Le Matafaioi a Maria i Fuafuaga a le Atua

I LE taimi o le faiva a Iesu, na alaga leotele mai ai se fafine ai le motu o tagata ma faapea mai: “E fiafia le manava na e fanau mai ai ma susu na e susu ai!” Pe ana faapea sa manaʻo Iesu e faamamaluina lona tinā, o se avanoa lelei tele la lea mo ia e fautuaina ai le faia faapea. Peitaʻi, na ia fetalai atu: “E leai, E fiafia i latou e faalogo i le afioga a le Atua ma tausi i ai!”—Luka 11:27, 28.

E leʻi avatua e Iesu se faaaloaloga faapitoa i lona tinā; ma e na te leʻi faatonuina foʻi ona soo e faia faapea. E faapefea la ona ōgatasi lenei manatu ma le faaeaea lea e avatu e le toʻatele o tagata talitonu iā Maria? Seʻi o tatou iloiloina nisi o mea o loo taʻu mai e le Tusi Paia e faatatau i aʻoaʻoga taatele e uiga i le tinā o Iesu.

“Ua Alofateleina,” “Amuia Oe i Fafine”

Na taʻu mai e le agelu o Kaperielu iā Maria lana matafaioi o le a iai i fuafuaga a le Atua. Na ia faafeiloaʻia Maria i le faapea atu: “Malo lava iā te oe o lē ua alofateleina, ua faatasi Ieova ma oe.” (Luka 1:28) O le isi auala e faaliliu ai lenā faafeiloaʻiga o le faapea atu: “Malo, ua matuā alofagia lava oe, ua faatasi le Alii ma oe.” I se taimi mulimuli ane, na faafeiloaʻia ai e Elisapeta Maria i lona faapea atu: “Amuia oe i fafine, amuia foʻi lē o le a fanau mai iā te oe!” (Luka 1:42) Po o faaalia mai ai i nei faaupuga e tatau ona avatu se mamalu faapitoa iā Maria?

O le mea moni, e leai. E ui lava o nei upu o loo faaaofia i le tatalo o loo faia e tagata Katoliko iā Maria, ae e lē o taʻuina mai e le Tusi Paia se māfuaaga e ao ai ona tatalo atu  iā te ia. Sa faailoa mai e Kaperielu ma Elisapeta le faaeaga sili ona tāua o Maria o le avea ma se tasi e fanauina le Mesia, peitaʻi e lē o taʻua i le Tusi Paia se manatu faapea e tatau ona tatalo atu iā Maria. Nai lo lea, ina ua talosaga atu soo o Iesu ina ia aʻoaʻoina i latou i le auala e tatalo ai, sa faamamafa e Iesu le tatalo tuusaʻo atu i lona Tamā. Auā i le tatalo faaaʻoaʻo a Iesu lea ua tele ina iloa e tagata, o loo amataina i upu nei: “Lo matou Tamā e o i le lagi.”—Mataio 6:9.

O se Tasi o Pule

O le isi aʻoaʻoga taatele e faatatau iā Maria, e faapea ua avea nei o ia ma “Tupu Tamaʻitaʻi o le Lagi.” E leai se taʻu faapena o avatu e le Tusi Paia iā Maria. Peitaʻi, o loo faaalia mai i le Tusi Paia ua iai o ia i se tulaga faapitoa i faatulagaga faalelagi a le Atua. O le ā lenā tulaga?

Na faailoa mai e Iesu e iai nisi o ona soo faamaoni o le a pule faatasi ma ia i lona Malo. (Luka 22:28-30) O le a tuuina atu e Iesu le pule iā i latou na, ina ia auauna ai o ni “ositaulaga i lo tatou Atua, ua latou pule mai foʻi o ni tupu i le lalolagi.” (Faaaliga 5:10) E tusa ai i faamatalaga manino a le Tusi Paia, e faigofie ona tatou manatu e aofia ai Maria iā i latou ua mauaina lenei faaeaga mamalu. Aiseā ua tatou manatu ai faapea?

Atonu e te manatua ina ua mavae le maliu o Iesu, sa ‘⁠finafinau Maria i le tatalo’ faatasi ma soo o Iesu ma ona uso. E 120 tagata na faapotopoto mo lenei fuafuaga, e aofia ai “nisi fafine.” (Galuega 1:12-15) O loo taʻua i le Tusi Paia e faapea, “A o faagasolo le aso o le tausamiga o le Penetekoso, ua faatasitasi i latou uma i le nofoaga e tasi” ina ua liligi ifo le agaga paia o le Atua iā i latou, ma tuuina atu iā i latou le tomai e tautatala ai i gagana eseese.—Galuega 2:1-4.

O le iai faatasi o Maria ma i latou na faamanuiaina i lenā auala, ua faaalia ai le filifilia o ia ma isi fafine o ē na maua le agaga paia ina ia avea ma vaega o le Malo faalelagi a Iesu. E mautinoa lava la le talafeagai ona tatou faapea atu, ua faatasi nei Maria ma Iesu i le mamalu faalelagi. (Roma 8:14-17) Seʻi manatu i nisi o faaeaga o le a maua e Maria ma isi o le a pule faatasi ma Iesu, i le faataunuuina o fuafuaga a le Atua.

Faasoasoaina Mai Faamanuiaga Ofoofogia

O loo taʻua i le tusi o Faaaliga o le a faatutūina tagata taʻitoʻatasi o le 144,000 i le lagi e auauna faatasi ma Iesu o ni ositaulaga, faamasino, ma ni tupu. (Faaaliga 14:1, 4; 20:4, 6) I le avea ai ma ositaulaga, o le a latou faia se sao i le faasoasoaina mai o aogā o le taulaga a Iesu i tagata usiusitaʻi uma, i le siitia lea o o latou tulaga faaleagaga, tau amio, ma le faaletino ia lelei atoatoa. (Faaaliga 21:1-4) Maʻeu se faaeaga mo auauna faamaoni uma a Ieova o le a molimauina lenā taimi matagofie! *

Sa faia, ma o loo faia pea e Maria se vaega i le faataunuuina o fuafuaga a Ieova. Pe a fua atu i lona lotomaulalo, faatuatua, usiusitai, ma le faamaoni o se tinā, aemaise lava lona tumau i le tele o faigatā, ua talafeagai ai ona faaaʻoaʻo iā te ia. E tusa ai ma lana matafaioi i le fanauina o le Mesia ma le faasoasoaina mai o faamanuiaga tumau i tagata, ua talafeagai ai ona faaaloalogia o ia.

Peitaʻi, o le lesona sili ona tāua ua tatou aʻoaʻoina mai iā Maria, o le tapuaʻi atu lea tau lava o Ieova, faatasi ai ma isi auauna faamaoni a le Atua. O loo alalaga faatasi Maria ma isi o le a pule faatasi ma Keriso i le lagi ma folafola atu e faapea: “Ia iā te ia o Lē e afio i le nofoālii [Ieova le Atua] ma le Tamaʻi Mamoe [Iesu Keriso], le manuia, le viiga, le mamalu, ma le malosi e faavavau, faavavau lava.”—Faaaliga 5:13; 19:10.

[Faaopoopoga i lalo]

[Faamatalaga faaopoopo i le itulau 10]

O le lotomaulalo, le faatuatua, ma le usiusitai o Maria, ua talafeagai ai ona faaaʻoaʻo iā te ia