Kombisa Lizrandzru Ka Walekwenu
Hinkwezru hi vana va Adamu, xileswo hi ndangu wun’we. Swizro swa ndangu swi fanela ku zrandzrana ni ku hloniphana, kambe leswo a hi swone hi swi vonaka namunhla wa siku. Leswo a hi swone leswi Xikwembu Nkulukumba wa lizrandzru a a swi djula ka vhanu.
I YINI LESWI MATSRALWA YA KU XWENGA MA SWI HLAYAKA MAYELANA NI LIZRANDZRU?
‘U ta zrandzra lwe u yakelaniki naye a xileswi u tizrandzrisaka xiswone.’—LEVITIKA 19:18.
‘N’wi khongotela lava n’wi xanisaka.’—MATTHEO 5:44.
SWI TLHAMUXELA YINI KU ZRANDZRA WALEKWENU?
Vona leswi Xikwembu Nkulukumba a swi hlayaka a Zritwini dzrakwe mayelanu ni lizrandzru ka 1 Ba-le-Korinte 13:4-7:
‘A lizrandzru li lehi mbilu; li ni wumbilu.’
Yanakanyisisa hi leswi: Xana u titwisa kuyini loko vhanu vambeni va ku lehisela mbilu nakone va nga hlundzruki loko u yentxa ntxhumu wa ku biha?
‘A lizrandzru a li na xikwele.’
Yanakanyisisa hi leswi: Xana u titwisa kuyini loko vhanu vambeni va ku kweleta kumbe va ku yentxela swa ku biha?
A lizrandzru ‘a li tidjuleli swa loni’.
Yanakanyisisa hi leswi: Xana u titwisa kuyini loko vhanu van’wana va hlonipha mavonela yaku a matsrhan’wini ya kuva va womelela ka leswi vone va pimisaka swone?
A lizrandzru ‘a li pimisi leswimfani’.
Yanakanyisisa hi leswi: Xikwembu Nkulukumba minkama hinkwayu a tiyimiseli ku dzrivalela vhanu lava yentxiki mintxhumu ya ku biha, kambe va tisolaka. ‘Xikwembu Nkulukumba a nga kaneti hi minkama hinkwayu, a nga bekisi mahlundzru yakwe hi laha ku nga helikikiki.’ (Amapsalma 103:9) Hinkwezru ha swi zrandzra ku dzrivaleliwa. Xileswo, na hine hi fanela ku tiyimisela ku dzrivalela van’wana loko va hi khunguvanyisa.—Amapsalma 86:5.
A lizrandzru ‘a li tsrhaveli a ku somboloka’.
Yanakanyisisa hi leswi: Minkama yin’wana hi nga yentxekeliwa hi mintxhumu ya ku biha, nakone vhanu vambeni va nga ha nyonxisiwa hi leswo. Handle ka ku ganaganeka, a hi swi zrandzri loko leswo swi hi yentxekela. Xileswo, a hi fanelanga hi nyonxa loko ntxhumu wa ku biha wu yentxekela mhunu mumbeni, nambi loko yene a hi yentxeli ntxhumu wa ku biha.
Hi fanela ku kombisa lizrandzru dzra ku fana ni ledzro akuva hi kuma matovoko ya Xikwembu Nkulukumba swi nga na mhaka ntanga, tiko kumbe wukhongoti bya vhanu lavo. Ndlela leyinene ya ku kombisa lizrandzru ledzro i ku pfuna lava va nga ni ku vilela ka kukazri.
