Genèse 8:1-22
8 Na peko ti ye so, Nzapa abi bê* ti lo na Noé, na anyama kue, atâa ti ngonda wala ti kodro, so ayeke na lo na yâ ti arche+ ni, na Nzapa asara si pupu aya na ndö ti sese, na ngu ni ato nda ti hule.
2 Yanga ti gbâ ti ngu so ayeke na lê ti nduzu, so a zi ni lani si ngu apika nga na ayanga ti yayu so a zi ni lani si ngu apika, a kanga ni, na tongaso ngu ni akaï ti pika.*+
3 Ngu ni ato nda ti hule na ndö ti sese, na a yeke kiri yeke yeke na gbe ni. Na peko ti lango 150, ngu ni akiri na gbe ni mingi.
4 Na mbasambala nze ni, na lango 17 ti nze ni, arche ni ague aluti na ndö ti hoto ti Ararat.
5 Ngu ni angbâ ti kiri yeke yeke na gbe ni juska na nze bale-oko ni. Na nze bale-oko ni, na kozo lango ti nze ni, li ti ahoto asigi.+
6 Na peko ti lango 40, Noé azi fenêtre+ so lo zia na terê ti arche ni so,
7 lo tokua mbeni corbeau na gigi; na corbeau ni angbâ ti huru, lo yeke gue lo yeke ga, juska ngu ahule na ndö ti sese.
8 Na pekoni, lo tokua mbeni kolokoto na gigi ti bâ wala ngu ni akiri na gbe ni mingi awe na ndö ti sese.
9 Kolokoto ni awara ndo ti duti dä* pëpe, tongaso lo kiri na mbage ti Noé na yâ ti arche ndali ti so ngu angbâ na ndö ti sese kue.+ Tongaso, lo yôro maboko ti lo, lo gbu kolokoto ni lo kiri na lo na yâ ti arche.
10 Lo ku lango mbasambala, na lo kiri lo tokua kolokoto ni na gigi ti arche.
11 Tongana kolokoto ni akiri na mbage ti lo na lakui, lo bâ so kugbe ti keke ti olive so lo fâ ni fini fini ayeke na yanga ti lo. Tongaso Noé ahinga so ngu ni akiri na gbe ni mingi awe na ndö ti sese.+
12 Lo kiri lo ku lango mbasambala, na lo tokua kolokoto ni, me kolokoto ni akiri na mbage ti lo encore ape.
13 Na ngu 601 ni,+ na kozo nze ni, na kozo lango ti nze ni, ngu ahule na ndö ti sese. Noé azi li ti arche ni ti bâ ndo, na lo bâ so ndö ti sese ayeke hule yeke yeke.
14 Na use nze ni, na lango 27 ti nze ni, sese ahule kue awe.
15 Fadeso Nzapa atene na Noé, atene:
16 “Sigi na yâ ti arche ni, mo, wali ti mo, amolenge ti mo ti koli na awali ti ala.+
17 Sigi na amara ti anyama nde nde kue:+ anyama so ayeke huru, anyama ti ngonda na anyama kue so ahara na ndö ti sese, tongaso si ala wu mingi* na ndö ti sese, ala dü, ala ga gbani na ndö ti sese.”+
18 Tongaso, Noé asigi, lo na amolenge ti lo ti koli,+ wali ti lo nga na awali ti amolenge ti lo.
19 Ye kue so ayeke na fini, anyama kue so ayeke hara harango, anyama kue so ayeke huru, aye kue so ayeke tambela na ndö ti sese, ala sigi na yâ ti arche ni alingbi na mara ti ala wani.+
20 Noé aleke mbeni gbalaka+ teti Jéhovah, lo mû ambeni nyama so a bâ ni tongana ye ti sioni pëpe nga na ambeni nyama so ayeke huru so a bâ ni tongana ye ti sioni pëpe,+ lo zö ni na ndö ti gbalaka ni na sandaga so a zö ni agbi kue.+
21 Jéhovah amä mbeni fion so afun nzoni na hôn ti lo.* Tongaso, Jéhovah atene na yâ ti bê ti lo: “Mbi yeke deba* sese+ ndali ti zo encore ape, teti abibe ti lo na bê ti lo ayeke gï na ndö ti ye ti sioni ngbene ye so lo de maseka.+ Nga, mbi yeke kiri encore ape ti futi aye kue so ayeke na fini tongana ti so mbi sara.+
22 Ti to nda ni laso, ngoi ti lungo ye na ngoi ti kongo ye, dê na ndowa, ngoi ti dê na ngoi ti ndowa nga bï na kota lâ+ ayeke ngbâ ande lakue na ndö ti sese.”
Akete tënë na terê ni
^ Na Hébreu: “adabe.”
^ Wala “a kanga lege na ngu ni.”
^ Wala “ti zia gere ti lo dä.”
^ Wala “ala ga gbani.”
^ Wala “adë bê ti lo.” Na Hébreu: “so asara si lo wu terê ti lo.”
^ Wala “iri sioni na ndö ti.”
