“Aua neʻi outou popole mo le aso a taeao, auā e iai foʻi popolega o le aso a taeao.”​—MATAIO 6:34.

Le uiga: O popolega o aso taʻitasi o se vala o lo tatou olaga. Peitaʻi, aua le faaopoopoina popolega o le aso a taeao i popolega o le asō. Ia taumafai e popole mo na o mea o le asō.

• O le popole e iʻu ai i le atuatuvale. O lea ia faataʻitaʻi auala nei: Muamua, ia mātau, o nisi popolega e lē mafai ona ʻalofia. O le popolevale i mea e lē mafai ona e taofia e faatupulaʻia ai lou popole. Lua, ia tatou iloa e masani lava, o le tele o mea e tatou te popole ai e lē taitai taunuu.

“O le atamai mai i lugā . . . e magafagafa.”​—IAKOPO 3:17.

Le uiga: Aua le taumafai ia lelei atoatoa mea e te faia. Aua e te faatalitalia se mea e lē oo i ai lou malosi po o mea e lē gafatia e isi.

• Ia fetuutuunaʻi, faataatia ni taʻiala aogā ma ia iloa le mea e gata ai lou mafai faapea foʻi isi. O le faia faapea, o le a faaitiitia ai ou popolega ma taulau manuia ai. E lē gata i lea, ia faaalia uiga agamālie. E mafai ona faaleleia ou faalogona pe a e faaalia le fiafia, e ui ā i se mea sesē na tatau ai ona e ita.

“O le tagata ua iai le faautaga loloto ua toʻafilemu lona loto.”​—FAATAOTO 17:27.

Le uiga: O faalogona lē lelei e aveesea ai mafaufauga lelei, o lea ia toʻafilemu.

• Ia iloa po o ā mea e māfua ai ona e popole ma mātau le auala e te tali atu ai. O se faataʻitaʻiga, pe a e popole ia iloa ou manatu, faalogona ma amioga, pe tusi foʻi i se api. O lou iloa lelei o le auala e tali atu ai i le popole, atonu o le a faaleleia ai le auala e taulima ai. E lē gata i lea, mafaufau i ni auala e aveesea ai ni mea o loo e popole ai i le olaga. Peitaʻi pe afai e lē mafai, ia vaai ni auala e faaitiitia ai le tutupu o na mea, e pei o le faatulaga lelei o mea e fai po o lou taimi foʻi e faaalu i na mea.

• Ia taumafai e suia lau vaaiga i mea. Atonu o mea o loo e popole ai, e lē o popole ai isi. E faalagolago lava i le auala e te vaai ai i mea. Mātau auala nei e tolu:

  1. Aua neʻi vave ona e manatu e leaga uunaʻiga na faia ai e se tasi se gaoioiga. Atonu e faia e se tasi se mea e te lē fiafia ai. Pe a e mafaufau e sesē le mea na fai e le tagata, o le a e lagona le ita. Atonu e saʻo oe, ae aiseā e te lē vaai ai i se māfuaaga lelei ua ia gaoioi ai faapea?

  2. Ia vaai i le itu lelei o se mataupu. A o faatalitali mo se fomaʻi pe i le malae vaalele, o le a faigofie ona e faaalia pea le onosaʻi, e ala i le faaaogā o lenā taimi e faitau ai se tusi pe siaki foʻi imeli o lau galuega.

  3. Ia iloa le ata atoa o le mataupu. Ia fesili ifo: ʻO le ā le umi o le a faaauau ai lenei faafitauli?’ Ia iloilo po o le ā le umi e taulima ai ma po o le ā foʻi le matuiā o lenā faafitauli.

“Ia faia mea uma i se tulaga talafeagai ma le maopoopo.”​—1 KORINITO 14:40.

Le uiga: Ia taumafai e faatumauina se tulaga maopoopo i lou olaga.

• E tatou te fiafia pe a maopoopo mea i o tatou olaga. O le faimeatuu o se tasi lenā o mea e saosaolaumea i le lē maopoopo ma le popole, lea e iʻu atu ai i le tele o mea e lē uma ona fai. Ia faataʻitaʻi auala nei e lua.

  1. Ia fai se faasologa lelei ma pipii i ai.

  2. Ia mātau ni uiga e māfua ai ona e faimeatuu ma faasaʻo na uiga.

“E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.”​—FAILAUGA 4:6.

Le uiga: O le pūpū tele i galuega o le a aveesea ai aogā o “luuga e lua o galuega mamafa.” Atonu o le a lē maua ai se taimi e latou te olioli ai i iʻuga o a latou galuega mamafa.

• Ia iai se vaaiga paleni i galuega ma tupe. O le tele o tupe e lē uiga atu o le a tele ai le fiafia pe faaitiitia ai le popole. O le mea moni, e lē o le tulaga lenā. O loo taʻua i le Failauga 5:12: “O le tele o mea a le tagata mauʻoa e lē mafai ai ona moe o ia.” O lea, ia ola e tusa ai o mea ua e maua.

• Ia faatulaga se taimi e mālōlō ai. E mafai ona faamatuu ese atu le popole, pe a fai mea e te fiafia i ai. E ui i lea, o mea e tatou te mafaufau e faapasi ai le taimi e pei o le matamata i le TV, e lē mafai ona foʻia ai le popole.

• Ia faatulaga le taimi e faaaogā ai masini faaonapōnei. ʻAlofia le siaki i taimi uma o imeli, feʻau tusitusia, po o fesootaʻiga i luga o le initaneti. Aua le siakiina imeli o lau galuega i taimi ua manava ai, seʻi vaganā ua manaʻomia.

ʻE aogā le faamalositino.’​—1 TIMOTEO 4:8.

Le uiga: O le faaauau pea ona faamalositino e saosaolaumea i lo tatou soifua mālōlōina.

• Ia atiaʻe ni masaniga lelei. O le faamalositino e mafai ona faaleleia ai ou faalogona ma faaleleia ai le auala e tali atu ai lou tino i le popole. Ia ʻai i meaʻai paleni ma aua le taumafai e misi se ʻaiga i le aso. Ia faamautinoa ua lava le moe.

• Ia ʻalofia vaifofō lē aogā o le popole e pei o le ulaula tapaa, fualaau faasāina ma le faaaogā sesē o le ʻava malosi. A o faagasolo taimi o le a faateteleina lou popole, lē lelei lou soifua mālōlōina ma faigatā ai ona maua ni au tupe.

• Ia vaai se fomaʻi pe afai ua lofitūina oe i le popole. Aua le matamuli e saʻili se fesoasoani faafomaʻi.

ʻIa faamautinoa mea e sili ona tāua.’​—FILIPI 1:10.

Le uiga: Ia iloilo lelei mea e tatau ona faamuamua.

• Ia faatulaga lau lisi i mea e sili ona tāua. O le faia faapea o le a fesoasoani iā te oe e taulaʻi ai i galuega e sili ona tāua ma o le a iloa ai mea e manaʻomia vave ona fai, pe avatu i se tasi e na te faia, po o ni mea foʻi e aveese.

• Ia tusi i lalo mea o loo faaalu ai lou taimi i totonu o le tasi le vaiaso, ona tilofaʻia lea o ni auala e faaleleia ai. O le tele e te pulea ai lou taimi, o le faaitiitia foʻi lenā o lou popole.

• Ia faatulaga se taimi e mālōlō ai. E oo ā i nai mālōlōga pupuu e mafai ona maua ai le malosi ma faaitiitia ai le popole.

“O popolega i le loto o le tagata e faavaivai ai le loto, a o tala lelei e olioli ai le loto.”​—FAATAOTO 12:25.

Le uiga: O upu agalelei ma le alofa e fai mai e isi e mafai ona faaleleia ai ou faalogona.

• Talanoa i se tagata e malamalama lelei i le faafitauli. O le a fesoasoani lenā tagata iā te oe e suia lau vaaiga i mea, pe e iloa ai foʻi se vaifofō mo le faafitauli. O le aveese o se mea o loo mamafa i lou mafaufau e mafai ona faaleleia ai ou faalogona.

• Fesili mo se fesoasoani. Pe e mafai ona lua galulue ma se isi tagata pe tuu atu se isi galuega e na te faia?

• Pe afai o gaoioiga a se tasi e te lua faigaluega faatasi e māfua ai ona e popole, ia vaai ni auala e mafai ona faaleleia ai le mataupu. Mo se faataʻitaʻiga, pe mafai ona e faamatala i ai ma le agalelei aafiaga o ana gaoioiga ma ana faamatalaga iā te oe? (Faataoto 17:27) Afai e lē mafai, pe mafai ona faaitiitia lou taimi e faatasitasi ai ma lenā tagata?

“E fiafia o ē e naunau i mea faaleagaga.”​—MATAIO 5:3.

Le uiga: E lē gata e manaʻomia e tagata meaʻai, lavalava ma ni mea e nonofo ai, ae e iai foʻi o tatou manaʻoga faaleagaga. Ina ia tatou maua le fiafia, e tatau ona tatou manatu mamafa i lenā manaʻoga ma tausi i ai.

• O le tatalo o le fesoasoani sili lea. Ua valaaulia i tatou e le Atua ina ʻia taʻu atu o tatou popolega uma iā te ia, auā o loo manatu mamafa mai o ia iā i tatou.’ (1 Peteru 5:7) O le tatalo ma le manatunatu loloto o le a e maua ai le filemu o le mafaufau.​—Filipi 4:6, 7.

• O le faitau i mea faaleagaga e te vavalalata ai i le Atua. O le a talanoaina i lenei mekasini mataupu silisili mai le Tusi Paia, lea na tusia e faamalie ai o tatou manaʻoga faaleagaga. O le faia faapea o le a faamalosia ai le “atamai aogā ma le mafaufau lelei.” (Faataoto 3:21) Aiseā e lē fai ai ma ou sini le faitau o le Tusi Paia? Atonu o le tusi lelei e amata ai o le tusi o Faataoto.