E Moomoo Tagata Uma i se Lumanaʻi Saogalemu
O le ā le ituaiga lumanaʻi o loo e moomoo i ai? E pei o le toʻatele, e mautinoa e te manaʻo i se lumanaʻi saogalemu mo oe ma lou aiga, o se lumanaʻi fiafia, filemu, taulau manuia, ma maua ai le soifua mālōlōina lelei.
Peitaʻi, ua lē mautonu le toʻatele po o le a latou maua le lumanaʻi o loo latou moomoo i ai. O mea e tutupu faafuaseʻi e pei o le KOVITI-19 ua iai aafiaga i olaga o tagata, ma ua māfua ai le mativa ma maliliu ai le toʻatele. O le iʻuga, ua latou manatu ai ua matuā lē saogalemu lo latou lumanaʻi.
Talu ai ona o na tulaga lē mautonu, ua naunau ai tagata e saʻili i se mea e taʻitaʻiina ai i latou i se lumanaʻi lelei. O nisi ua maufaatuatuaina malosiaga e lē vaaia e pei o iʻuga tuupōina po o le laki. O le toʻatele ua saʻili i tulaga tauaʻoaʻoga ma tamaoaiga, ona e manatu o nei mea o le a latou maua ai mea o loo mananaʻo ai. A o nisi, e manatu o le avea ma tagata lelei, e pau lenā o le mea e manaʻomia ina ia maua ai se olaga lelei.
Po o le a taʻitaʻiina atu oe e se tasi o na mea i le lumanaʻi o loo e moomoo i ai? Ina ia e maua le tali, e manaʻomia ona e iloiloina fesili nei:
O le ā e faalagolago i ai lou lumanaʻi?
Pe e mautinoa e maua se olaga lelei ona o aʻoga ma tupe?
Po o le avea ma tagata lelei, e mautinoa e te maua ai se lumanaʻi saogalemu?
O fea e te maua ai taʻiala maufaatuatuaina mo se lumanaʻi saogalemu?
O le a fesoasoani lenei lomiga o Le Olomatamata iā te oe e taliina na fesili.