Na fetalai le Atua iā Atamu, “o le aso e te ʻai ai [i le laau] e te oti ai lava.”(Kenese 2:17) E leai se aogā o lenei fetalaiga a le Atua, pe ana faapea na foafoaina Atamu ina ia ola matua ma oti. Na iloa lelei e Atamu e lē oo iā te ia le oti, pe ana lē ʻai i le laau.

E leʻi manaʻomia ona aai Atamu ma Eva i lenā laau ina ia ola ai e faavavau, auā na matuā tele ma anoanoaʻi laau matagofie i le faatoʻaga. (Kenese 2:9) O le lē ʻaina o le fua o le laau, ua faailoa mai ai e le uluaʻi ulugalii lo la usiusitaʻi i Lē na aumaia le ola iā i laʻua. O le a faaalia ai foʻi lo la amanaʻia o le pule a le Atua e taʻitaʻia o la ala.

Ina ia tatou malamalama i le māfuaaga ua feoti ai Atamu ma Eva, e manaʻomia ona tatou iloiloina se talanoaga na aafia ai i tatou uma. Na faaaogā e Satani se gata e faailoa mai ai se pepelo taufaaleaga. Ua taʻua i le Tusi Paia e faapea: “Ua sili ona faaeteete o le gata i manu ʻaivao uma o le fanua na faia e Ieova le Atua. Ua fai mai o ia i le fafine: ʻE moni ea na fetalai mai le Atua, e aua neʻi lua aai mai i fua o laau uma o le faatoʻaga?’”​—Kenese 3:1.

Na tali mai Eva: “O fua o laau o le faatoʻaga, e mafai ona ma aai ai. A o le fua o le laau o loo i le ogatotonu o le faatoʻaga, na fetalai mai le Atua, ʻAua lava neʻi oulua aai ai, aua foʻi neʻi oulua papaʻi i ai, ina neʻi oulua feoti.’” Na toe faapea mai le gata: “E te lua lē oti lava. Auā ua silafia e le Atua, o le aso lava lua te aai ai e pupula ai o oulua mata, ona pei ai lea o oulua o le Atua, e iloa le lelei ma le leaga.” Na faatupu e Satani le manatu e faapea o loo taofia e le Atua se mea lelei mai iā Atamu ma Eva.​—Kenese 3:2-5.

Na talitonu Eva i mea na ia faalogo i ai. Ua ia pulatoʻa atu i le laau ma ua matagofie i le vaai. Ua ia aapa atu ma tau mai lona fua ma ʻai ai. Ona faapea mai lea o le Tusi Paia: “Ua ia avatu foʻi le fua i lana tane ina ua la faatasi, ma ua ʻai ai foʻi ma ia.”​—Kenese 3:6.

Pagā le faanoanoa o le Atua i le vaai mai i lana fanau ua lē usiusitaʻi ma le loto i ai iā te ia. O le ā na faia e le Atua? Na fetalai atu Ieova iā Atamu: O le a e “toe foʻi atu i le eleele, auā na faia mai ai oe. Auā o le efuefu oe, e te toe foʻi atu lava i le efuefu.” (Kenese 3:17-19) O lea la, “o aso uma na ola ai Atamu, e iva selau tolu sefulu tausaga, ona oti ai lea o ia.” (Kenese 5:5) E leʻi alu Atamu i le lagi po o se nofoaga o agaga. E leʻi ola o ia i se isi taimi muamua atu, a o leʻi foafoaina e Ieova mai i le efuefu o le eleele. O lea, ina ua oti o ia ua lē toe ola ma ua toe foʻi atu lona tino i le efuefu. Ua lē o toe iai. Pagā le faanoanoa!

Talu ai ona o le lē usiusitaʻi ma le loto i ai o Atamu ma Eva, ua la lafoaʻia ai lo la tulaga lelei atoatoa ma le faamoemoe o le ola e faavavau. Na iʻu ina aafia ai lo la tulaga faaletino, ua lē lelei atoatoa ma ua agasala. Peitaʻi, e lē na o i laʻua na aafia ai i le la agasala. Na tuufaasolo mai foʻi lo la tulaga agasala i a la fanau. Ua taʻua i le Roma 5:12: “E pei ona oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma auā ua agasala uma lava.”

Ua faamatalaina i le Tusi Paia le agasala ma le oti o “le ʻie ufiufi lea o loo ufitia ai tagata uma lava, ma le ʻie ua lalagaina lea ua ufitia ai nuu uma.” (Isaia 25:7) O lenei ʻie ufiufi o loo ufitia ai tagata uma, ua tai pei o se puao e lē mafai ona tatou sola ese mai ai. O le mea moni, ua tatou “oti uma lava iā Atamu.” (1 Korinito 15:22) Ua tulaʻi mai ai le fesili e pei ona taʻua e Paulo: “O ai na te laveaʻiina aʻu mai i le tino e iʻu ai i loʻu oti?”​—Roma 7:24.