Po o Aʻoaʻo e le Tusi Paia le Manatu, ‘A Faasaoina Loa, Ona Faasaoina ai Lava Leaʻ?
Tali a le Tusi Paia
E leai, e lē o aʻoaʻoina ai le aʻoaʻoga e faapea, ‘a faasaoina loa, ona faasaoina ai lava lea.’ O se tagata ua ia maua le faaolataga e ala i le faatuatua iā Iesu Keriso, e mafai ona leiloa lenā faatuatua ma le faaolataga. O loo faapea mai le Tusi Paia, ina ia faatumauina le faatuatua e manaʻomia ai ni taumafaiga malolosi, ma ia matuā “finafinau.” (Iuta 3, 5) Na ta’u atu i uluaʻi Kerisiano ua uma ona talia Keriso e faapea: “Ia faaauau ona outou galulue mo lo outou faaolataga, i le mataʻu ma le gatete.”—Filipi 2:12
E lē faamaonia e fuaiupu o le Tusi Paia le aʻoaʻoga ‘a faasaoina loa, ona faasaoina ai lava lea’
O loo lapataʻi mai le Tusi Paia e faasaga i agasala matuiā lea e taofia ai se tagata mai le ulu atu i le Malo o le Atua. (1 Korinito 6:9-11; Kalatia 5:19-21) O lea la, afai e tumau pea le faaolataga, o le a lē aogā la lenei lapataʻiga. Nai lo lea, ua faaalia i le Tusi Paia e mafai e se tasi ua faasaoina ona toe paʻū ma toe foʻi atu i le faia o agasala matuiā. O se faataʻitaʻiga, o loo faapea mai le Eperu10:26: “Afai ua tatou faia pea le agasala ma le loto i ai ina ua uma ona tatou talia le poto saʻo i le upu moni, e lē toe iai se taulaga mo a tatou agasala.”—Eperu 6:4-6; 2 Peteru 2:20-22.
Na faamamafa e Iesu le tāua o le faatumauina o le faatuatua e ala i le aumaia o se talafaatusa lea na ia faatusa ai o ia i se vine, aʻo ona soo o lālā o le vine. O nisi o i latou na faaalia lo latou faatuatua iā te ia i nisi taimi, e ala i fua latou te fuaina mai poo a latou gaoioiga, ae mulimuli ane lē taulau ona latou faia faapea ma ‘e lafoaʻi ese e pei o se lālā (e lē fua),’ ma mou atu ai lo latou faaolataga. (Ioane 15:1-6) Na faaaogā foʻi e le aposetolo o Paulo se talafaatusa faapena i lona faapea mai o Kerisiano uma e lē tumau i le faatuatua “e salaeseina foʻi.”—Roma 11:17-22.
Ua faatonuina Kerisiano “ia faaauau ai ona outou mataala.” (Mataio 24:42; 25:13) O i latou e paʻuʻū atu i le tau tulemomoe faaleagaga, pe i le faia o “galuega o le pogisa” poo le lē faatinoina atoatoa o galuega na faatonu e Iesu, o le a mou atu lo latou faaolataga. —Roma 13:11-13; Faaaliga 3:1-3.
E tele mau o le Tusi Paia e faaalia ai o i latou ua faasaoina e tatau ona tumau faamaoni seʻia oo i le iʻuga. (Mataio 24:13; Eperu 10:36; 12:2, 3; Faaaliga 2:10) Na faailoa mai e Kerisiano i le uluaʻi senituri lo latou olioli ina ua latou aʻoaʻoina na tumau ma le faamaoni o latou uso tapuaʻi i le faatuatua. (1 Tesalonia 1:2, 3; 3 Ioane 3, 4) Pe e talafeagai le faamamafa mai e le Tusi Paia ia tumau ma le faamaoni, pe afai o i latou e leʻi tumau o le a faasaoina foʻi?
Na lagona e le aposetolo o Paulo e faapea sei vaganā le oti ona ia mautinoa lea o lona faaolataga. (2 Timoteo 4:6-8) I lona olaga sa iai muamua na ia iloa ai, e na te ono misia lona faaolataga pe a ia faamalieina ona tuʻinanauga faaletino. O lea na ia tusi ai: “Ou te tatuʻi loʻu tino e fai ma pologa ina neʻi taʻuleagaina aʻu, ae sa ou talaʻi atu i isi tagata.”—1 Korinito 9:27; Filipi 3:12-14.