Yaaddo a amaddino mancho hedatto woyite, waajje wolqa bainoha, soodo maˈnanni kaˈˈa gooddo ikkitinosiha woy woˈmanka woyite qarrisi daafira calla hasaawanno mancho hedattoha ikkara dandaanno.

 Yaaddo amaddinohu mitu manni hatto ikkara dandaanno. Ikkollana xiinxallaano, mitu manni hakko iso labballu yaaddo amaddannonsa woyite wole akata leellishshannota buuxxino. Mitte rippoorte kultanno garinni, labballu “yaaddo gargadhate roore anga agohonna jingilli assitanno xaggara higganno; hakko daafira, mitto mancho agu araado qarrissannosiha ikkiro, tini quwa saˈino yaaddo noosita leellishanno malaate ikkitara dandiitanno. Qoleno duucha woyite labballu yaaddo amaddannonsa woyite hanqitanno, hattono caaccaabbanno.”

 Hige yaaddo amaddino labballi baalunku hatto ikkanno yaa diˈˈikkino. Mannu yaaddo amadduro ikkanno gari babbaxxinoha ikkirono, xaa yannara yaaddo roore batidhino; korkaatuno heeˈnoommohu “qarrissanno yanna” giddooti. (2 Ximootewoosi 3:1) Yaaddo amaddinoheha ikkiro, Qullaawu Maxaafi kaaˈlannohe?

 Qullaawu Maxaafi giddo yaaddo gargadhate kaaˈlitannoti lowo amaale no. Hanni kuri giddo sase laˈno.

1.  1. “[Gaˈi] umisira yaadannona, gaˈara yaaddinoonte. Mittu mittunku barrira umisi qarri ikkannosi.”—Maatewoosi 6:34.

    Hatto yaa mayyaate? Albillitte ikkarano hoogarano dandaanno coyira quwa saˈne yaada dihasiissannonke. Duucha woyite, ikkanno yine yaandoommohu bushu coyi ikkikki gatanno. Mito woyite isinni, waajjinoommo coyi soorrame dancha ikkanno.

    Togo assate woˈnaali: Konni albaanni ikkanno yite waajjite heedheenna ikkikki gatino coye qaagate woˈnaali. Hakkiinni, xa yaachishanni noohe coyi daafira, ‘Kuni coyi addinta ani hedummo gede lowo qarra kalaqara dandaanno?’ yite hedi.

2.  2. “Siwiilu siwiila gamaxannonte gede, mannuno manna gamaxanno.”—Lawishsha 27:17.

    Hatto yaa mayyaate? Wolootu kaaˈlitankera maahoyye yinummoro, yaaddo qeeˈlineemmo gede kaaˈlitankera dandiitanno. Insa heeshshonsa giddo laˈino coyinni, kaaˈlitanno amaale uyitankera dandiitanno. Ajayi ajeenna, yaachishinonke coye wolu garinni laˈneemmo gede kaaˈlitankera dandiitanno.

    Togo assate woˈnaali: Dancha amaale aahera dandaanno manchi ayetiro hedi; hakko iso atera iillinohe qarri iille egenninosiha ikkiro roore kaaˈlahera dandaanno. Isira kaaˈlinosiri maatironna kaaˈlinosikki coyi maatiro xaˈmi.

3.  3. “Kiˈnere malannohu isootina [Maganohona], qarrisannoˈnere baala isi aana tuqqe.”—1 Pheexiroosi 5:7.

    Hatto yaa mayyaate? Maganu qarrante yaaddanni noore lowo geeshsha mararanno. Isi yaachishannonke coye baala huuccattotenni isira kuˈlinammora koyisinonke.

    Togo assate woˈnaali: Yaachishanni noohe coye baalanka borreessi. Hakkiinni, mitto mittonka qarra Maganoho xawisse kultanni, dandiite heeˈratto gede kaaˈlahera huucciˈri.

 Qullaawu Maxaafi yaaddo gargadhate kaaˈlitanno amaale oye calla diaguranno. Xaa yannara yaachishannonke coyi baalunku muli yannara hegerera baˈˈannotano kulanno. Kuni ikkannohu hiittoonniiti?

 Maganu Gashshooti yaaddote kaima ikkannore hunanno. (Yohaannisi Ajuuja 21:4) Isinni hakkunni Gashshooti yannara, yaandeemmo gede assinonkere qaange dixissiisiˈneemmo.—Isayaasi 65:17.

 “Keere aanno Magani” atino hattee heeshsho ragiˈrattora hasiˈranno. (Roomu Sokka 16:20) Isi togo yee hexxo uyinonke: “Kiˈnera hedeemmore ani egennoommo; hedoˈyano hexxonna albillittete ikkitannoˈne gede, keerunnite ikkinnina bunshennita diˈˈikkitino.”—Ermiyaasi 29:11.