aʻu i lo latou fale piliki e lua potu moe. Na faapotopoto uma mai le aiga ma fai mai tāga faagūgū. Ua ou lē iloa le mea o le a fai. Na ou toe sipela atu loʻu igoa i le gagana faagūgū ma tusi atu se feʻau e faapea, o aʻu o se misionare e aʻoaʻoina atu le Tusi Paia, ma o le a ou toe foʻi mai e asi i latou. Na faaalia mai foʻi le fiafia o nisi o o latou tuaoi. Sa ou faapea ane, ʻO le ā nei laʻu mea a fai?’
Sa ou toe mafaufau, ʻE tatau ona iai se tasi e fesoasoani i nei tagata e iloa le folafolaga a le Atua: “O le a faalogo foʻi taliga o ē e tutuli.” (Isaia 35:5) Sa fai ni aʻu saʻiliʻiliga ma iloa ai, i se tusigāigoa talu ai nei, e 12,000 tagata i Benin e logonoa pe e lē lelei le faalogo. Ae sa faafiafiaina aʻu i le iloa e faaaogā i aʻoga i Benin le Gagana Faagūgū a Amerika. Peitaʻi, e leai foʻi se Molimau a Ieova i Benin e iloa le Gagana Faagūgū a Amerika. Na ou faapea atu i se tasi o Molimau ma le faanoanoa: “Maʻimau pe ana iai se tasi e iloa le Gagana Faagūgū a Amerika e sau e fesoasoani mai.” Ae na tali mai o ia: “Ae ā oe?” O lea, sa ou talosagaina ai loa ni tusi e aʻoaʻo ai le faagūgū ma ni DVD i le Gagana Faagūgū a Amerika, e lomia e Molimau a Ieova. Na taliina foʻi aʻu tatalo, ina ua siitia mai i Benin se tasi o Molimau e iloa le Gagana Faagūgū a Amerika.
E toʻatele tagata na iloa ua ou aʻoaʻoina le gagana faagūgū, ma na faapea mai ou te alu e asiasi iā Brice, o se tagata e valiina faailoilo. E faia aʻe lona fale faigaluega i lau pama ua suʻiina faatasi, e manaia le savili, ma e felanulanuaʻi totonu, ona atonu e pisipisi i ai le vali a o faamamā ana pulumu. Ina ua ma feiloaʻi, sa ia aumai ni nofoa e ma te nonofo ai, ma sa ou tago atu loa faaali i ai se DVD. Sa ia faalatalata atu i le DVD e matamata ma faapea mai i le faagūgū: “O lea ou te malamalama! O lea ou te malamalama!” Na fālō mai tamaiti o le tuaoi i le fia matamata, ma na faapea mai se tasi o i latou: “Aiseā ua la matamata ai i se ata e leai se leo?”
Sa faateteleina le toʻatele o i latou e fia matamata i le DVD, i taimi uma ou te alu ai e asi Brice, ma e leʻi umi ae auai o ia i sauniga faa-Kerisiano. Na faaleleia atili laʻu faagūgū a o ou taumafai e faaliliu lauga o sauniga i le faagūgū. A o faatuputupulaʻia lenei vaega faagūgū, sa oo ina ō mai tagata e suʻe aʻu. O se faataʻitaʻiga, a o alu laʻu taavale i se auala omoomo ma ou taumafai e ʻalo ese mai i ʻoti ma puaa, na faafuaseʻi ona ou faalogoina se paʻō leotele mai i tua. Sa ou faapea ua toe leaga laʻu taavale, ae e leai, o se tamāloa logonoa o loo tamoʻe mai, ma taumafai e pō mai laʻu taavale ina ia ou iloa atu o ia.
Na faatoʻateleina tagata na faaaogāina le Gagana Faagūgū a Amerika i isi aai. I le uluaʻi taimi na iai se vaega faagūgū i la matou tauaofiaga, sa ou maua ai le faaeaga e faaliliu nisi o lauga o le polokalame. A o ou i le pulelaa e faatali mo le failauga e amata lana lauga, sa ou toe mafaufau i le amataga ina ua faatoʻā amata laʻu auaunaga faamisionare. Sa masani ona ou mafaufau, ʻO ā nisi o mea e mafai ona ou faia o se misionare i Aferika?’ A o ou tilotilo atu i le aofia, sa ou iloa ai, o le tali o le avea lea o aʻu o se misionare e fesoasoani i tagata logonoa. Ou te lē o toe fesili e faapea, ʻO le ā nei laʻu mea a fai?’
