Ntsiku zino pisacitika pidengwa pyacibaliro pizinji kakamwe. Natenepa, cidengwa cingacitika, pasafunika kucitwa masasanyiro adidi kakamwe toera kuphedza abale na alongo adagwerwa na cidengwa. Na thangwi ineyi, Mathubo Akutonga akhazikisa m’mabheteli onsene Dhepartamentu Inaphedzera Pangacitika Cidengwa.

Abale anaphata basa mu dhepartamentu ineyi angabva kuti pacitika cidengwa, iwo asapita ncibverano mwakucimbiza na akulu a mpingo a mucisa cidacitika cidengwa toera kudziwa khala abale na alongo asafuna ciphedzo. Khala abale na alongo a mucisa ceneci nee anakwanisa kuphedza, abale a ku Bheteli anatumiza abale amaluso toera kutsogolera basa yakuphedza. Abale anewa adasankhulwa anakwanisa kuphemba abale na alongo anango toera kuenda kaphedzera peno kuphemba pinthu pinafuna iwo kuphatisira. Kusiyapo pyenepi, iwo anakwanisa kugula pinthu toera kuenda kapasa amwazi mphangwa adagwerwa na cidengwa.

Kucita pyenepi kusaphedza kakamwe. Thangwi pyenepi pisapungula basa, pontho pisaphedza toera pakhonde kubvungwa kobiri izinji, pinthu pyakuti pisacitika kazinji kene abale angaphedza okhene ale adagwerwa na cidengwa.

Abale adasankhulwa na Bheteli anakwanisa kuona kuti ndi kobiri ingasi inafunika, pontho ndi abale na alongo angasi anafunika toera kuphedzera. Iwo anakwanisambo kupita ncibverano na mautongi a dziko akuti kazinji kene asaphedza toera basa yathu ifambe mwadidi. Natenepa, nee tisafunika kuphemba kobiri kuna abale na alongo anango, kutumiza pinthu peno kuenda kumbuto idacitika cidengwa khala nee taphembwa toera kucita pyenepi.

Mwandimomwene, pangacitika cidengwa ife tisafuna kakamwe kuphedza. (Aheb. 13:16) Thangwi ife tisafuna abale na alongo athu. Mphapo tinacita tani pyenepi? Cinthu cakufunika kakamwe cakuti tinakwanisa kucicita ndi kuphembera thangwi ya abale na alongo adagwerwa na cidengwa pabodzi na ale anaphedza abale anewa. Ife tinakwanisambo kucita pyakupereka toera kuphedzera basa yathu ya pa dziko yonsene yapantsi. Na citsogolero ca Mathubo Akutonga, mafiliali anakwanisa kuona kuti kobiri ineyi inaphatisirwa kupi munjira yadidi kakamwe. Pontho khala musafuna kuperekeka toera kuphedzera, munakwanisa kuprenxeri Petição para Voluntário do Departamento Local de Desenho/​Construção (DC-50).

ONANI VIDHYU YA NSOLO WAKUTI INUNDAÇÕES DEVASTADORAS NO BRASIL, BULUKA PENEPO TAWIRANI MBVUNDZO UYU:

Ninji cinakudzumatirisani thangwi ya kuwangisira kudacita Mboni za Yahova toera kuphedza abale na alongo adadyiwa na madzi mu caka ca 2020 ku Brazil?