Po o e ola i se olaga e utiuti ai le tupe maua ona o le faalētonu o le tulaga tau tamaoaiga? O faamaʻi e pei o le koviti-19, mala faalenatura, faiga faapolotiki ma taua, e vave ona faaleagaina ai le tamaoaiga. O le suia faafuaseʻi o tupe maua e lagona ai le popole. Ae e iai mea e mafai ona e faia, lea e faavae mai i fautuaga atamai o loo i le Tusi Paia e mafai ona fesoasoani iā te oe, e feagai ai ma le utiuti o tupe maua.

 Mataupu silisili faale-Tusi Paia: “Ua ou iloa ai ona feagai . . . ma le tele o mea ma le pagatia i le lē tagolima.”​—Filipi 4:12.

 E ui o le a faaitiitia au tupe nai lo o le taimi muamua, ae e mafai ona e faamasani i le tulaga tau tupe o le a iai. O le vave ona e talia o le tulaga moni ua iai ma fetuutuunaʻi, o le a mafai ai e oe ma lou aiga ona fesagaʻia lena tulaga.

 Ia iloa po o ā fesoasoani mai i le malo po o isi faalapotopotoga e mafai ona e maua. Ia vave ona fai sau gaoioiga, ona o nei fesoasoani e masani ona iai ona taimi faatulagaina.

 Mataupu silisili faale-Tusi Paia: “E faalēaogāina fuafuaga pe a lē iai ni talanoaga i mataupu faalilolilo, a o le toʻatele o le ʻaufaufautua e taunuu ai mea.”​—Faataoto 15:22.

 Ia talanoa i lau paaga ma lau fanau e faatatau i le tulaga o mea ua iai. O le lelei o fesootaʻiga, o le a e fesoasoani ai i sui uma o le aiga e malamalama ma lagolagosua i suiga e manaʻomia. Pe a galulue uma e ola i se olaga faigofie ma ʻalofia le faamaʻimau tupe, o le a tele ai mea e mafai ona faaaogā ai au tupe.

 Mataupu silisili faale-Tusi Paia: Ia “nofo i lalo ma faitau tupe o le a faaalu.”​—Luka 14:28.

 Pe a utiuti au tupe maua, e sili atu ona tāua le iloa o mea o loo faaalu uma ai au tupe. Ia fai se lisi o au tupe maua i le masina e fua i le tulaga ua iai, ona tusi lea i lalo o au tupe faaalu i le masina ua teʻa, e ui e te iloa e tatau ona sui ona o le tulaga o mea ua iai. Ia taumafai e faaaofia i au tupe faaalu i le masina se tupe e te manaʻo e sefe mo mea e te leʻi faatalitalia po o faalavelave faafuaseʻi.

 Fesoasoani: Pe a fai lau lisi o au tupe faaalu, aua neʻi galo ona faaaofia ai ma faatauga laiti. Atonu o le a faateʻia oe i le tele o le tupe e alu i na mea laiti. O se faataʻitaʻiga, ina ua uma ona iloilo e se tamāloa ana tupe faaalu, na ia iloa ai e silia ma le selau tālā tupe na ia faaaluina i pulu kamu i tausaga taʻitasi.

 Mataupu silisili faale-Tusi Paia: “Ia outou faamautinoa o mea e sili ona tāua.”​—Filipi 1:10.

 Ia faatusatusa au tupe maua i au tupe faaalu, ma vaai pe iai ni mea e mafai ona aveese pe faaitiitia, ina ia mafai ona e ola i le aofaʻiga o tupe ua e maua. Iloilo nisi o vala nei:

•   Auala o femalagaaʻiga. Pe afai e iai ni au taavale se lua, pe mafai ona faatau ese le isi? Pe afai e iai sau taavale taugatā, pe mafai ona sui i se taavale taugofie? Pe mafai ona e faaaogā femalagaaʻiga mo le lautele po o se uila vilivae?

•   Faafiafiaga. Pe mafai ona faamisi mo sina taimi le totogiina o polokalame i luga o le initaneti po o le TV? Pe mafai ona e saʻilia ni faafiafiaga e taugofie?

•   Pili totogi. Ia talanoa o se aiga i le auala e faaitiitia ai tupe faaalu i le vai, eletise ma tupe faaalu i le penisini. O le tapē o molī ma le faaitiitia o le umi e taeele ai atonu o ni mea e manatu faatauvaa i ai, ae e mafai ona sefe ai le tupe.

•   Meaʻai. ʻAlofia le aai i faleʻaiga, ae ia kuka meaʻai i le fale. Ia fuafua lelei meaʻai o le a kukaina, ia fai ni faatau siiatoa ma ia faatelē le kukaina o meaʻai pe a mafai, ma ia faaaogā meaʻai e totoe mai i le isi aso. Ia fai se lisi o mea e faatau ae e te leʻi alu i le faleoloa, ina ia ʻalofia ai le faatau o mea e lē manaʻomia. Ia faatau fualaau ʻaina o loo maua i lo outou vaipanoa, auā e masani lava e taugofie. ʻAlofia le faatauina o meaʻai e lē maua ai se soifua mālōlōina. E mafai foʻi ona totō ni au fualaau ʻaina.

•   Lavalava. Ia faatau na o lavalava e manaʻomia nai lo o le faatau ona o āʻega. Ia mataalia i taimi e faia ai paʻū a faleoloa po o taimi e faatau ese ai ni mea na faaaogā muamua, ae o loo lelei pea. Ia faalalā le tagamea pe a lā le aso. O le faia faapea, o le a sefe ai le tupe mai i le faaaogāina o masini e faamamago ai lavalava.

•   Faatauga mo le Lumanaʻi. A o e leʻi faatauina se mea, ia fesili ifo: ‘⁠Po o lava laʻu tupe? Po ou te manaʻomia moni lava?’ Pe mafai ona faatuai le faafouina po o le suia o au meafale, masini faaonapōnei po o le taavale? Pe mafai ona e faatau ese mea ua lē o toe faaaogāina pe manaʻomia? O le faia faapea, e fesoasoani iā te oe e ola ai i se olaga faigofie ma o le a sefe ai isi au tupe.

 Fesoasoani: Pe a faafuaseʻi ona faaitiitia au tupe maua, o le a uunaʻia ai oe e tuu masaniga lea e faaleagaina ai ma e taugatā, e pei o le ulaula, taaloga faitupe po o le inu tele i le ʻava malosi. O le faia o na suiga e lē gata o le a fesoasoani i lou tulaga tau tupe, ae o le a faaleleia ai foʻi lou olaga.

 Mataupu silisili faale-Tusi Paia: “E fiafia o ē e naunau i mea faaleagaga.”​—Mataio 5:3.

 O loo i le Tusi Paia lenei fautuaga aogā: “Ua fai le atamai ma puipuiga, ua fai foʻi tupe ma puipuiga; a o le aogā o le poto atoa ai ma le atamai, e faaolaina ai i latou ua mauaina.” (Failauga 7:12) O le atamai lena o loo i le Tusi Paia, ma ua iloa e le toʻatele o le faatatauina o taʻiala mai i le Tusi Paia, e fesoasoani e ʻalofia ai le soona popole e faatatau i le tulaga tau tupe.​—Mataio 6:31, 32.