Siriri ayeke duti ande na ndö ti sese, me azo la ayeke ga na siriri ni so ape. Gï Royaume ti Nzapa, so ayeke gouvernement so Jésus la ayeke gbia ni si ayeke ga ande na siriri ni so. Bâ tënë so Bible atene na ndö ti pendere tënë ni so.

1.   Nzapa ayeke sara ande si “abira ahunzi na ndö ti sese kue”. Lo yeke sara si zendo so lo mû ti ga na ‘siriri na popo ti azo so Lo sara nzoni bê na ala’ aga tâ tënë!​—Psaume 46:9; Luc 2:14.

2.   Royaume ti Nzapa ayeke komande na yayu juska na sese (Daniel 7:14). So gouvernement ni ayeke komande ande sese kue so, a sara si tënë ti mara so ayeke mbeni ye so asara si azo ayeke tiri ayeke duti dä ape.

3.   A iri Jésus, so akomande na ndö ti Royaume ti Nzapa, “Mokonzi ti siriri.” Lo yeke sara kue si “siriri ayeke hunzi ande pëpe”.​—Ésaïe 9:6, 7.

4.   Ti azo so angbâ ti sara ye ti ngangu, Nzapa ayeke zia lege na ala pëpe ti duti na yâ ti Royaume ti lo, ndali ti so Nzapa ake “zo kue so aye sarango ye ti ngangu na zo.”​—Psaume 11:5; aProverbe 2:22.

5.   Nzapa afa na azo ti lo ye so ala yeke sara ti duti na siriri. Ye ti pekoni ayeke so wa? Bible atene: “Ala yeke pika a-épée ti ala si aga alê ti kpoka ti charrue nga ala yeke pika alikongo ti ala si aga azembe ti fango na amaboko ti keke. Mara ayeke mû épée na terê ti mbeni mara pëpe, nga ala yeke manda sarango bira encore ape.”​—Ésaïe 2:3, 4.

 A-Témoin ti Jéhovah kutu mingi na ndö ti sese ayeke manda ti duti na siriri (Matthieu 5:9). Atâa so e yeke ti amara nde nde na e yeke na yâ ti akodro ahon 230, e ke ti mû ngombe na terê ti amba ti e azo.