ATINO DADILLISANNO COYE LAˈˈATTO WOYITE, ‘MAGANU SAMMI YEE LAˈˈANNOHU MAYIRAATI?’ YITE HEDDE EGENNOOTTO? WOY ATE UMIKKIRA IILLINOHEHU BUUTOTE QARRI ‘ISI MAGANU ANE DAAFIRA HEDANNO?’ YITE XAˈMATTO GEDE ASSINOHE?

Aterano Ameerikaho heedhannote Sheela gede ikke macciishshamannoheha ikkara dandaanno. Sheela ammaˈnote laalaattanno maate giddo ilantinote. Ise togo yitino: “Maganu Kalaqaanchonke ikkino daafira, anjeˈyanni kayise isiwa shiqqi yaa hasiˈreemma. Ikkirono isiwa shiqqi yoommaha dilawinoe. Isi ane laˈˈannoeha lawannoe; ikkirono laˈˈannoehu xeertote heeˈreeti. Maganu giwannoe yee dihedeemma; ikkollana isi ane daafira hedannoha dilawannoe.” Sheela Maganu baxannoseta huluullantinohu mayiraati? Ise togo yitino: “Maateˈyara hoode hoodete buutote qarri iillinonsa; hatte yannara Maganu hoˈro kaaˈlinonkeha dilawinoe.”

Sheela gede atino Woˈmanka Dandaanno Magani noota ammanattoha ikkirono, isi baxannoheta huluullamattoha ikkara dandaanno. Maganu wolqaataamonna hayyicha ikkinota ammanannohu keeraanchu manchi Iyyoobino huluullamino woyiti no. (Iyyoobi 2:3; 9:4) Iyyoobira qarru biitete gede ikke dirrisi gedensaanni isi hexxo mudhe Maganoho togo yiino: “Albakki anewiinni shawwu assitooti; diinu gede assite mayira laˈˈattoe?”—Iyyoobi 13:24.

Tenne haja daafira Qullaawu Maxaafi mayyaanno? Iillannonke qarrira xaˈmamannohu Maganohoni? Maganu mannu ooso woˈmatenna mittu mittunku manchira hedannota leellishshanno taje no? Maganu ninke mitto mittonka afinota, isira qarrinke leellannosita, hattono isi mararannonketanna qarrinke yannara kaaˈlannonketa afa dandiineemmohu hiittoonniiti?

Konninni aante noo birxichuwara Maganu kalaqinori Isi ninkera hedannota leellishannohu hiittoonniitiro ronseemmo. (Roomu Sokka 1:20) Hakkiinni Qullaawu Maxaafi Maganu mannu oosora hedannota buuxisannonke gara laˈneemmo. Maganu kalaqinore laˈenna Qaalesi nabbabbe Iso ‘egennitanni’ haˈrittoro, isi ate daafira hedannota albinni roore buuxatto.—1 Yohaannisi 2:3; 1 Pheexiroosi 5:7.