“E leʻi leva tele atu, na faigatā ona tatou talitonu e mafai ona maua meaʻai faaleagaga i luga o le Initaneti.” Pe na e faalogo muamua i na upu? Na aofia na upu i se lauga faalaeiau na faia e le uso o Geoffrey Jackson i le Lipoti Mai i le Vaega Pule 2020 #6. Na ia faapea atili mai: “A o lea ua e mafaufau pe faapefea ona e feagai ma lenei faamaʻi e aunoa ma ni meafaigaluega e pei o le JW Library. Na saunia i tatou e Ieova mai i le tele o tausaga mo tulaga faapenei e tulaʻi mai.”

 E faapefea ona sauniunia i tatou e Ieova? O le ā na aofia ai i le saunia o le JW Library, ma o le ā na manaʻomia e tausia ma faaleleia atili ai?

 Iā Me 2013, na talosagaina ai e le Vaega Pule le MEPS Programming, o se matagaluega o le ofisa ulu, e faia se app e aofia ai le toe teuteuga o le Faaliliuga a le Lalolagi Fou. Na taʻua e Paul Willies e galue i lenā matagaluega: “E oo mai i le taimi lenā, e leʻi iai se tatou app mo telefoni i app store. Na matou faamaopoopo loa se vaega, faataatia ese isi poloketi ae galulue loa ma isi matagaluega e fuafua ma saunia le app ma ona vaega. Na matou tatalo e lē aunoa, ma o le fesoasoani a Ieova na mafai ai ona tatala le app i le fonotaga faaletausaga i le na o le lima masina mulimuli ane ai.”

 O le isi luʻi o le avea lea o lenei app o se potu tusi lea e maua ai le tele o lomiga ma le tele o gagana. E oo ane iā Ianuari 2015, ua iai le tele o tatou lomiga i le faa-Peretania. Ae i le na o le ono masina na sosoo ai, ua mafai e i latou o loo faaaogāina le app ona kopi mai na lomiga i le faitau selau o isi gagana.

 Talu mai lenā taimi, ua faaleleia atili e o tatou uso le app i isi auala, e pei o le faaopoopo i ai o vitiō, tuufaatasia lomiga ma vitiō uma mo le sauniga i le vaega e tasi, ma mafai ona maua lomiga i le Tusi Taʻiala pe a oomi se fuaiupu o le Tusi Paia.

 Na mafai ona faaaogā le JW Library i le 8 miliona o masini faaonapōnei i aso taʻitasi, ma le sili atu i le 15 miliona i masina taʻitasi. O le ā na manaʻomia ina ia sologa lelei ai le app i na masini faaonapōnei? Na faapea mai le uso o Willies: “E masani a o se app e lē uma galuega e fai i ai mo le faaleleia atili. O loo matou galulue pea e faaopoopo nisi vaega fou mo le app ina ia faigofie ai ona faaaogā. Talu ai o le system e vaavaaia masini faaonapōnei e masani a ona faia update, e tatau ai la ona matou fetuunaʻia le app ina ia fetaui ma na update. E matou te vaavaaia lelei ma faaleleia a tatou internal software ona o loo faaauau pea ona faateleina le aofaʻi o tatou lomiga ma vitiō i le JW Library. Pe a faitau le aofaʻi o lomiga i gagana uma, ua iai nei i le JW Library le pe ā ma le 200,000 lomiga ma le silia i le 600,000 vitiō ma lomiga ua uma ona puʻeina.

 Ina ia faaauau pea galuega mo le app, e tele atu isi mea e manaʻomia nai lo le iai na o masini. E tatau foʻi ona faatau mai so o se laisene o se software. O le tau o le laisene e tasi, e 1,500 tālā Amerika i le tausaga. E faaalu foʻi e le MEPS Programming i tausaga taʻitasi le pe ā ma le 10,000 tālā Amerika i masini mai i falegaosimea eseese, ina ia faamautinoa o le a sologa lelei le faaaogāina o le app i komepiuta fou, tablets fou, ma telefoni fou.

 O le JW Library, ua faaitiitia ai tupe faaalu i le lomia, tuufaatasia ma le felaʻuaʻiga o lomiga. O se faataʻitaʻiga, o le tatou tamaʻitusi o le Iloiloina Tusitusiga Paia i Aso Taʻitasi—2013, e toetoe 12 miliona kopi na lomiaina. Ae na o le lima miliona kopi o le tusi mau mo le tausaga 2020 na lomiaina, e ui na iai se faaopoopoga pe ā ma le 700,000 tagata talaʻi i le lalolagi aoao. Aiseā na māfua ai lenā suiga tele? Talu ai ua mafai e le toʻatele o uso ma tuafāfine ona faitau i le mau o le aso i le JW Library. a

 E tele foʻi auala ua fesoasoani ai le JW Library iā i latou o loo faaaogāina. Na taʻua e Geneviève mai i Kanata, ua fesoasoani le app e faaauau ai pea ona fai ana ia lava suʻesuʻega. Na ia taʻutino mai: “Pe a ou faaaogāina ni tusi se tele mo aʻu suʻesuʻega, e mautinoa e lē mafai ona ou suʻesuʻe i taeao uma. Ae o le app, e na o loʻu tago atu lava i le tablet ua iai uma mea ou te manaʻomia. O le suʻesuʻe e lē aunoa ua faamalosia ai loʻu faatuatua ma faalolotoina ai loʻu iloa i le itu faaleagaga.”

 Ua faamaonia le aogā o le app, i le taimi o le faamaʻi o le KOVITI-19. Ua faapea mai Charlyn mai i le Iunaite Setete: “A o faaauau pea ona sasao le faamaʻi i le lalolagi, ua silia nei ma le tausaga ou te leʻi toe mauaina ni lomiga fou na lomia. Ae na faaauau pea ona fafagaina i tatou faaleagaga e ala mai i le JW Library, ma ou te faafetai iā Ieova mo lenei sauniuniga alofa.”

 E tutusa faalogona o Faye e nofo i Filipaina ma faalogona o le toʻatele. Na ia faapea mai: “Ou te faaaogāina lenei app e vavalalata ai iā Ieova. O laʻu mea muamua lava lea e faitau i taeao. Ou te faalogologo i ai a o fai ni aʻu feʻau. Ou te sauniuni ai mo le sauniga faapea foʻi aʻu suʻesuʻega faale-Tusi Paia. Ou te matamata ai i vitiō pe a leai ni aʻu mea e faia. Ou te faitau ai i se mataupu po o le Tusi Paia a o oʻu faatalitali i se laina. O se mea e matuā tautele.”

 Ua faamaonia foʻi le matuā aogā o le app i le faiva. Mo se faataʻitaʻiga, a o auai i le talaʻiga, na manaʻo se tuafafine i Cameroon e faaaogā se mau na vaai o faaaogā e se isi tuafafine i ni nai vaiaso ua tuanaʻi. Peitaʻi e na te leʻi manatua po o fea e maua ai le fuaiupu. Na ia faapea mai: “E faafetai ona na ou manatua se vaega o lenā fuaiupu. Na ou tatala loa le app, oomi le Tusi Paia ma suʻe loa le vaega lenā o le fuaiupu. O le taimi a lenā na ou maua ai le mau. O le faaaogāina o le app, ua mafai ai ona ou maua le tele o mau e galo iā te aʻu i nisi taimi.”

 O ā outou foaʻi tauofo e faaaogā ai le donate.isa4310.com, ua mafai ai ona matou faia, tausia ma faaleleia atili ai le JW Library mo tatou uso ma tuafāfine i le lalolagi aoao. Faafetai tele lava mo lo outou limafoaʻi.

1. Oketopa 2013—Ua iai le toe teuteuga o le Faaliliuga a le Lalolagi Fou i le faa-Peretania

2. Ianuari 2015—Maua isi lomiga i le faa-Peretania, ma mulimuli ane maua foʻi i le faitau selau i isi gagana

3. Novema 2015—Ua iai se vaega e mafai ai ona faailoga au tali po o ni manatu autū

4. Me 2016—Ua iai le vaega o Meetings

5. Me 2017—Ua iai le vaega e fai ai au faamaumauga

6. Tesema 2017—Faaopoopo i ai vaega mo le Study Bible

7. Mati 2019—Ua iai le vaega e mafai ona kopi mai ai vitiō ma lomiga ua uma ona puʻeina, matamata ai vitiō, ma maua ai lomiga mo le Tusi Taʻiala

8. Ianuari 2021—Ua faaopoopo isi vaega ua faaleleia mo le lomiga Se Olaga Fiafia e Faavavau!