I ni nai vaiaso o lumanaʻi nei, o le a faia ai faigāpalota i nisi o atunuu o le lalolagi. O le a faia ai e tagata ni filifiliga tāua, po o ai le taʻitaʻi o le a latou filifilia.

 O le ā se manatu o le Tusi Paia?

 Ua faailoa mai i le Tusi Paia ni mea e tutusa uma ai taʻitaʻi faaletagata.

•    “Aua tou te faatuatua atu i perenise, po o le fanau a tagata e lē o iai se faaolataga. E alu ese lana mānava, e toe foʻi atu o ia i le eleele; e faaumatia i lea lava aso ona manatunatuga.”—Salamo 146:3, 4.

 E oo lava i taʻitaʻi e sili ona lelei, e iai lava le taimi e maliliu ai. E lē gata i lea, e lē mafai ona latou faamautinoa mai, po o le a faaauauina a latou galuega lelei e taʻitaʻi e sosoo mai iā i latou.—Failauga 2:18, 19.

 O le mea moni, ua faailoa mai i le Tusi Paia e leʻi foafoaina tagata ma le tomai e pulea ai i latou lava.

•    “E lē o i le tagata foʻi e savali ona faatonuina le mea e ui ai o ia.”—Ieremia 10:23.

 Pe e iai se tasi e mafai ona avea ma taʻitaʻi lelei i aso nei?

 Ua taʻua i le Tusi Paia ua tofia e le Atua se taʻitaʻi e sili ona agavaa ma maufaatuatuaina, o Iesu Keriso. (Salamo 2:6) Ua avea Iesu ma Tupu o le Malo o le Atua, o se faigāmalo o loo pule mai i le lagi.—Mataio 6:10.

 Po o le a e filifili e talia le taʻitaʻiga a Iesu? Ina ia iloa le tāua o lenā filifiliga, mātau le manatu o le Tusi Paia:

•    “Ia āva i le atalii [Iesu Keriso], ina neʻi toʻasā mai le Atua ma faaumatia outou i le ala, auā e faafuaseʻi ona sasao aʻe Lona toʻasā. E fiafia foʻi i latou uma o ē e sulufaʻi atu iā te Ia.”—Salamo 2:12.

 O le taimi lenei e tatau ona fai ai lau filifiliga. Ua iloa mai i valoaga o le Tusi Paia, na amata ona pule Iesu i le tausaga 1914, ma e lē o toe umi ona tafiesea lea e le Malo o le Atua o faigāmalo uma a tagata.—Tanielu 2:44.

 Ina ia iloa atili le auala e te lagolagoina ai le taʻitaʻiga a Iesu, ia faitau i le mataupu “Ia Filifili e Lagolagoina le Malo o le Atua i le Taimi Nei!”