NGBENE ye na ngu 1992, Bebungbi asoro ambeni ancien so aninga na kua ni nga so akpengba na lege ti yingo ti mû maboko na aita so ayeke na yâ ti akomite ti Bebungbi ti sara kua ti ala. * A-ancien so, so ayeke na popo ti “ambeni ngasangbaga”, ayeke mû maboko mingi na aita ti Bebungbi (Jean 10:16). Ala yeke sara réunion so komite so ala yeke sara kua dä ayeke sara ni yenga oko oko. Ala yeke mû asango na ndo ti ambeni ye nga ala yeke fa bango ndo ti ala na ndo ti ambeni ye. Aita ti Bebungbi la ayeke mû desizion na nda ni, na aita so ayeke mû maboko na ala ayeke sara ye alingbi na aye so ala fa nga ala yeke sara akua kue so a mû na ala ti sara. Aita ni ayeke voyagé legeoko na aita ti Bebungbi ti gue ti sara a-assemblée internationale nga na ambeni assemblée nde. A lingbi nga ti hunda na ala ti gue na iri ti kota ndokua ti e ti sara vizite na afiliale.

Mbeni ita-koli, so amû maboko na aita ti Bebungbi ngbene ye na ngu 1992, atene: “Na ngoi so mbi yeke sara akua so a mû na mbi, a yeke mû lege na aita ti Bebungbi ti zia li ti ala mingi na ndo ti kua ti ala.” Mbeni ita-koli, so amû maboko na aita ti Bebungbi teti ngu 20, atene: “A yeke mbeni kota pasa so ahon atanga ni.”

Aita ti Bebungbi amû akua mingi na aita so ayeke mû maboko na ala nga ala bâ na nene ni mingi ngangu kua so aita so ayeke sara. Zia e kue e ‘ngbâ ti bâ mara ti azo tongaso na nene ni mingi’.—aPhil. 2:29.