Dihasiissannohe. Qullaawu Maxaafi, Yesuusi suˈminni Magano calla huucciˈra hasiissannonketa kulanno. Yesuusi rosaanosi togo yiino: “Kunnira kiˈne, ‘Annanke Gordoho heeˈrattohu, suˈmikki qullaawa ikko’ [yitine huuccidhe].” (Maatewoosi 6:9) Yesuusi rosaanosi Magano agurranna qullaawoota manna, sokkaasine, woy wole ayeno huuccidhara dirosiisino.

 Qoleno Yesuusi harunsaanosira togo yiino: “Doogono, halaaluno, heeshshono aneeti. Ane widoonni ikka hoogiro, ayino Anniˈyawa daannohu dino.” (Yohaannisi 14:6) Ninke Maganu ledo xaadisanno gede Maganu shoominohu Yesuusa callaati.—Ibiraawoota 7:25.

Maganono huucciˈranni heeˈrenni qullaawoota huucciˈrummorona?

 Maganu Tonne Hajajo uyi woyite mittete giddo, “Ani hinaasaancho Maganooti” yiino. (Fulo 20:5) Maganu “hinaasaancho” ikkinohu ma doogonniiti? Niwu Ameerikaan Bayibili yinanni tirora lekkaalliidi qaagiishshira noo hedo, Maganu “iso calla magansiˈnara hasiˈrannota” kultanno. Maganu magaˈno baalanta (tenne giddo mitte huuccattote) isira calla shiqinshara hasiˈranno.—Isayaasi 48:11.

 Iso agurre qullaawoota woy qullaawa sokkaasine huucciˈneemmoha ikkiro Maganu koffi yaanno. Soqqamaasinchu Yohaannisi sokkaasincho magansiˈrara kai woyite, sokkaasinchu togo yee giwino: “Qorophi togo ikkitooti! Anino atenna Yesuusi uyino halaale amaddinori roduuwikki ledo soqqamaanchootina, Magano magansiˈri!”—Yohaannisi Ajuuja 19:10.