E kue e bezoin nzoni ngu si e ngbâ na fini. Me tongana ti so António Guterres so ayeke secrétaire général ti Nations Unies atene: “So wungo ti azo so ayeke na bezoin ti ngu na yâ ti dunia ayeke mingi ahon ti kozo, asara si warango ngu aga ngangu.” A yeke ngangu na azo milliard mingi na yâ ti dunia ti wara nzoni ngu ti nyon.

 Eskê mbeni lâ e kue e yeke wara ande ngu alingbi na bezoin ti e? Wala kpale ti warango ngu so e yeke na ni ayeke ngbâ ande gï tongaso? Bible atene nyen na ndö ni?

Zendo wa la Bible amû na ndö ti tënë ti warango ngu?

 Bible atene so mbeni lâ kpale ti warango ngu ayeke hunzi ande. Na ndö ni, nzoni ngu ayeke duti ande dä gbani.

 “Ngu ayeke sigi na ngangu na yâ ti benyama, nga angu ayeke sua na yâ ti kpangbala ndo so ayeke na yâ ti désert. Sese so ndowa asara si ahule ngangu ayeke ga ande lando so asosongo asigi dä, nga ndo so ngu ayeke dä pëpe ayeke si singo na ngu.”—Ésaïe 35:6, 7.

 Ngbanga ti nyen la e peut yeda na zendo ti Bible so? Bâ ambeni ye so Bible afa na ndö ti fason so a leke na sese.

Ye so Bible atene na ndö ti sese nga na ye so asara si ngu ayeke lakue dä

 ‘Nzapa aleke sese ti tene angbâ gï senge pëpe, me lo leke ni ti tene azo aduti dä.’—Ésaïe 45:18.

 ‘Nzapa agboto agoutte ti ngu na nduzu; agoutte ni aga ngu-nzapa nga na guru ti ngu; Na pekoni, mbinda asara si atï, na a pika na ndö ti azo.’—Job 36:27, 28.

 “Mbi yeke sara si ngu-nzapa apika na tâ ngoi ni, sese ni alë nga akeke alë.”—Lévitique 26:4.

 Nzapa amû lani zendo ti sara tufa na ndö ti azo ti Israël ti ândö so ayeke azo ti fango yaka, na mungo na ala ngu-nzapa si alê ti kobe ti ala alë mingi. Lo hinga so ti tene alê ti kobe alë, ala yeke na bezoin ti tene ngu-nzapa apika na tâ ngoi ni.

 Ye so Nzapa asara lani na azo ti Israël ti ândö so, na yâ ti kete ngoi lo yeke sara ni na ndö ti sese kue (Ésaïe 30:23). Me actuellement so, kpale ti warango ngu ayeke na ambeni ndo na yâ ti dunia nga problème ni angbâ gï ti gue na li ni; mbeni ye so ayeke na gunda ti problème ni ayeke so ngu ayeke pika ape. Ambeni ye wa la Bible atene na ndö ti solution ti kpale ti warango ngu so ayeke laso?

Tongana nyen la kpale ti warango ngu ayeke hunzi ande?

 Bible afa so na lege ti Royaume ti Nzapa, Nzapa ayeke leke ande akpale so ayeke na ndö ti sese, so andu nga kpale ti warango ngu (Matthieu 6:9, 10). Royaume ti Nzapa ayeke mbeni gouvernement so ayeke na yayu na ayeke komande ande sese kue (Daniel 2:44; Apocalypse 11:15). Na ndö ni, Royaume ti Nzapa ayeke sara ande ye so gouvernement ti azo ayeke na ngangu ti sara ape, so ti tene ti hunzi aye so ayeke na gunda ti kpale warango ngu.

 Problème ni: Changement ti climat ayeke mbeni ye so ayeke buba yâ ti ye so asara si ngu ayeke lakue dä. Ye so asara si ndo ahule ngangu, ngu ayeke pika mingi nga ngu-ingo asuku na asara si ngu asuku amû ndo.

 Solution ni: Royaume ti Nzapa ayeke leke ande akpale kue ti aye so angoro e tongaso si sese akiri aga tongana ti kozo. Nzapa amû zendo, lo tene: “Bâ, mbi yeke sara si aye kue aga fini.” (Apocalypse 21:5). Ngu ayeke duti ande gbani na ando so ahule ngangu, même na ando so ayeke ngangu ti tene aye asigi dä, aye ayeke maï ande dä nzoni (Ésaïe 41:17-20). Jésus Christ so ayeke Gbia ti Royaume ti Nzapa ayeke ande na ngangu na ndö ti aye tongana ngu nga na pupu.

 Problème ni: Azo so ayeke gbu li ape na ndö ti conséquence ti aye so ala yeke sara nga na andokua so aye nginza mingi ayeke buba akota ngu, alac nga na aréservoir ti ngu so ayeke na gbe ti sese, ye so la asara nga si kpale ti warango nzoni ngu ayeke dä.

 Solution ni: Nzapa ayeke sara ande si sese aga propre nga lo yeke zi ande asioni ye kue so ayeke na yâ ti angu, alac, angu-ingo nga na sese. Sese ayeke ga ande mbeni paradis. Na lege ti suma-tene, Bible atene: “Benyama nga na ndo so ahule ngangu ayeke duti ande na ngia mingi; kpangbala ndo ti désert ayeke duti ande na ngia, nga apendere fleur ayeke sigi dä gbani gbani.”—Ésaïe 35:1.

 Problème ni: Azo ayeke sara kua na ngu nzoni ape, ye ti pekoni ayeke so, ngu so ala buba ni ayeke mingi ahon ti so sese apeut ti produire ni.

 Solution ni: Grâce na Royaume ti Nzapa, a yeke sara ande ‘ye so bê ti Nzapa aye . . . na ndö ti sese’, me pëpe ye so bê ti azo so ayeke na bibe ti kion aye (Matthieu 6:9, 10). A yeke fa ye nzoni na azo so ayeke vivre ande na gbe ti Royaume ti Nzapa. Ésaïe 11:9 atene: “Hingango ye na ndö ti Jéhovah ayeke mû ndö ti sese kue”. a Tâ hingango ye so nga na ndoye so azo ayeke na ni na mbage ti Nzapa nga na aye kue so lo créé, a yeke pusu ande ala ti bâ lege ti pendere sese ti e nga na amosoro so ayeke na gbe ni nzoni.

•    Ti hinga ye mingi na ndö ti ye so Royaume ti Nzapa ayeke sara ande, bâ article “Nyen la Royaume ti Nzapa ayeke ga ande ti sara?”

•    Diko Ésaïe chapitre 35, na yâ ti Bible ti tene mo bâ tongana nyen la sese ayeke kiri ande ti ga paradis.

•    Bâ vidéo Ngbanga ti nyen Nzapa aleke sese? ti hinga ye mingi na ndö ti ye so Nzapa aleke na bê ti lo ti sara ndali ti azo nga na sese.