“Kuri Yihowa Farciˈraasine mannaho calla ikkikkinni woshshiˈyara nafa danchare assitino. Mitto barra Ilaani yinanniti borrote gaare mule uurritino mancho lamu woshshiˈyara busukuute uyitino. Wole woyiteno hakkaa hige saeemmo woyite woshshu busukuute hasiˈranni insawa hige haˈra hanafi.

“Hakkiinni boode aganna saˈu. Woshshiˈya busukuute itanno; anino Yihowa Farciˈraasine ledo shiima geeshsha hasaawe kae haˈreemmo. Kayinni insa ledo lowore hasaawa dihasiˈroommo. Anera 70 diro saˈˈannoe; qoleno Yihowa Farciˈraasine mayite ammantannoro dibuuxoommo. Batinye ammaˈno assitannori hexxo mudheemmo gede assinoe daafira Qullaawa Maxaafa umiˈyanni xiinxalla woyyitanno yee hedoommo.

“Tenne yannara, wole Yihowa Farciˈraasineno katamu giddo addi addi bayicho borrote gaare mule uurrite noore laummo. Insano woˈmanka woyite faasiiqootaho. Qoleno xaˈmuwaˈyara dawaro Qullaawu Maxaafi giddonni qoltinoe; hakko daafira insa roore ammanoommo.

“Mitto barra Ilaani, ‘Saada Maganu uyinonke elto ikkitinota ammanatto?’ yite xaˈmitinoe. ‘Ee ammaneemmo!’ yee qolummose. Hakkiinni ise, Isayaasi 11:6-9 nabbabbinoe. Hakko barrinni hanafe Qullaawa Maxaafa xiinxalla hasiˈroommo; kayinni borronsa adha dihasiˈroommo.

“Hakkiinni aane noo barra, Ilaaninna minaannise Birenti ledo shiima yanna dancha hasaawa hasaamboommo. Insa addu Kiristaana ikkate maa assa hasiissannoro huwatate Maatewoosi maxaafinni kayise Soqqamaasinete Loosi maxaafi geeshsha nabbaweemmo gede amaaltue. Hakkiinni nabbawummo. Mulenni Birentinna Ilaani ledo Qullaawa Maxaafa xiinxalla hanafummo. Hatti yanna 2016nni arru woggaati.

“Lamalate kiiro Qullaawa Maxaafa xiinxalleemmotanna songote gambooshshe haˈreemmo yanna quqquxame agadheemmo. Addanka Qullaawu Maxaafi kulannore rosanni noommo daafira lowo geeshsha hagiidhoommo. Mittu diri gedensaanni cuuame Yihowa Farciˈraasincho ikkoommo. Xa anera 79 diro ikkannoe; qoleno addu ammaˈno afiˈroommo daafira tashshi yiinoe. Yihowa heeshshonsa isira sayisse uyitino maatesi wido ikkeemmo gede asse maassiˈrinoe.”