I LE taeao o le Aso Lulu, Ianuari 24, 2018, na faafiafiaina ai aiga Peteli i le Iunaite Setete ma Kanata ina ua faia se faasilasilaga faapitoa e faapea: Ua faaopoopo le uso o Kenneth Cook, Jr., o se sui fou o le Vaega Pule o Molimau a Ieova.

Sa fanau ma ola aʻe le uso o Cook i Pennsylvania i le Iunaite Setete o Amerika. A o ia leʻi faauu mai i le kolisi, na ia aʻoaʻoina le upu moni mai i se tamaitiiti o lana vasega. O lea na papatiso ai le uso o Cook iā Iuni 7, 1980. Na amata lana auaunaga faataimi atoa o se paeonia sauatoa iā Setema 1, 1982. Ina ua mavae le lua tausaga talu ona ia paeonia, ae valaaulia loa o ia i le Peteli. Na amata lana auaunaga i le Peteli i Wallkill i Niu Ioka, iā Oketopa 12, 1984.

I le isi 25 tausaga na sosoo ai, na galue ai le uso o Cook i isi matagaluega e pei o le fale lomitusi ma le Ofisa o le Peteli (Bethel Office). Na faaipoipo o ia i lana avā o Jamie i le 1996, ma aufaatasi atu ai loa lana avā ma la galulue i le Peteli i Wallkill. Iā Tesema 2009, na auina atu ai i laʻua i le Nofoaga mo Aʻoaʻoga a le Olomatamata i Patterson i Niu Ioka, lea na tofia ai le uso o Cook e galue i le Matagaluega o Tusitusiga. E leʻi leva ona toe foʻi le uso ma le tuafafine o Cook i le Peteli i Wallkill, ae auina atu loa i laʻua i Brooklyn i Niu Ioka iā Aperila 2016. I le lima masina mulimuli ane, na la siitia atu ai i le ofisa ulu i Warwick i Niu Ioka. Iā Ianuari 2017, na tofia ai le uso o Cook e galue o se fesoasoani i le Komiti o Tusitusiga a le Vaega Pule.