MANNU heeshshotenna reyote daafira duuchare coyiˈranno. Mitu mannira reyini gedensaanni wolu garinni wole bayicho haˈne heeˈnanniha lawannonsa. Mitu mannira qole, wolericho ikkine kalaqammanniha lawannonsa. Reyo baalunku coyi goofimarchooti yee hedanno mannino no.

Lossinoonnihenna budikki garinni, tenne hajo daafira umikki hedo heedhahera dandiitanno. Mannu reyote daafira hedannori duuchare ikkina, “Reyini gedensaanni hiikkinanni?” yitanno xaˈmora garu dawaro afiˈra dandiineemmohu ayewiinniiti? woy hiikkiinniiti?

Lowo xibbe diro ammaˈnote murrooti lubbo direyitanno yite rosiissanni keeshshitino. Baalanta qara qara ammaˈno lawishshaho, Kiristaanu, Hindete, Ayihudootu, Isilaamunna wole ammaˈno harunsanno manni, lubbo direyitanno yee ammananno; kuni manni maalu reyiro lubbo ayyaanaamittete alamera heedhanno yee hedanno. Budistete ammaˈno kayinni mannu duucha hige ilami gedensaanni, manchu giddo noo wolqa woy ayyaani lowo geeshsha hagiirsiisannowa Nirwaana yinanni deerra iillanno yite ammantanno.

Aleenni laˈnummo taje leellishshanno garinni, alamete aana noohu rooru manni, reyo wole alamera haˈne heeˈnanni faro fantanno yee ammananno. Batinyu manni reyo heeshshote doyichora hasiissannote yee hedanno, hattono Maganu kalaqinonkehu reyinammoraati yaanno. Ikkina Qullaawu Maxaafi tenne hajo daafira mayyaanno? Aane noo birxicho nabbawattora koyinsoommohe. Qullaawu Maxaafi qolanno dawaro dhagge ikkitahera dandiitanno.