UIGA O MAU

Ioane 14:6—“O Aʻu o le Ala, o le Upu Moni ma le Ola”

PLAY

“Ua fetalai atu Iesu: ʻO aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.’”—Ioane 14:6, Faaliliuga a le Lalolagi Fou.

“Ua fetalai atu Iesu ia te ia, ʻO aʻu nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.’”—Ioane 14:6, Tusi Paia Samoa—Lomiga 1969.

Uiga o le Ioane 14:6

O se tasi e fia tapuaʻi iā Ieova a le Atua le Tamā, e tatau ona ia amanaʻia le matafaioi tāua a Iesu.

“O aʻu o le ala.” Ua saunia e Iesu “le ala” saʻo e faalatalata ai i le Atua. O se faaaʻoaʻoga, o ē e tatalo i le Atua e ao ona tatalo e ala i le suafa o Iesu. (Ioane 16:23, 24) O le maliu o Iesu ua mafai ai e tagata ona maua se leleiga ma le Atua, pe toe maua lona finagalo malie. (Roma 5:8-11) Na faia foʻi e Iesu le faaaʻoaʻoga e tatau ona mulimuli i ai ē e mananaʻo e faafiafia le Atua.—Ioane 13:15.

ʻO aʻu o le upu moni.’ Na fetalai ma ola Iesu i le upu moni i taimi uma. (1 Peteru 2:22) E mafai e se tagata ona aʻoaʻo le upu moni i le Atua, e ala i le faalogologo iā Iesu. (Ioane 8:31, 32) O Iesu foʻi o “le upu moni,” auā na ia faataunuuina valoaga o le Tusi Paia. O lea, na ia faataunuuina ai folafolaga a le Atua.—Ioane 1:17; 2 Korinito 1:19, 20; Kolose 2:16, 17.

ʻO aʻu o le ola.’ Na foaʻi e Iesu lona ola ina ia maua e ē e faatuatua iā te ia le ola e faavavau. (Ioane 3:16, 36) O Iesu foʻi o “le ola” mo ē ua maliliu, auā o le a ia toe faatutūina i latou mai i le oti.—Ioane 5:28, 29; 11:25.

“E leai se tasi e alu atu i le Tamā pe a lē ui mai iā te aʻu.” O ē e fia maua se faiā lelei ma le Atua, e tatau ona latou taliaina le matafaioi faapitoa a Iesu. E latou te faia faapea e ala i le tatalo i le Atua i le suafa o Iesu, e faaalia ai lo latou amanaʻia o le pule a Iesu Keriso. (Ioane 15:16) E latou te amanaʻia foʻi ua na o Iesu le ala e maua ai le faaolataga.—Galuega 4:12; Filipi 2:8-11.

Siʻomaga o le Ioane 14:6

O loo maua i le Ioane mataupu 13-17 fautuaga mulimuli a Iesu i ona aposetolo faamaoni e toʻa 11 i le pō a o leʻi maliu. I le mataupu e 14, na faalaeiau ai e Iesu ona soo ina ia faatuatua, alolofa ma usiusitaʻi iā te ia ma lona Tamā. (Ioane 14:1, 12, 15-17, 21, 23, 24) Na ia faailoa atu foʻi le vavalalata o la laʻua faiā ma lona Tamā i le taimi ua teʻa ma i le taimi lenā. (Ioane 14:10, 20, 28, 31) E ui lava ua toeitiiti toe afio i le lagi, ae na faamautinoa atu e Iesu i ona soo, e na te lē tuulafoaʻia i latou. (Ioane 14:18) Na ia folafola atu foʻi o le a latou maua “le fesoasoani, o le agaga paia lea e auina mai e le Tamā i loʻu igoa.” (Ioane 14:25-27) O auala na sa sauniunia ai e Iesu ona soo i luʻitau o le a latou faafetaiaʻia.