Alamete aana kuˈu koˈoye giwannohu, hattono wole xissiisannore coyiˈranno woy assanno manni batiˈrino; qoleno wole gaˈre wido ikkitinore bade gawajjanno. Oluno halaˈlino. Tuqu xaadooshshira togoo odoo batidhino.

•   “Israeeletenna Gaaza mereero kaino olinni hattono shittunna finqilu manninni kainohunni, xaa yannara gibbo halashshannore coyiˈra dagoomittete miidiyi aana albinni roore lexxitino.”—Ze Niwu Yoorki Tayimis, Bocaasa 15, 2023.

•   “Birra 7 kawa, alamete aana mimmito giwanno manni, woloota gawajjannore coyiˈranno manni, hattono wole gaˈre bade sianno manni lowo geeshsha lexxino.”—Deenisi Firansis, Buusantino Mangistubba Dirijjite Xaphoomu Shongo prezidaante, Bocaasa 3, 2023.

 Hige mannu wole gawajjannore coyiˈransa, finqilansanna olamansa wosincho coye diˈˈikkitino. Isinni Qullaawu Maxaafi biˈree waro ‘harfaamu afiinni maxxu gede qasannore’ coyiˈranno manni, hattono olanna finqille baxanno manni noota kulanno. (Faarso 64:3; 120:7; 140:1) Ikkollana Qullaawu Maxaafi yannankera mannu mimmito giwansa baxxitino tiro afidhinota xawisanno.

 Yannankera mannu mimmito giwanno gede assinohu lamu korkaati noota Qullaawu Maxaafi xawise kulanno.

1.  1. “Lowo manni baxilli qiidanno” yanna daggannota balanxe masaalloonni. (Maatewoosi 24:12) Duuchu manni baxillunkunni roore gibbo halaˈlitanno gede assanno akata leellishanno.—2 Ximootewoosi 3:1-5.

2.  2. Yannankera alamete aana mannu mimmito togo giwannohu Sheexaanu Daawuloosi xagarronna bunshenni kainohunniiti. Qullaawu Maxaafi kulanno garinni, ‘alame gudisidhe bushu anga no.’—1 Yohaannisi 5:19; Yohaannisi Ajuuja 12:9, 12.

 Ikkollana, Qullaawu Maxaafi Maganu muli yannara mimmito giwate kaima ikkinore hunannotano kulanno. Qoleno togoo giwa abbitino gawajjo baalantano Maganu mulenni dhaawanno. Qullaawu Maxaafi togo yee hexxo aannonke:

•   Maganu “hindiiddo baala illensanni feyanno; albi ikkito saˈino daafira, reyo woy dadillu woy wiˈla woy shetto kunni kaˈa diheedhanno.”—Yohaannisi Ajuuja 21:4.