Digiddeessitanno; Magano magansiˈra annu annu doorshaati. (Roomu Sokka 14:12) Yihowa Farciˈraasine qaaqqullinsara Qullaawu Maxaafi seera rosiissannoha ikkirono, mittu mittunku qaaqqi lophihu gedensaanni Yihowa Farciˈraasincho ikkannoronna teˈee umisi doodhanno.—Roomu Sokka 12:2; Galatiyu Sokka 6:5.

 Wolu anninna amante gede, Yihowa Farciˈraasineno oosonsara seekkansara hasidhanno. Insa oosonsa kaaˈlanno yite heddannore rosiissanno. Lawishshaho, kaaˈlitannonsa ogimma, dancha amanyootenna ammaˈnote roso rosiissannonsa. Yihowa Farciˈraasine, Qullaawu Maxaafi rosi heeshsho seekkannota ammantanno; konni daafira, insa Qullaawa Maxaafa xiinxallissenna gambooshshe ledonsa hadhanno gede assite Qullaawu Maxaafi rosi wodaninsara qaˈmanno gede assitanno. (Marro 6:6, 7) Tini, mittu mittunku qaaqqi lophihu gedensaanni, annisinna amasi ammaˈno harunsannoronna teˈee doodhate kaaˈlitannosi.

•  Yihowa Farciˈraasine muˈre qaaqquulle cuuˈannoni?

•  Yihowa Farciˈraasine oosonsa cuuama gibburo fiile hooˈlitannoni?

•  Yihowa Farciˈraasine sabbakkanno woyite oosonsa haadhe fultannohu mayiraati?

•  Yihowa Farciˈraasine ayyaanna ayirrissanno?

•  Yihowa Farciˈraasine ikkite lophitinorira mayi macciishshamannonsa?

 Dicuuˈanno. Muˈre qaaqquulle cuua Qullaawu Maxaafi rosi ledo sumuu diyitanno. Lawishshaho, Qullaawu Maxaafi umi xibbi diri Kiristaani cuuamara albaanni kulloonninsa sokka hagiirrunni “macciishshe” adhe maaro einota kulanno. (Soqqamaasinete Looso 2:14, 22, 38, 41) Konnira mittu manchi cuuamate, Qullaawu Maxaafi roso seekke huwata, ammananna rosino garinni heeˈra hasiissannosi daafira, qaaqqimma gudinoha ikka hasiissannosi. Muˈru qaaqqi qole tenne assa didandaanno.

 Qaaqquullu lophituhu gedensaanni cuuama doodhitara dandiitanno. Ikkollana, assitanni noori shaaˈˈare ikkinokkita huwata hasiissannonsa.

 Dihooˈlitanno. Yihowa Farciˈraasine oosonsa insa ammaˈno harunsa hoogguro dadillitannoha ikkirono, oosonsa baxxanno, hattono insa Yihowa Farciˈraasine ikka gibbinohura calla fiile dihooˈlitanno.

 Sabbankeemmo woyite qaaqquullenke haaˈne fulleemmo gede assannonkehu duuchu korkaati no. a

•   Qullaawu Maxaafi annuwunna amuuwu oosonsara Maganu daafira rosiisanna iso magansidhanno gede qajeelsa hasiissannonsata kulanno. (Efesooni Sokka 6:4) Ammananke mannu albaanni farciˈra magansiˈra ikkitinohura, annuwunna amuuwu oosonsa qajeelsate farcidhanno garano rosiisa hasiissannonsa.—Roomu Sokka 10:9, 10; Ibiraawoota 13:15.

•   Qullaawu Maxaafi ooso “Mootichu suˈma guwissanno” gede xawise kulanno. (Faarso 148:12, 13, Kingi Jeemsi Vershiini) Magano guwinseemmoti qara doogo isi daafira wolootaho kulate. b

•   Qaaqquullu anninsanna amansa ledo sabbakansa lowore kaaˈlitannonsa. Lawishshaho, insa duuchunku gari manni ledo hasaambanni gara rossanno; hattono kaajja akatta lawishshaho, shaqqille, danchumma, manna ayirrisanna baxille leellisha rossanno. Ammanansara xinta ikkitino qummeeshshuwano seekkite egentanno.

 Yihowa Farciˈraasine Magano hagiirsiissannokki ayyaanna diayirrissanno. c (2 Qorontoosi 6:14-17; Efesooni Sokka 5:10) Qullaawu Maxaafi aana xintantinokki ayyaanna lawishshaho, ilammoonni barra woy Ganna diayirrinseemmo.

 Ikkollana maatenke ledo yanna sayisanna qaaqquullinkera mitore aa hagiirsiissannonke. Ninke ayyaana agarre calla ikkikkinni woˈmanka woyite maatenke ledo gamba yineemmo hattono mimmitoho mitore uyineemmo.