Batinyu manni ‘Magano ammannoommo’ yaanno. Insa ‘Maganu ayeti?’ yine xaˈminanninsa woyite kayinni babbaxxitino dawaro qoltanno. Mitootu ‘Maganu soˈro xinqisiisiˈranni qorichishannoho kaajjado daanyaati’ yitanno. Wolootu kayinni ‘Aye geeshshi soˈro loonsummorono Maganu gatona yaannonke, hattono woˈmante yannara baxannonke’ yite heddanno. ‘Maganu ninkewiinni xeertiˈrinohonna dimararannoho’ yite heddannorino no. Maganu daafira coyiˈnannihu kuni gurcheessanno coyi, batinyu manni ‘Maganu ayimma afa didandiinanni’ yee hedanno gede assino.

Maganu ayimma afa kaaˈlitannori no? Ee no. Maganu daafira halaale ikkinore afakki, heeshshokki hagiirraame ikkitanno gede assitanno. (Soqqamaasinete Looso 17:26-28) Maganunniwa shiqqi yiitto kiiro, isino atewa shiqqi yaanno, hattono kaaˈlannohe. (Yaiqoobi 4:8) Qoleno Maganu daafira gara ikkitino egenno afiˈrakki, hegere heeshsho afiˈratto gede kaaˈlitannohe.—Yohaannisi 17:3.

Maganu daafira afa dandaattohu hiittoonniiti? Hanni seekkite egennoottoha lubbote jaalakki hedi. Togoo jaalooma xintiˈroottohu hiittoonniiti? Suˈmasi, akattasi, baxannorenna giwannore, konni albaanni assinore, konni kaˈa assate hedinorenna wole isi ayimma xawisannore afoottoti egennantinote. Hakko manchiwa aanatto gede assitinoheti, isi daafira afakkiiti.

Hatteente gede, Maganu daafira afa dandaattohu isi daafira rosatenniiti; konnira aante noo xaˈmuwara dawaro afiˈra hasiissannohe:

• MAGANU SUˈMI AYETI?

• MAGANOHO HIITTI AKATTA NOOSI?

• MAGANU KONNI ALBAANNI MAA ASSINO?

• MAGANU ALBILLITTE MAA ASSANNO?

• MAGANU DAAFIRA AFAKKI KAAˈLITANNOHEHU HIITTOONNIITI?

Tini metseete, Qullaawu Maxaafi kuri xaˈmuwara qolanno dawaro amaddino. Tenne metseete giddo noo birxichuwa, Maganu ayimma afatto gede calla ikkikkinni, isi ledo muli jaalooma kalaqiˈra mayi hoˈro afidhinoro huwatatto gede kaaˈlitannohe.