Auala e Maua ai le Fiafia ma le Faamalieina
E tusa pe tatou te nofofua, faaipoipo, talavou pe matutua, e tatou te mananaʻo uma lava ia maua le fiafia ma le faamalieina. O le finagalo foʻi lenā o Lē na foafoaina i tatou. O lea, ua ia saunia mai ai ni fautuaga e sili ona lelei.
Ia Galue Mamafa
“A ia galue mamafa o ia, ma ia faia e ona lima galuega lelei, ina ia mafai ai ona ia avatu ni mea i se tagata mativa.”—EFESO 4:28.
E finagalo Lē na foafoaina i tatou ia iai se vaaiga saʻo i galuega. Aiseā? O se tagata galue mamafa e fiafia, ona e mafai ona ia tausia o ia lava ma lona aiga. E mafai foʻi ona ia avatu le fesoasoani i sē o manaʻomia le fesoasoani. E maufaatuatuaina o ia e lana pule. O lea, o se tagata faigaluega lelei e tele ina tumau i lana galuega. Ua faamatalaina i le Tusi Paia le galue mamafa o se “meaalofa lea mai i le Atua.”—Failauga 3:13.
Ia Faamaoni
“Ua matou talitonu ua iā i matou se lotofuatiaifo lelei, ona matou te mananaʻo ina ia faia mea uma ma le faamaoni.”—EPERU 13:18.
Pe a tatou faaalia le faamaoni, o le a tatou mautinoa ai iā i tatou lava, maua le filemu o le mafaufau ma moe lelei ai i le po. E lē gata i lenā, e maufaatuatuaina ma faaaloalogia ai i tatou e isi. E lē mauaina e tagata lē faamaoni na uiga lelei. O le a latou lagona foʻi le nofosala ma le popole, neʻi iloa e se tasi lo latou lē faamaoni.
Ia Iai se Vaaiga Paleni i Tupe
“Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou.”—EPERU 13:5.
E tatou te manaʻomia tupe mo meaʻai ma isi mea e manaʻomia i aso uma. Peitaʻi, e leaga “le manaʻo tele i tupe.” O se tagata e manaʻo tele i tupe, e alu uma lona taimi ma le malosi ia maua le tele o tupe. O lenā manaʻo tele e faaleagaina ai le faaipoipoga, leai se taimi ma le fanau ma aafia ai lona soifua mālōlōina. (1 Timoteo 6:9, 10) E lē gata i lenā, e ono faaosoosoina foʻi o ia e faia se gaoioiga lē faamaoni. Na faapea mai se tagata atamai: “O le tagata e faamaoni e tele ona faamanuiaga, a o lē e faataalise ona saʻili i ʻoa e lē tumau ona mamā o ia.”—Faataoto 28:20.
Ia Filifili Aʻoaʻoga e Sili Ona Lelei
“Ia e taofimau i le atamai aogā ma le mafaufau lelei.”—FAATAOTO 3:21.
E fesoasoani le lelei o aʻoaʻoga i talavou ma mātua e avea ai ma ni tagata maufaatuatuaina. Peitaʻi, e lē faapea o na aʻoaʻoga e mautinoa ai ua tatou maua le saogalemu po o le fiafia moni. Ina ia tatou taulau manuia i vala uma o le olaga, tatou te manaʻomia aʻoaʻoga mai i le Atua. Ua faapea mai le Tusi Paia o le tagata e faalogo i le Atua, “e taulau manuia mea uma e na te faia.”—Salamo 1:1-3.
E te Ono Fiafia Foʻi
LE OLOMATAMATA
Auala e Fiafia ai i Galuega Mamafa
Seʻi iloilo nisi o fautuaga aogā mai i le Tusi Paia i auala e maua ai le fiafia ma le faamalieina i au galuega.
ALA MAI!
Po ua E Pisi Tele?
O le toʻatele o tagata e faigatā ona latou taumafai e faapaleni a latou galuega ma o latou aiga. Aiseā ua māfua ai lenei faafitauli? O le ā e mafai ona fai ina ia faaitiitia ai lea faafitauli?
ALA MAI!
Le Ala e Maua ai le Fiafia—Lotomalie ma Limafoaʻi
E manatu nisi e tutusa lelei le fiafia ma le mauaina o le tele o meafaitino ma le tamaoaiga. Ae pe e tumau le fiafia e maua mai i tupe ma meafaitino? Pe e iai se faamaoniga o lenei manatu?
