O Ai e Ō i le Lagi?

PLAY

O Ai e Ō i le Lagi?

Tali a le Tusi Paia

E filifilia e le Atua se numera faatapulaaina o Kerisiano faamaoni, o ē o le a toetutū i le lagi pe a maliliu. (1 Peteru 1:3, 4) Pe a filifilia i latou, e tatau ona faaauau ona tausia le faatuatua ia malosi ma faaalia amioga mamā, ina ia agavaa ai pea e maua lo latou tofi faalelagi.—Efeso 5:5; Filipi 3:12-14.

O ā mea o le a latou faia i le lagi?

O le a latou auauna faatasi ma Iesu o ni tupu ma ositaulaga mo le 1,000 tausaga. (Faaaliga 5:9, 10; 20:6) O le a latou faia aʻe le “lagi fou” po o le pulega faalelagi, lea o le a pulea mai le “lalolagi fou” po o le sosaiete fou o tagata i le lalolagi. O nei pule faalelagi o le a fesoasoani e faafoʻisia tagata i le tulaga amiotonu e pei o le uluaʻi fuafuaga a le Atua.—Isaia 65:17; 2 Peteru 3:13.

E toʻafia o le a toe faatutūina i le lagi?

Ua faaalia mai i le Tusi Paia, e 144,000 tagata o le a toe faatutūina e ola i le lagi. (Faaaliga 7:4) I le vaaiga o loo faamauina i le Faaaliga 14:1-3, na vaaia e le aposetolo o Ioane “le Tamaʻi Mamoe i le Mauga o Siona, o loo faatasi ma ia le selau fā sefulu fā afe.” I lenei vaaiga, o loo faaata mai e “le Tamaʻi Mamoe” Iesu ua toe faatūina. (Ioane 1:29; 1 Peteru 1:19) O le “Mauga o Siona” ua faaata mai ai le tulaga maualuga o Iesu ma le 144,000 o ē o le a pule faatasi ma ia i le lagi.—Salamo 2:6; Eperu 12:22.

O i latou “o ē ua valaauina, ma ua filifilia” e pule faatasi ma Keriso i le Malo, e faasino atu i le “lafu mamoe itiiti.” (Faaaliga 17:14; Luka 12:32) Ua faaalia mai ai e toʻaitiiti lo latou faitau aofaʻi pe a faatusa atu i le aofaʻiga atoa o mamoe a Iesu.—Ioane 10:16.

Faamatalaga sesē e faatatau iā i latou e ō i le lagi

Faamatalaga sesē: O tagata lelei uma e ō i le lagi.

Mea moni: Ua folafola mai e le Atua le ola e faavavau i le lalolagi mo le toʻatele o tagata lelei.—Salamo 37:11, 29, 34.

Na fetalai Iesu: “E leai foʻi se tasi na alu aʻe i le lagi.” (Ioane 3:13) Na ia faailoa mai, o tagata lelei na muamua maliliu iā te ia e pei o Aperaamo, Mose, Iopu ma Tavita, e leʻi ō i le lagi. (Galuega 2:29, 34) Peitaʻi sa iai lo latou faamoemoe e toetutū i le ola i le lalolagi.—Iopu 14:13-15.
O le toetū i le lagi e taʻua o le “uluaʻi toetū.” (Faaaliga 20:6) E faaalia mai ai e iai se isi toetū, o le toetū lea i le lalolagi.
Ua aʻoaʻo mai i le Tusi Paia, i le pulega o le Malo o le Atua, “e lē toe iai se oti.” (Faaaliga 21:3, 4).O lenei folafolaga o le a faataunuuina i le lalolagi, talu ai e leʻi iai lava se oti i le lagi.

Faamatalaga sesē: E filifili e le tagata lava ia pe ola i le lagi po o le lalolagi.

Mea moni: E filifilia e le Atua po o ai Kerisiano faamaoni e na te maua ʻle taui o le valaau faalelagi,’ o le faamoemoe lea e ola i le lagi. (Filipi 3:14) E lē fua le filifilia o se tasi i lona faanaunauga po o lona manaʻoga.—Mataio 20:20-23.

Faamatalaga sesē: O le faamoemoe e ola e faavavau i le lalolagi e lē tāua tele, ma e mo na o i latou e lē agavaa e ola i le lagi.

Mea moni: Ua taʻua e le Atua i latou o le a maua le ola e faavavau i le lalolagi, o “oʻu tagata,”o ē “ua filifilia” ma ua “faamanuiaina e Ieova.” (Isaia 65:21-23) O le a latou maua le faaeaga o le faataunuuina o le uluaʻi fuafuaga a le Atua mo tagata, o le ola e faavavau i le tulaga lelei atoatoa i se lalolagi parataiso.—Kenese 1:28; Salamo 115:16; Isaia 45:18.

Faamatalaga sesē: O le numera 144,000 o loo taʻua i le Faaaliga e faafaatusa, e lē moni.

Mea moni: E ui o loo iai i le tusi o Faaaliga ni numera faafaatusa, ae o nisi o numera o loo iai e moni. O se faaaʻoaʻoga, o loo taʻua ai “igoa e sefulu ma le lua o aposetolo e toʻasefulu lua o le Tamaʻi Mamoe.” (Faaaliga 21:14) Seʻi tatou iloilo se faamaoniga e faapea atu ai o le numera e 144,000 o se numera moni.

O loo faamauina i le Faaaliga 7:4, “le faitau aofaʻi o i latou ua faamaufaailogaina [ua mautinoa le ola i le lagi] e selau fā sefulu fā afe.” I le siʻomaga o lenei fuaiupu, e iai se vaega lona lua o loo faaeseese mai ai; “o se motu o tagata e toʻatele e lē mafai e se tasi ona faitaulia.” O i latou o le “motu o tagata e to’atele” e latou te maua foʻi le faaolataga mai i le Atua. (Faaaliga 7:4, 9, 10) Pe afai e faafaatusa le numera 144,000, e faasino atu i se vaega e aunoa ma ni fuainumera, o le a leiloa la le eseesega o vaega e lua. a

E lē gata i lea, ua faamatalaina le 144,00 o i latou ia “ua faatauina mai i tagata o uluaʻi fua.” (Faaaliga 14:4.) O le faaupuga “uluaʻi fua” e faasino atu i se vaega toʻaitiiti ua filifilia. Ua faamatalaina ai i latou o le a pule faatasi ma Keriso i le lagi, e pulea se aofaʻiga tele o tagata i le lalolagi.—Faaaliga 5:10.

a I se tulaga tutusa, na tusia e le polofesa o Robert L. Thomas e faatatau i le numera 144,000 o loo taʻua i le Faaaliga 7:4. “O se fuainumera patino e eseese ma le numera e lē o patino le aofaʻi o loo taʻua i le Faaaliga 7:9. Pe afai la e faafaatusa lenā numera, e leai la se fuainumera moni i le mau.”—Faaaliga 1-7: An Exegetical Commentary, itulau 474.