E eseese o oulua manatu ma lau paaga i se mea. A itiiti mai e tolu auala e te ono lua filifili e fai:

1. E te matuā maumaututū seʻia oo ina fai le mea e te manaʻo ai.

2. E tau lava ina e lolo atu i mea e manaʻo i ai lau paaga.

3. E mafai e oulua uma ona fetuutuunaʻi.

E te ono faapea mai: ʻAe ou te lē fiafia i lenei mea o le fetuutuunaʻi. E foliga mai e lē o faia se mea o mea ia e ma te mananaʻo ai.’

Ia mautinoa, pe afai e saʻo le auala e fetuutuunaʻi ai, e lē tatau la ona iʻu ai i se tulaga e lē fiafia uma ai paaga e toʻalua. Peitaʻi, a o leʻi iloiloina auala e fetuutuunaʻi ai, e iai ni vala e tatau ona e iloa e faatatau i lenei tomai tāua.

O le fetuutuunaʻi e manaʻomia ai le galulue faatasi. A o leʻi faaipoipo, atonu sa masani ona fai lava e oe au faaiʻuga. Peitaʻi, o lea ua sui le tulaga o mea, ma e tatau iā te oulua uma ona faatāua la oulua faaipoipoga nai lo o mea e manaʻo i ai le tagata lava ia. Ia manatu i aogā o lenei tulaga nai lo o le mafaufau i ona itu leaga. Ua faapea mai se avā e igoa iā Alexandra: “O le tuufaatasi o manatu o ni tagata se toʻalua, e maua ai se iʻuga e sili atu nai lo o le manatu o se tagata se toʻatasi.”

O le fetuutuunaʻi e manaʻomia ai se mafaufau e fetālaʻi. Na tusi John M. Gottman, o se faufautua o faaipoipoga: “E lē manaʻomia ona e ioe i mea uma e fai mai pe talitonu i ai lau paaga, ae e tatau ona e talanoa atu ma le faamaoni ina ia iloilo lona tulaga. . . . Pe afai e na o lou saofaʻi lava, piilima ma lūlū lou ulu e leai (pe na ona mafaufau), a o taumafai lau paaga e te lua talanoa i se faafitauli, e lē taitai la ona maua se iʻuga o le lua talanoaga.” *

O le fetuutuunaʻi e manaʻomia ai le faataulagaina. E leai se isi e fia mafuta i se paaga e faapea mai “e tatau ona e fai le mea lea ou te manaʻo ai auā o le mea lea e sili ona lelei.” E sili atu ona lelei pe afai e iai i paaga uma e toʻalua se uiga faataulaga. Ua faapea mai se avā e igoa iā June: ʻE iai taimi ou te lolo atu ai i manatu o laʻu tane ina ia faafiafia o ia, ae o isi taimi e na te faia foʻi faapea. O le tulaga lenā e tatau ona iai i se faaipoipoga, nai lo o le tau ina maumauaʻi i ou lava manatu, ae e tatau foʻi ona e faalogo atu i manatu o lau paaga.’

Ia saʻo le amataga. E masani lava, o le ituaiga leo e amata ai se talanoaga, o le ituaiga leo foʻi lenā e iʻu ai. Pe afai e te amata i ni upu faatigā, e lē mafai la ona maua se iʻuga filemu. O lea, ia mulimuli i le fautuaga o loo i le Kolose 3:12: “Ia oofu outou i le alofa mutimutivale, le agalelei, lotomaulalo, agamalu ma le faapalepale.” O le a fesoasoani nei uiga iā te oe ma lau paaga e ʻalofia ai le finau ae taumafai ia foʻia le faafitauli.​—Mataupu silisili o le Tusi Paia: Kolose 4:6.

Saʻili manatu e ioe faatasi i ai. Pe afai e te lua taumafai ma lau paaga e fetuutuunaʻi ae e na o finauga lava e iʻu i ai, atonu la o loo oulua soona uaʻi atu i mea e eseese ai o oulua manatu. Nai lo o lea, ia uaʻi atu i mea e te lua ioe faatasi i ai. Ina ia fesoasoani iā te oulua e maua manatu e ioe faatasi i ai, ia faataʻitaʻi le mea lenei:

Ia tofu oulua ma se lisi e lua vaega. Ia tusi i le vaega muamua vala o le mataupu e sili ona maumaututū ai ou manatu. Ae i le vaega lona lua, ia tusi ai vala e mafai ona e fetuutuunaʻi ai. Pe a uma, ona talanoa faatasi lea o a oulua lisi. Atonu e te lua iloa ane e tele atu mea e te lua ioe faatasi i ai, nai lo o mea na lua mafaufau i ai. Pe afai o lea, e tatau la ona faigofie ona oulua fetuutuunaʻi. E tusa foʻi pe e feteenaʻi lua manatu, ae o le tusia i lalo o vala uma o se mataupu, o le a fesoasoani e te lua malamalama atili ai i le mataupu.

Ia fefaasoaaʻi manatu. O nisi mataupu atonu e faigofie ona taulima. Peitaʻi, pe afai e lavelave se mataupu, e mafai la e se tane ma se avā ona faamalosia atili la laʻua faiā, e ala i le fefaasoaaʻi o manatu ina ia maua se iʻuga e la te malilie faatasi ai.—Mataupu silisili o le Tusi Paia: Failauga 4:9.

Ia lotomalie e fetuunaʻi ou manatu. Ua faapea mai le Efeso 5:33: “Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.” Pe afai e iai le alofa ma le faaaloalo i se ulugalii, o le a lotomalilie la i laʻua e iloilo manatu o le isi ma toe sui o la mafaufau. Na faapea mai se tane e igoa iā Cameron: “E iai mea atonu e te lē manaʻo e fai, ae mulimuli ane ua e fiafia e fai ona o lau paaga.”​—Mataupu silisili o le Tusi Paia: Kenese 2:18.