Ee, hasiissanno; mayira yiniro, Maganu mannu iso gamba yee mitteenni magansiˈrara hasiˈranno. Qullaawu Maxaafi togo yaanno: “Baxille afiˈratenna dancha looso loosate mimmitonke kakkayinso. . . . Ronsoommoha xaadonke agurroonke.”—Ibiraawoota 10:24, 25.

 Yesuusi harunsaanosi, “Mereeroˈne baxillu heeˈriro rosaanoˈya ikkitinoonnita mannu baalunku konninni afanno” yaasi insa qinaabbino gaamo ikkitannota leellishshanno. (Yohaannisi 13:35) Kiristoosi rosaano konne baxille leellisha dandiitannote qara doogga giddo mitte, ammanate roduuwinsa ledo gamba yaate. Insa ganyite mitteenni gamba yite magansiˈrate songuwa xinta hasiissannonsa. (1 Qorontoosi 16:19) Songuwa mitteenni alamete doyichoha roduuwu maamara ikkitanno.—1 Pheexiroosi 2:17.

Mitte ammaˈno miila ikkatenni sainore assa hasiissanno

 Qullaawu Maxaafi mannu Magano magansiˈrate gamba yaa hasiissannonsata kulanno; hatto yaa kayinni mittu manchi mitte ammaˈno miila ikkino daafira calla Magano hagiirsiisanno yaa diˈˈikkino. Mittu manchi Magano hagiirsiisa hasiˈriro, ammaˈnosi yitanno garinni heeˈra hasiissannosi. Lawishshaho, Qullaawu Maxaafi togo yaanno: “Maganu Annu albaanni keeraanchonna battaabbinokki ammaˈno: Annanna ama shiidhino ooso, hattonni galte shiiˈrino meento kaaˈla, tenne gobba [alame] ishinchiwiinni meessaneete agadhate.”—Yaiqoobi 1:27.