Hi Dzrini Vito Dzra Xikwembu Nkulukumba? Xikwembu Nkulukumba a titivisa a ku: ‘Hi mine Yehovha, hi dzrone vito dzranga.’ (Ezaya 42:8) Vito dzra Xikwembu Nkulukumba dzri humelela hi makhambi ya kolomu ka 7.000 a Bibeleni. Nambitanu, ka wundzruluteli byinyingi bya Bibele vito ledzri dzri siviwe na swi nga fanelanga hi mavitanela ya ku fana ni lama liki “Hosi”. Xikwembu Nkulukumba a djula leswaku u va munghanu wakwe, xileswo a ku kutxa leswaku u ‘vitana vito dzrakwe’.​—1 Makronika 16:8.

Yehovha A Ni Mavitanela Manyingi. Bibele dzri kombisa leswaku Yehovha a ni mavitanela manyingi, ya ku fana ni lama liki “Xikwembu Nkulukumba”, “Lwa Nga Ni Mintamu Hinkwayu”, “Muvumbi”, “Tatana” ni “Hosi”. Ka swikhongoto swinyingi leswi tsraliwiki a Bibeleni, vhanu va khanele na Yene hi ku tizrisa vitanela dzra kukazri xikan’we ni vito dzrakwe hi ntshima ledzri liki, Yehovha.​—Daniel 9:4.

 Xivumbeko Xa Xikwembu Nkulukumba. Xikwembu Nkulukumba i moya. (Yohan 4:24) Bibele dzri li ‘a ku na mhunu lweyi a voniki Xikwembu Nkulukumba’. (Yohan 1:18) Nakone dzri hi pfuna ku tiva matitwela yakwe. Dzri kombisa leswaku vhanu va nga mu hlundzrukisa, kumbe va nga mu ‘tsrhavisa’.​—Amaproverbia 11:20; Amapsalma 78:40, 41.

Swihlawulekiso Swa Xikwembu Nkulukumba. Xikwembu Nkulukumba a nga na xihlawuhlawu, a yamukela vhanu va matiko hinkwawu ni tinxaka hinkwatu. (Amintiṛo 10:34, 35) Nakone a ni ‘timpswalu ni lizrezre, a hlwela ku hlundzruka, a yandzre vumbilu ni xihlayelamfuzri’. (Eksoda 34:6, 7) Kambe ka swihlawulekiso hinkwaswu swa Xikwembu Nkulukumba, ku ni mune wa swone leswi vonekaka ngopfu.

Ntamu. Leswi a nga ‘Xikwembu Nkulukumba lwa nga ni Mintamu Hinkwawu’, a ni ntamu wa ku hetisisa ntxhumu wun’wana ni wun’wana lowu a wu dumbisaka.​—Genesis 17:1.

Wutlhazri. Wutlhazri bya Xikwembu Nkulukumba byi tlakuke ngopfu ku tlula bya vhanu hinkwavu. Hi kola ka leswo, Bibele dzri kombisa leswaku ko va yene ntsena lwa tlhazrihiki.​—Ba-le-Roma 16:27.

Wululami. Minkama hinkwayu Xikwembu Nkulukumba a yentxa leswi nga swinene. Mintizro yakwe yi “hetisekile”, nakone a nga na wusomboloki.​—Deuteronoma 32:4.

Lizrandzru. Bibele dzri li ‘Xikwembu Nkulukumba i lizrandzru’. (1 Yohan 4:8) Leswo swi tlhamuxela leswaku Xikwembu Nkulukumba a nga kombise lizrandzru ntsena​—yene hi ntshima i lizrandzru. Lizrandzru dzrakwe ledzrikulu dzri mu susumetela ka hinkwaswu leswi a swi yentxaka, nakone leswo swi hi pfuna hi tindlela tinyingi.

Wuxaka Bya Xikwembu Nkulukumba Ni Vhanu. Xikwembu Nkulukumba i Tatana wezru wa lizrandzru lwa nga matilweni. (Mattheo 6:9) Loko hi kombisa lipfumelo ka yene, hi nga va vanghanu vakwe. (Amapsalma 25:14) A ntiyisweni, a ku zramba leswaku u tsrhindzrekela ka yene hi xikhongoto ni ku ‘txukumetela ku hlatiyela kwaku hinkwaku a henhla kwakwe, hikuva a zron’wa ha wene’.​—1 Petros 5:7; Yakob 4:8.

Yesu A Hi Xikwembu Nkulukumba. Yesu a hlawulekile swinene—hi yene ntsena lwa vumbiwiki hi Xikwembu Nkulukumba hi ku kongoma. Leswo hi swone swi yentxaka Bibele dzri mu vitana N’wana wa Xikwembu Nkulukumba. (Yohan 1:14) Ntsrhaku ka loko a vumbe Yesu, Yehovha a tizrise N’wana lweyo wa mativula swanga mutizri lwa nga ni wuswikoti  akuva a vumba vhanu ni mintxhumu yin’wana hinkwayu.​—Amaproverbia 8:30, 31; Ba-le-Kolosa 1:15, 16.

Yesu Kriste a ngi ngi hlaya leswaku yene i Xikwembu Nkulukumba. A matsrhan’wini ya leswo, a tlhamuxeli leswaku yene i muyimeli wa Xikwembu Nkulukumba, nakone a ku li Yene lwa mu zrumiki. (Yohan 7:29) Loko a khanela ni mun’we wa vadondzrisiwa vakwe, Yesu a vitane Yehovha swanga ‘Tatana wakwe ni Tatana wezru’ ni ‘Xikwembu Nkulukumba wakwe ni Xikwembu Nkulukumba wezru’. (Yohan 20:17) Ntsrhaku ka loko Yesu a file, Yehovha a mu pfuxile akuva a ya hanya tilweni nakone a mu tsrhamisise vokweni Dzrakwe dzra xinene a mu nyika wuhosi lebyikulu.​—Mattheo 28:18; Amintiṛo 2:32, 33.

Yesu Kriste A Nga Ku Pfuna Ku Va Ni Wuxaka Ni Xikwembu Nkulukumba

Yesu a te lani misaveni akuva a ta hi dondzrisa hi Tatana wakwe. Yehovha habyakwe a hlaye leswi mayelanu na Yesu: ‘Lweyi hi N’wananga lwa zrandzrekaka; mu yingelani.’ (Marka 9:7) Ku tlula mhunu wini na wini, Yesu a mu tiva ku yampswa Yehovha. Yene a te: ‘A ku na mhunu lwa tivaka . . . lweyi Tatana a nga yene, loko a nge N’wana ni lweyi N’wana a zrandzraka ku mu pfuletelela yene.’​—Luka 10:22.

Yesu a byi yetisela hi ku helela wumhunu bya Xikwembu Nkulukumba. Yesu a byi yetisele ha hombe wumhunu bya Tatana wakwe lakakuva a ku: ‘Lweyi a ndzri voniki, a voni Tatana.’ (Yohan 14:9) Hi ku yetisela ha hombe lizrandzru dzra Tatana wakwe hi mazritu ni hi swiyentxo, Yesu a a kokela vhanu ka Xikwembu Nkulukumba. A te: ‘Hi mi ndlela, ni xihlayelamfuzri ni wutomi. A ku na mhunu lwa taka ku Tatana loko ku nge ha mine.’ (Yohan 14:6) A tlhele a ku: ‘A vagandzreli lava nga vone [kumbe va ntiyiso] va ta gandzrela Tatana hi moya ni hi xihlayelamfuzri. Hikusa Tatana a djula vagandzreli lava ku nhato.’ (Yohan 4:23) Xana u sama u yanakanya hi leswo? Yehovha a djuletela vhanu va ku fana na wene, lava djulaka ku tiva ntiyiso mayelanu na yene.