Masaalaanosi Widoonni Maganu Daafira Ronseemmo
Hunda Maganu, mannu oosora lowo geeshsha hasiissanno sokka masaalaanosi widoonni kulino. Hatti sokka Maganu aanno atoote afiˈneemmohu hiittoonniitiro kultanno? Ee kultanno. Hanni sase ammanantino masaalaanowiinni maa ronseemmoro laˈno.
ABIRIHAAMI
Maganu dimallaadannoho; qoleno mannu baalunku atootesi afiˈrara hasiˈranno.
Maganu masaalaanchu Abirihaamira, “Baattote aana heedhanno daga baalanti ate widoonni higge maassantanno” yee qaale eino.—Kalaqama 12:3.
Ninke maa ronseemmo? Maganu lowo geeshsha baxannonke; qoleno isira hajajamanno manna baalanka yaano labballono, meentono oosono maassiˈranno.
MUSE
Maganu maarannoho hattono iso afate sharrantannore maassiˈranno.
Woˈmanka Dandaanno Magani masaalaanchu Musera, lowo maalale loosanno gede wolqa uyinosi. Ikkirono Muse, “Afeemmohenna ate hagiirsiisanni heeˈreemmo gede, ballo doogokki rosiisie” yee huucciˈrino. (Fulo 33:13, NW) Maganu, Muse assiˈrino huuccatto hagiirsiissinosi daafira, albinni roore doogosinna akkattasi afanno gede asse maassiˈrinosi. Lawishshaho Muse, Kalaqaanchu ‘maarannohanna mararannoha’ ikkinota huwatino.—Fulo 34:6, 7.
Ninke maa ronseemmo? Maganu, iso albinni roore afate sharramanno manna baala yaano labballono, meentono oosono maassiˈranno. Qullaawu Qaalisinni, iso magansiˈneemmo garanna atootesi aankera quqquxamannota kulinonke.
YESUUSA
Yesuusi shaqqillunni baalanka dhibba hursino
Yesuusire, isi assinorenna rosiisinore ronseemmoha ikkiro, Maganu aannoha hegere atoote afiˈra dandiineemmo.
Maganu Qaali, Yesuusi heeˈrino heeshshonna rosiisino rosi daafira lowore kulannonke. Yesuusi dhagge ikkitannota lowo maalale loosanno gede Maganu wolqa uyinosi; isi balloota, danqootanna laanshaabbinore hursino. Isi reyitinore nafa kayisino. Yesuusi loosino maalale, Maganu albillitte manna baalaho abbanno atoote leellishshannote. Isi ninke mittu mittunku konne atoote afiˈra dandiineemmo gara kulanni togo yiino: “Hegere heeshshono, ati callu halaalaancho Magano ikkoottotanna soottoha Yesuusa Kiristoosa afate.”—Yohaannisi 17:3.
Yesuusi mararannohonna shaqqadoho. Yesuusi, “Anewiinni rosse. Ani joogahonna shaqqadoho; lubboˈnerano fooliishsho afidhinanni” yee koyisino koyishsha macciishshe, labballunna meentu hattono ajuno akkaluno isiwa dayino. (Maatewoosi 11:29) Yesuusi uullate aana noo waro mannu meento woffi assanno; isi kayinni shaqqille leellishinonsa hattono ayirrisinonsa.
Ninke maa ronseemmo? Yesuusi manna lowo geeshsha baxannota leellishino; ninkeno mimmito banxeemmo gede dancha lawishsha ikkinonke.
YESUUSI MAGANU BEETTOOTI
Qullaawo Borro, “mittu Magani Annu” noonketanna Yesuusi Kiristoosi Maganu soqqamaancho ikkinota kultanno. (1 Qorontoosi 8:6) Yesuusi, Maganu iso roorannotanna uullara soyinosihuno iso ikkinota xawise kulino.—Yohaannisi 11:41, 42; 14:28. *
^ GUFO 17 Yesuusi Kiristoosi daafira ledde afate, www.isa4310.com/sid aana noota Maganuwiinni Dayinoha Dancha Duduwo! yitanno biroshere roso 4 nabbawi.
Kurino Lai
QULLAAWU MAXAAFI XAˈMONNA DAWARO
Yesuusi Woˈmanka Dandaanno Maganooti?
Yesuusi ‘Ani Maganu ledo taaloho’ yiinoni?
