Mite Qullaawu Maxaafi tiro giddo mito bayicho, “sioole” yaanno qaali no. (Faarso 16:10; Soqqamaasinete Looso 2:27 a) Batinyu manni, aleenni misilete aana laˈneemmohu gedeehu sioole yinannihu bushuullu hegerera giirantanno bayichi no yee ammananno. Qullaawu Maxaafi hatto yaannoyya?

Konni birxichira

•  Sioole hegerera giirammanni bayichooti?

•  Dureessu manchinna Aliaazaari daafira kultanno masalona?

•  Sioolete yaa Maganuwiinni badamate?

•  Siooletenni fulinohu nooni?

•  Sioolete woy Waammate daafira kultanno qummeeshshuwa

•  Bushuullu sioolete giirantanno yaanno rosi mamiinni dayinoho?

 Deeˈni. Mite Qullaawu Maxaafi tiro giddo “sioole” yine tirroonniti hunditi Ibiraawootunna Giriikete qaalla (Ibiraawoota, “Shiooli”; Giriike, “Hadesi”) tironsa “Waammate” yaate; hattino mannu baalunku eanno waammaati. Qullaawu Maxaafi kulanno garinni, “Waammate” giddo noori wolewa marte heedhanni nooha diˈˈikkino.

•   Reyitinori mittoreno diaffanno; hakko daafira xissiisannonsari dino. “Reyittohu gedensaanni marattowa loosu, hedo, egennonna hayyo dino.” (Rosiisaancho 9:10) Sioole mannu qarru giddo heeˈre raaranno bayicho diˈˈikkitino. Hatteentenni, Qullaawu Maxaafi “Bushuullu kayinni saalfatto; jeennaate [sioole] eˈe sammi yito” yaanno.—Faarso 31:17; 115:17.

•   Maganu fushshino wodho garinni, cubbu qorichi reyote ikkiina sioolete giirama diˈˈikkitino. Maganu umi manchira Addaamira, Maganu seera diigiro adhanno qorichi reyo ikkinota kulinosi. (Kalaqama 2:17) Hegerera sioolete giiramatto diyiinosi. Addaami cubbo loosihu gedensaanni, Maganu iso ma garinni qorichishannoro kulanni “Ati bushshahona, galagalte bushsha higatto” yiinosi. (Kalaqama 3:19) Isi reyihu gedensaanni Addaami yinanniri diheeˈranno yaate. Maganu iso sioolete giirannoha ikkoommero, tenne balaxe kulannositi egennantinote. Hakkuyi kawano Maganu seerasi diiggannore qorichishanno gari disoorramino. Addaami cubbo loosihunni lowo diri gedensaanni, Maganu ayyaanisinni togo yine borreessinanni gede assino: “Cubbu laalchi reyote.” (Roomu Sokka 6:23) “Reyino manchi cubbu anganni fulinoha ikkinohura” reyo agurranna wolu qorichi dino.—Roomu Sokka 6:7.

•   Manna hegerera giira Maganu shagaggiˈranno coyeeti. (Ermiyaasi 32:35) Togoo assooti “Maganu baxilleho” yaannohu Qullaawu Maxaafi rosi ledo sumuu diyaannoho. (1 Yohaannisi 4:8) Maganu hegerera sioolete giirannonke yine waanke ikkikkinni iso banxe magansiˈnammosira hasiˈranno.—Maatewoosi 22:36-38.

•   Danchu manni sioole eino. “Sioole” yaanno qaali nooti Qullaawu Maxaafi tiro leellishshannonte gede, ammanamino manni lawishshaho Yaiqoobinna Iyyoobi sioole haˈneemmo yite heddino. (Kalaqama 37:35; Iyyoobi 14:13) Wole agurina Yesuusi Kiristoosi nafa reyinna reyotenni kai yanna mereero sioolete keeshshinota xawinsoonni. (Soqqamaasinete Looso 2:31, 32) Tennenni huwata dandiineemmonte gede, tenne Qullaawu Maxaafi tiro giddo “sioole” yaanno qaale horoonsiˈnoonnihu Waamma kulateeti.

 Luqaasi 16:19-31 borreessinoonnita tenne masalo coyiˈrinohu Yesuusaati. Masalo woy lawishshu amanyootu wodhonna Maganu hedo wodanchineemmo gede kaaˈlannonke. Dureessu manchinna Aliaazaari daafira kultanno masalo addinta ikkino coye diˈˈikkitino. (Maatewoosi 13:34) Tenne masalo daafira ledde afate, “Dureessu Manchinna Aliaazaari Ayeooti?” yaanno birxicho nabbawi.

 Deeˈni. Reyino mannira Maganuwiinni baxxinoti leeltannonsa yaanno rosi Qullaawu Maxaafi yaannori ledo sumuu diyaanno; mayira yiniro, Qullaawu Maxaafi yaanno garinni, reyitinori mittoreno diaffanno.—Faarso 146:3, 4; Rosiisaancho 9:5.

 Ee no. Qullaawu Maxaafi Waamma (mite Qullaawu Maxaafi tiro yitanno garinni “sioole”) eˈˈe kae wirro lubbote heeˈrinohu honsu manni noota kulanno. b Kuni manni sioole einoti leeltinonsaha ikkoommero, hakko tuncu yiinonsare mannaho kulanno. Kayinnilla honsunku manni giddo mittuno sioolete giira eˈnoommo woy togoori iillinonke yite coyidhinori dino. Mayira? Qullaawu Maxaafi duucha basera kulannonte gede, kuni manni hatte yannara natare “goxino” manchi gede ikke noo daafira mittoreno diafino.—Yohaannisi 11:11-14; 1 Qorontoosi 15:3-6.