Qullaawu Maxaafihu jeefote maxaafi kulanno garinni, 666 kiiro lamalu uminna tonnu buudi noosihu baaru giddonni fulino moyichi suˈmaati. (Yohaannisi Ajuuja 13:1, 17, 18) Kuni moyichi alamennihu poletiku gashshooti lawishshaati; konni moyichira “gosate, gaˈretenna addi addi afiinni coyiˈranno manni baalu aana roorre” uyinoonnisi. (Yohaannisi Ajuuja 13:7) Konni moyichi suˈmi yaano 666, poletiku gashshooti Maganu albaanni mulla daafuro ikkinota leellishshanno. Hiittoonni?

  Mulla suˈma calla diˈˈikkino. Maganu fushshanno suˈmi tiro afiˈrino. Lawishshaho, Maganu Abiraami (“Annu Ayirradohonna Batiˈraho”) yinanni manchira, Abirihaami (“Lowo Manni Anna”) yinanni suˈma fushshino; hakkawote Maganu Abirihaamira “Lowo gosa anna asseemmohe” yee hexxo uyinosi. (Kalaqama 17:5, lekkaalliidi qaagiishsha) Hatteente gede, Maganu moyichoho fushshinohu 666 yinanni suˈmi moyichu akati hiittoohoro leellishannoho.

  Lee kiiro guuntete xeˈnera lawishshaho. Qullaawu Maxaafi giddo duucha bayicho kiiro lawishshu tiro afidhino. Lamala kiiro roore woyite woˈmilleho woy guuntete lawishshaho. Lamalate mitte xeˈinoti lee kiiro kayinni, Maganu albaanni xea ikkinore woy xeˈne afiˈrinore riqibbara dandiitanno; qoleno lee kiiro Maganu diinna ledo xaadooshshe afidhino.—1 Duduwo 20:6; Daanieeli 3:1.

  Sase hinge kulloonnihu luphi asse woy duure kulateeti. Qullaawu Maxaafi mitto coye duure kulate hakkonne coye sase hige yaanno woyiti no. (Yohaannisi Ajuuja 4:8; 8:13) Hakko daafira, 666 yinanni suˈmi, mannu oosohu poletiku gashshooti Maganu albaanni mulla daafuro ikkinota luphi asse kulannoho. Mannu gashshooti geedanno keerenna hobbaate abba didandaanno; konne assitannoti Maganu Mangiste callate.

Moyichu malaate

 Qullaawu Maxaafi, mannu “moyichu malaate” wodhannota kulanno; korkaatuno mannu konne moyicho “maalaˈlanni” hoodesi haˈranno, hattono iso magansiˈrate deerra iillanno. (Yohaannisi Ajuuja 13:3, 4; 16:2) Mannu gobbansara, gobbansa armira woy baandiirinsara, hattono gobbansa olantora magansiˈrate ledo taalo ikkino ayirrinye aansa tenne leellishshanno. Ze Insayikilopiidiya Ofi Riliijini yaanno garinni, “Yannankera meessi gobba bade baxa umose dandiitinota jawa ammaˈno ikkitino.”

 Mittu manchi moyichu malaate qiniiticho angara woy albaho wodhannohu hiittoonniiti? (Yohaannisi Ajuuja 13:16) Maganu Israeelete dagara uyino hajajo lainohunni togo yiino: “Malaate assidhine angaˈnera xaaxidhe; albiˈnerano usudhe.” (Marro 11:18) Hatto yaa, Israeelete daga addanka angansaranna albinsara malaate wodhitanno yaa ikkikkinni, assootinsanna hedonsa baalanti Maganu yiinori ledo sumuu yitanno yaate. Hatteente gede, moyichu malaate wodhanno manni 666 kiiro bisinsara malaatisiˈranno woy naqqasiˈranno yaa ikkikkinni, heeshshonsa woˈmatenni poletiku wodho harunsanno yaate. Moyichu malaate wodhanno manchi Maganoho baarigaara ikkanno.—Yohaannisi Ajuuja 14:9, 10; 19:19-21.