Xaa yannara, Yihowa Farciˈraasine elektirooniksete uduunni widoonni ayyaanaamittete sagale albinni roore afidhanni no. Ikkollana, batinye gobbuwara heedhanno roduuwinkera Interneetete baaxxitanno woxi dinonsa. Wolootu roduuwinke heedhannohu kayinni, Interneete baˈanni qarrissannowa, dunkitannowa woy horonta Interneete nookkiwaati.

 Ikkirono, xa batinyu roduuwinke Interneete nookkiha, elektirooniketenni qixxeessinoonni borronna viidiyo dirrisiˈra dandiitanno. Kuni ikkinohu hiittoonniiti?

 Interneete qarrissanno qooxeessira noo songuwa kaaˈlate, JW Boksi yinanni uduunnicho qixxeessinoonni. Konne uduunnicho mitte daddalu dirijjitewiinni hirroonni; qoleno Beeteelete nooti Kompiyuterete Kifile qixxeessitino sooftiweerenna jw.org aana fultino borronna viidiyo hogomboonni. Mittu uduunnichi waagi 75 Ameeriku doolaare balla ikkanno.

 Roduuwu Gambooshshu Addaraashe giddo silkensa woy taabileetensa JW Bokse ledo xaadisse borronna viidiyo dirrisidhanno. Keeshshinohu woy hakkeeshshi geeshsha waaga batiˈrinokkihu elektirooniksete uduunnichi noonsa roduuwi nafa JW Bokse horoonsiˈra dandiitanno. Ikkina songo Interneete afidhannokkiha ikkiro, JW Boksera haaro borronna viidiyo hogowa dandiinannihu hiittoonniiti? Sinu Biiro jw.org aana fulinoha haaro coye JW Boksera hogowate kaaˈlitanno filaashe (USB) yannate kiiro songuwate sokkanno; mitte mittente filaashe waagi mite 4 Ameeriku doolaare ikkanno.

 JW Bokse roduuwinkera kaaˈlitinohu hiittoonniiti? Kongo Dimokiraatiki Rippaabilikete heeˈrannohu Naatani Andiruwaadira yinanni anni togo yiino: “‘Yihowa, Ate Addaxxoommo’ yaannohanna Looxi Galte Qaagge yaanno diraama dirrisiˈrate lowo yanna woˈnaalanni keeshshoommo. Ikkollana dirrisiˈra didandoommo; hakko daafira hexxo mudhoommo. Xa kayinni tenne viidiyubba silkeˈyara dirrisiˈra dandoommo; tini oosonke dancha gede rosiisiˈneemmo gede kaaˈlitinonke.”

 Nayijeeriyaho songuwate JW Bokse biddi assa kaaˈlanno rodii togo yiino: “Roduuwu JW Bokse Yihowa uyinonke eltooti yite heddanno. Xa Rosiisate Horoonsiˈneemmo Borro giddo noo borronna viidiyubba dirrisiˈra dandiitino daafira lowo geeshsha hagiidhitino.”

 Xaa geeshsha Afirikaho, Oshiiniyahonna Wodiidi Ameerikira heedhanno roduuwira 1,700 saˈannota JW Bokse sonkoonni. Xaano wole batinye songuwara soyate qixxeessinanni heeˈnoonni. Konne uduunnicho qixxeessate woxe afiˈneemmohu mamiinniiti? Alamete doyicho loosira fushshinanni fushshonniiti; tenne fushsho giddo roore anga fushshinannihu donate.isa4310.com widoonniiti. Shaqqillunni fushshitinanni fushshora galanteemmoˈne.