“Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue.”​—AROMAIN 5:12.

Na temps so Nzapa acréé kozo babâ na mama ti e, Adam na Ève, pensé ti ala nga na terê ti ala ayeke mbilimbili-kue. Lo zia ala na yâ ti mbeni pendere paradis so a iri ni yaka ti Éden. Lo tene lani na ala so ala peut ti te lê ti keke kue ti yaka ni, me gï mbeni oko la ala doit ti te ni ape. Ye oko, Adam na Ève asara siokpari na lege so ala soro lani ti te lê ti keke ni so (Genèse 2:15-17; 3:1-19). Na peko ti kengo yanga so, Nzapa atomba ala na yâ ti yaka ni nga gigi akpengba na ala. Ambeni ngoi na pekoni, ala dü amolenge, na gigi akpengba nga lani na amolenge ni. Ala kue akono, ala ga mbakoro na ala kui (Genèse 3:23; 5:5). E yeke tï kobela, e ga mbakoro nga e yeke kui ndali ti so e londo na lege ti Adam na Ève.

“Dunia so kue ayeke na gbe ti Zo ti sioni.”​—1 JEAN 5:19.

“Zo ti sioni” so, a iri lo Satan. Lo yeke mbeni ange so asara lani kpengbango-li na Nzapa (Jean 8:44; Apocalypse 12:9). Na pekoni, ambeni ange amû peko ti lo. A iri ala adémon. Asioni yingo so ayeke handa azo ti tene ala ke yanga ti Nzapa. Ala yeke handa azo mingi ti sara aye ti sioni (Psaume 106:35-38; 1 Timothée 4:1). Satan na adémon asara si azo abâ pasi na anzere na ala.

“Ye so mbeni zo ayeke lu, gï ni la lo yeke ko ni ande.”​—AGALATE 6:7.

Na alege nde nde, e kue e yeke bâ pasi ndali ti so e yeke mbilimbili-kue ape nga na ngangu so Satan ayeke sara na ndö ti dunia. Me na ambeni ngoi, azo wani la asara si ala yeke bâ pasi. Na lege wa? Ala sara ni na lege so ala yeke sara aye ti sioni wala ala mû asioni desizion, a sara si ala yeke bâ pasi. Na mbage, tongana azo asara aye ti nzoni, ala yeke wara aye ti nzoni na pekoni. Na tapande, mbeni koli ti wali wala mbeni babâ so asara ye na lege ni, lo sara kua ngangu nga lo ndoye azo ti sewa ti lo ayeke ga na aye ti nzoni na asara si sewa ni aduti na ngia. Me, mbeni babâ ti sewa so ayeke sara ngia ti nginza, lo nyon samba mingi wala lo ye kua ape apeut ti sara si lo nga na sewa ti lo aga wayere. A yeke na lege ti ndara ti mä Nzapa. Lo ye ti tene e wara gbâ ti aye ti nzoni, andu nga ti duti na ‘siriri mingi’.—Psaume 119:165.

“Na lâ ti nda ni . . . , azo ayeke duti ande azo so andoye gï terê ti ala wani, azo so andoye nginza, . . . azo so ake yanga ti ababâ na amama ti ala, . . . azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe.”​—2 TIMOTHÉE 3:1-5.

Laso, azo mingi ayeke sara ye gï tongana ti so Bible atene lani. Sarango ye ti ala akiri afa polele so e yeke na “lâ ti nda ni”. Bible atene nga kozo awe so na lâ ti nda ni, e yeke mä tënë ti abira, kota nzara, yengingo ti sese nga na akobela (Matthieu 24:3, 7, 8; Luc 21:10, 11). Aye so asara si azo ayeke bâ pasi mingi nga ala yeke kui.