I LE pe ā ma le 10 tausaga ua mavae, na paeonia ai Gregorio ma Marilou o se ulugalii ua taʻi 30 tausaga i Manila. E ui sa feagai ma luʻi ona sa la faigaluega uma, peitaʻi na la taulau manuia. Na siitia le tulaga o Marilou i se tulaga maualuga i le faletupe na faigaluega ai. Na ia taʻua: “O le lelei o a ma galuega, na ma maua ai se olaga sologa lelei.” O le tele o a la tupe, na la totogia ai se kamupani e fausia se fale na la moomoo i ai, i se vaipanoa e sili ona lelei lea e pe ā ma le 12 maila (19 km) i le itu i sasaʻe o Manila. Na la fuafua e totogi taʻi masina lenā kamupani i totonu o le sefulu tausaga.

Na faapea mai Marilou: “Na faaitiitia loʻu maelega i mea faaleagaga, ona na alu le tele o loʻu taimi ma le malosi i laʻu galuega fou. Na ou manatu ai ua ou faoa mea a Ieova, ona ua lē mafai ona ou toe avatu iā Ieova le taimi i lana auaunaga.” O le faanoanoa i lenā tulaga, na talatalanoa ai Gregorio ma Marilou i le tulaga ua oo iai o la olaga. Na faapea mai Gregorio: “Na ma mananaʻo e fai se suiga, peitaʻi e ma te leʻi iloa tonu le gaoioiga e fai. Na ma talanoa i le auala e faaaogā atoatoa ai o ma olaga i le auaunaga iā Ieova, aemaise ona e  leai se ma fanau. Na ma tatalo iā Ieova mo le taʻitaʻiga.”

Na la faalogologo i nisi o lauga e faatatau i le auauna i vaipanoa o loo telē ai le manaʻoga. Na la manatu o nei lauga o le tali lea i a la tatalo. Na la tatalo ina ia faamalosia atili lo la faatuatua ma maua le lototele e faia ai filifiliga saʻo. Sa matuā faigatā ona ua māeʻa ona totogi le tupe mo le tolu tausaga e fausia ai le la fale. O le ā le filifiliga o le a la faia? Na faapea mai Marilou: “Pe a faamuta le galuega, o lona uiga ua maʻimau le tupe na totogi. O lea na tatau ai ona ma filifili pe faamuamua le finagalo o Ieova po o ma faanaunauga.” Na la manatua upu a Paulo e faatatau i le ʻlafoaʻia o mea uma.’ (Fili. 3:8) O lea, na la filifili ai e taofi le fausiaina o le fale, faamavae mai i a la galuega, faatau ese nisi meatotino, ma siitia atu i se nuu maotua i le motu o Palawan, lea e pe ā ma le 300 maila (480 km) i le itu i saute o Manila.

A o leʻi siitia ese Gregorio ma Marilou, na manaʻomia ona la nofosauni ina ia ola i se olaga faigofie. Peitaʻi, e la te leʻi iloa le tulaga moni o le a oo i ai pe a taunuu i lea nofoaga. Na faapea mai Marilou, na faateʻia o ia ona e leai se eletise, ma e leʻi faigofie le olaga i inā. Nai lo o le kukaina o meaʻai i se ogaumu, ae na manaʻomia ona tātā fafie ma kuka meaʻai i le taʻinafi. Na ia misia mea uma o loo maua i le aai tele. Peitaʻi, na la toe tomānatu i le māfuaaga na siitia ai, ma e leʻi umi ae la masani loa i lo la olaga fou. Na taʻua e Marilou: “Na ou fiafia i le matagofie o foafoaga e aofia ai le feʻilafi mai o fetu i le pō. Ae sili atu i lenā, o le vaaia o laufofoga fiafia o tagata pe a talaʻi atu i ai. O le auauna i lenei vaipanoa, ua ma ʻiloa ai ona feagai’ ma nei faigatā, ma iloa le auala e maua ai le lotomalie.”​—Fili. 4:12.

Na faapea mai Gregorio: “E na o le toʻafā Molimau na iai i lenei vaipanoa i le taimi na ma taunuu ai. Na latou matuā fiafia i loʻu faia o lauga lautele i vaiaso taʻitasi, ma tā pese o le Malo i laʻu kitara.” E leʻi atoa se tausaga ae la vaaia le faatuputupulaʻia o lenei vaega toʻaitiiti, ma avea ma faapotopotoga olaola e iai tagata talaʻi e 24. Na taʻua e Gregorio: “Na matuā pāʻia o ma loto ona o le alofa na faaalia e lenei faapotopotoga iā i maʻua.” Pe a toe mafaufau i tausaga e ono na auauna ai i lenā vaipanoa maotua, na la faapea mai: “E sili atu ona maua le fiafia i le vaai atu i le toʻatele ua auai i le faapotopotoga. E ma te manatu ua faaaogā tatau o ma olaga.”

E toetoe 3,000 uso ma tuafāfine i Filipaina e siitia atu i isi vaipanoa o loo telē ai le manaʻoga, ma o le toʻa 500 o i latou o tuafāfine nofofua. Seʻi manatu i le faaaʻoaʻoga a Karen.

Ua 20 ma ona tupu tausaga o Karen ma na ola aʻe i Baggao i Cagayan. Sa masani ona mafaufau o ia e faalautele lana faiva a o talavou. Na ia faapea mai: “O le iloa ua puupuu le taimi ae e toʻatele ituaiga o tagata e manaʻomia ona faalogo i le feʻau o le Malo, na ou manaʻo ai e auauna i se vaipanoa o loo telē ai le manaʻoga mo tagata talaʻi.” E ui na iai nisi o lona aiga na uunaʻia o ia e tuliloa aʻoga maualuga nai lo o le siitia atu i se vaipanoa maotua e talaʻi ai, peitaʻi na tatalo Karen iā Ieova mo le taʻitaʻiga. Na ia talanoa atu foʻi i ē na auauna i vaipanoa maotua. Ina ua 18 ona tausaga, na ia siitia atu loa i se vaipanoa maotua lea e pe ā ma le 40 maila (64 km) le mamao mai i lona aiga.

Na fesoasoani Karen i se faapotopotoga toʻalaiti e tū i se vaega maugā i le Talafatai o le Vasa Pasefika. Na ia taʻua e faapea: “Na ma savavali mo aso e tolu mai i Baggao seʻia oo atu i le faapotopotoga fou. Na ma uia mauga ma āsā vaitafe mo le silia i le 30 taimi.” E savali Karen mo le ono itula i nisi o suʻesuʻega faale-Tusi Paia. E masani ona ia moe i le fale o sana suʻesuʻega, ona toe savali ai lea i le fale mo le isi ono itula i le aso e sosoo ai. Pe na tauia na taumafaiga? Na tala ʻata mai Karen e faapea: “E ui e iai taimi e lagona ai le tigā o oʻu vae, ae ua mafai ona ou faia ni suʻesuʻega faale-Tusi Paia e 18. Ua ou ʻtofo ma iloa ai e lelei Ieova.’”​—Sala. 34:8.

O Sukhi, o se tuafafine nofofua ua silia ma le 40 tausaga. O ia o se Initia sa nofo i le Iunaite Setete, ae ua siitia atu i Filipaina. O le ā na uunaʻia o ia e faia lenā gaoioiga? I le 2011, na ia auai ai i se fonotaga matagaluega, lea na faatalanoa ai se ulugalii. Na taʻua e le ulugalii le tele o a la meafaitino na faatau ese, ae siitia atu i Mekisikō ina ia fesoasoani i le galuega talaʻi. Na faapea mai Sukhi: “O lenā faatalanoaga, na amata ai ona ou mafaufau i sini ou te leʻi mafaufau muamua i ai.” Ina ua ia iloa le telē o le manaʻoga ina ia talaʻi ai i tagata Punjabi i Filipaina, na ia filifili ai loa e malaga atu e fesoasoani iā i latou. Pe na ia feagai ma ni faigatā?

Na faapea mai Sukhi: “Sa matuā faigatā iā te aʻu po o ā meafaitino e faatau ese ma meafaitino e lē faatauina. E lē gata i lea, ua 13 tausaga talu ona ou ola i se olaga sologa lelei ma nofo i loʻu lava fale, a o lea ua ou nofo i loʻu aiga mo sina taimi. Sa faigatā, peitaʻi o se auala lelei lea na sauniunia  ai aʻu e ola i se olaga faigofie.” O ā luʻi na ia fesagaʻia ina ua siitia atu i Filipaina? “O luʻi e sili ona faigatā o loʻu matafefe i iniseti ma lagona le toe fia alu i loʻu atunuu. Na ou iloa e tatau ona ou matuā faalagolago atu iā Ieova.” Pe na tauia ana taumafaiga? Na ʻata Sukhi ma faapea mai: “Ua fetalai mai Ieova iā i tatou, ʻIa tofotofo mai po ou te lē liligi ifo i o outou luga faamanuiaga.’ Na ou faamaonia le moni o na upu, pe a fesili mai se tagata iā te aʻu, ʻO afea e te toe sau ai? O loo tele pea aʻu fesili.’ Ou te lagona le fiafia ma le faamalieina, ona ua mafai ona ou fesoasoani i tagata o loo matelāina faaleagaga. O le mea e sili ona faigatā, o le faia o le filifiliga pe ou te siitia mai. Ae ina ua ou faia le filifiliga, na ou iloa ai le auala na fesoasoani mai ai Ieova iā te aʻu.”—Mala. 3:10.

O Sime, o se uso ua faaipoipo ma ua toeitiiti atoa le 40 o ona tausaga. Na ia tuua Filipaina ae malaga atu e faigaluega i se galuega e telē le totogi i se atunuu i saute i sisifo o Asia. Na ia maua ai i inā faalaeiauga mai i le ovasia matagaluega ma se lauga na faia e se sui o le Vaega Pule. Na uunaʻia ai o ia e faamuamua Ieova i lona olaga. Sa ia popole tele pe a faamavae mai i lana galuega. Peitaʻi, na ia tuua lana galuega ae toe foʻi i Filipaina. Ua auauna nei Sime ma lana avā o Haidee i Davao del Sur, i se oganuu telē o loo telē ai le manaʻoga i le itu i saute o Filipaina. Na faapea mai Sime: “Ou te lotofaafetai ona ua mafai ona foʻia loʻu popole i le tuua o laʻu galuega ae faamuamua Ieova. E leai se isi mea e sili atu nai lo o le faia o le mea e gata ai le mafai e auauna ai iā Ieova.”

O Ramilo ma Juliet, o se ulugalii paeonia ua taʻi 30 ma ona tupu o la tausaga. Na la iloa o loo manaʻomia se fesoasoani i se faapotopotoga e na o le 20 maila (30 km) le mamao mai i lo la fale, ma na la tauofo e fesoasoani atu. E tele taimi i vaiaso taʻitasi e la te faimalaga ai i le pasika, ina ia auai i sauniga ma faia se sao i le talaʻiga e tusa po o le ā le tulaga o le tau. E ui e faimalaga i auala gaoā ma alalaupapa e faia i maea, ae e la te maua le fiafia ona ua faalautele atu le la faiva. Na faapea mai Ramilo: “E ma te faia ma laʻu avā suʻesuʻega faale-Tusi Paia e 11. O le auauna i vaipanoa o loo telē ai le manaʻoga sa manaʻomia ai ni faataulaga, ae ua matuā faamalieina ai i maʻua.”​—1 Kori. 15:58.

Pe afai e te fia silafia atili e faatatau i le auauna i vaipanoa i lou lava atunuu, po o isi atunuu o loo telē ai le manaʻoga, ia talanoa atu i le ovasia o le matagaluega, ma faitau le mataupu “Pe e Mafai Ona E ʻAlu Atu i Maketonia’?” i La Tatou Faiva o le Malo o Aokuso 2011.