Yezu afokotoza kuti basi ene ndi ‘nkumbi ung’ono’ unatambira mbuto mu Umambo wakudzulu. (Luka 12:32) Mbwenye munthu angatambira cidikhiro ceneci asafunika kuwangisira kakamwe toera kutambira muoni unoyu. Yezu agomezera kuti munthu angafuna kucita khundu mu Umambo asafunika kukhala na maonero akulinganira.

Natenepa acenjeza anyakupfundzace toera akhale akukhunganyika mpaka kubwerera kwace. Iye alonga: ‘Bvalani mbamukhala akukhunganyika, pontho khalani na nyale zanu zakugaka. Musafunika kukhala ninga anyabasa anadikhira mbuya wawo anabwera buluka ku phwando yakumanga banja, toera angafika mbagogodza nsuwo, iwo akwanise kunfungulira mwakucimbiza. Anyakutsandzaya ndi anyabasa akuti mbuya wawo angafika anaagumana akuyang’anira!’—Luka 12:35-37.

Anyakupfundza abvesesa kuti Yezu akhalonga pya kukhala na maonero akulinganira. Anyabasa adalonga Yezu ali dzololo mbadikhira kubwerera kwa mbuya wawo. Yezu afokotoza: ‘Anyakutsandzaya ndiwo maseze mbuya wawo afike tcititciti peno m’madzongwe mbaagumana ali akukhunganyika!’—Luka 12:38.

Uphungu udapereka Yezu nee ukhagomezera basi ene kwa atumiki toera akhale aphinga, peno anyabasa adidi, thangwi Yezu wakuti ndi Mwana wa munthu aphatanizwambo mu citsandzo ceneci. Iye alonga kuna anyakupfundzace: ‘Imwembo khalani akukhunganyika, thangwi Mwana wa munthu anabwera pa ndzidzi unakhonda imwe kudikhira.’ (Luka 12:40) Pyenepi pikhapangiza kuti Yezu anadzabwera ntsogolo. Natenepa, iye akhafuna kuti atowereri ace, makamaka ‘nkumbi ung’ono’ ukhale wakukhunganyika.

Pedhru akhafuna kubvesesa mafala adalonga Yezu, natenepa iye ambvundza: ‘Mbuya, muli kulonga nsangani unoyu kuna ife basi peno kuna anthu onsene?’ Mbuto mwakuntawira basi Yezu alonga citsandzo: ‘Mwandimomwene mbani nyakuonera wakukhulupirika na wandzeru, wakuti mbuyace anadzan’khazikisa toera kutsalakana anyabasace na kuapasa cakudya cakukwana pa ndzidzi wakuthema? Nyakutsandzaya ndi nyabasa unoyu mbuyace angafika mban’gumana akucita pyenepi! Mwandimomwene ndinakupangani kuti iye anadzan’khazikisa toera kuonera pinthu pyace pyonsene.’—Luka 12:41-44.

Citsandzo cakutoma cisapangiza kuti ‘mbuya’ ndi Yezu Kristu, wakuti ndi Mwana wa munthu. ‘Nyakuonera wakukhulupirika’ ndi anthu anacita khundu ya ‘nkumbi ung’ono’ akuti anadzapaswa Umambo. (Luka 12:32) Natenepa, Yezu akhalonga kuti anthu anewa anadzapasa cakudya kuna ‘anyabasace’ onsene pa ndzidzi wakuthema. Pedhru na anyakupfundza anango adapfundziswa na Yezu na kuadyesa mwauzimu adzindikira kuti Mwana wa munthu mbadabwera kutsogolo. Mu ndzidzi unoyu, masasanyiro akupereka cakudya cauzimu kuna atowereri a Yezu, Mbuya wa ‘anyabasa’ onsene mbadatoma kuphata basa.

Yezu afokotoza ntsonga inango toera anyakupfundzace akhale akukhunganyika, pontho na maonero akulinganira. Thangwi iwo mbadakwanisa kudzudzumika mbatcinga abale awo. Yezu alonga: ‘Mbwenye nyabasa unoyu anganyerezera muntima mwace kuti, Mbuya wanga akudembuka kubwera, iye mbatoma kumenya anyabasa acimuna na acikazi, kudya, kumwa na kuledzera, mbuyace nyabasa unoyu anadzabwera pa ntsiku inakhonda iye kun’dikhira na pa ndzidzi unakhonda iye kudziwa, iye anadzantcunyusa kakamwe mbamponya ku mbuto ya anthu akukhonda khulupirika.’—Luka 12:45, 46.

Yezu alonga kuti iye abwera ‘kudzagasa moto pa dziko yapantsi.’ Pyenepi pyacitikadi, thangwi pikhalonga iye pikhacitisa anthu kuketesana, pontho pikhamalisa pipfundziso na misambo yakuipa. Pikhacitisambo anthu akuti akhafunika kukhala akufunana mbakhala akukhonda kubverana. Iye alonga:  ‘Baba nkhabe kudzabverana na mwanace wamamuna, mwana wa mamuna nkhabe kudzabverana na babace. Mama nkhabe kudzabverana na mwanace wankazi, mwana wankazi nkhabe kudzabverana na mace. Mebzwala nkhabe kudzabverana na nkwenyace, nkwenya nkhabe kudzabverana na mebzwalace.’—Luka 12:49, 53.

Mafala anewa akhaalonga makamaka kuna anyakupfundzace. Buluka penepo, Yezu alonga na mwinji. Anthu azinji nee akhatawira cidzindikiro cakuti Yezu akhali Mesiya. Natenepa, Yezu aapanga: ‘Mungaona khole ikubuluka kumadokero a dzuwa, penepo pene imwe musalonga kuti kunaoneka condzi, pyenepi pisacitikadi. Mungabva mphepo mbikamenya buluka kunterero, imwe musalonga kuti kunja kunapisa kakamwe, mbapicitikadi. Imwe apfakafaka, musakwanisa kudziwa mabvekero a pidzindikiro pya pa dziko yapantsi na kudzulu, mphapo thangwi yanji imwe nkhabe kwanisa kudzindikira mabvekero a pinthu pinacitika pa ndzidzi uno?’ (Luka 12:54-56) Pyenepi pikhapangiza kuti iwo nee akhali akukhunganyika.