Со ԥэнэнпэ андэ Библия?

 Кала о мануш болдёл, во полностью тасол андо паи a. Андэ Библия най еқвар пистройпэ, сар болдёнас и мануша (Дила 2:41). Пала Иисусо пистромэ, кай во болделя андэ лэн Иордано (Матфеё 3:13, 16). Ай пала эфиопско мануш пистромэ, кай во болделя андэ лэн, сави сас паша дром, кай во проладэлас (Дила 8:36—40).

 О Иисусо сытярэлас, кай всаворэ лэстирэ ученикоря трэбуй тэ болдён (Матфеё 28:19, 20). Пала када кадяжэ пистрояс и о апостоло Пётро (1 Пётро 3:21).

Андэ кадэя статья

•  Со сыкавэл и крещения?

•  Со андэ Библия пистромэ пала кода, кай тэ болэн цынёне бэятонэн?

•  Со сыкавэл, кай о мануш болдёл через о алав лэ Дадэско, лэ Шавэско и лэ свынтонэ духоско?

•  Авэла бэзэх, если о мануш болдёла упалэ?

•  Пала сави инке крещения ԥэнэнпэ андэ Библия?

•  Со дэко нэ правильно полэл пала крещения?

 Со сыкавэл и крещения?

 Кала о мануш болдёл, во кадэлэса сыкавэл аврэнди, кай во каисайля андэ пэстирэ бэзэха, дя алав лэ Дэвлэсти тэ терэл кода, со во камэл, и кай андэ вся лэла тэ кандэл лэ Дэвлэс и лэ Иисусос Христос. Кала мануш болдёл, во ԥэнэса лэл тэ жал па дром, сави андярэл лэс каринг и вечно жызня.

 Со сыкавэл, кай о мануш болдёл через о алав лэ Дадэско, лэ Шавэско и лэ свынтонэ духоско?

 О Иисусо ԥэндя пэстирэ учениконэнди, кай вонэ тэ поможын лэ манушэнди тэ ашэн ученикоря и тэ болэн лэн через о алав лэ Дадэско, лэ Шавэско и лэ свынтонэ духоско (Матфеё 28:19, 20). Со када сыкавэл? Кала ԥэнэн через о алав лэ Дадэско, лэ Шавэско и свынтонэ духоско — када сыкавэл, кай о мануш, саво болдёл, трэбуй тэ прижанэн сави дэ бари власть исин кай о Дэл и кай лэско Шаво, ай кадя жэ трэбуй тэ полэл, со терэл свынто духо. Акэ ек примеро, саво поможый када тэ полас май драго. Еқвар о апостоло Пётро исцэлисардя манушэс, саво лангалас жы кодэлэстар сар арақаделяпэ. Во ԥэндя лэсти, кай во через о алав лэ Иисусоско тэ ущел и тэ жал (Дила 3:6). Кадя о Пётро камэлас тэ сыкавэл, кай во прижанэлас, кай зор тэ исцэлий сас най лэстар, ай лэ Иисусостар.

•   Дад — када о Дэл Иегова b. Лэстэ со май бари власть и само баро зор, важ кода кай во создал вся и люма (Бытие 17:1; Откровение 4:11).

•   Шаво — када о Иисусо, саво отдя важ амэндэ пэстири жызня (Римлянам 6:23). Амэ можэм тэ спасысавас кати если полас и прижанас, кай ек через лэстэ о Дэл исполнит пэско замысло важ и мануша (Иоанна 14:6; 20:31; Дила 4:8—12).

•   Свынто духо — када лэ Дэвлэско зор, савэса во варисо терэл c. Пэстирэ зорэса о Дэл вся создя, и дя жызня кодэлэнди, кас создя. Кадэлэ зорэса во ԥэрэдэлас пэстирэ алава лэ пророконэнди и аврэ манушэнди и дэлас лэнди зор тэ терэн кода, со во камэлас (Бытие 1:2; Иов 33:4; Римлянам 15:18, 19). И инке во пэстирэ зорэса пэрэдэлас пэстирэ гиндоря лэ манушэнди, савэ пистронас и Библия (2 Пётро 1:21).

 Авэла бэзэх, если о мануш болдёла упалэ?

 Адес и мануша дэкала парувэн и вера. Но со если о мануш ужэ болделя андэ варисави қандири? Авэла бэзэх, если во болдёла упалэ? Дэко ԥэнэн да и призындярэн и алава анда книӷа Эфесянам 4:5, кай ԥэнэнпэ: «Ек Ӷосподо, ек вера, ек крещения». Но кадэла алава на сыкавэн, кай о мануш нэ можэт тэ болдёл упалэ. И акэ васо.

 Кантексто. Сар дицол андэ штарто ӷлава анда книӷа Ефесянам о апостоло Павло шутя сама, кай чачунэ христианоря трэбуй еқэндар тэ полэн лэ Дэвлэс (Эфесянам 4:1—3, 16). Ай када вижала кати тоди, если прижанэн еқэ Ӷосподос лэ Иисусос Христос, еқэндар полэн кода, со пистромэ андэ Библия и прижанэн кода, со трэбуй, кай тэ болдён.

 Андэ Библия запистромэ ек случаё, кала о апостоло Павло ԥэндя дэсавэ манушэнди тэ болдён упалэ. Када сас трэбуй, важ кода кай кала вонэ болделэ пэрво разо, вонэ най вся правильно полэнас пала христианско учения.

 Сар трэбуй тэ болдёс, кай када тэ авэл правильно англа Дэл. Кала о мануш драго ӷанэл сости сытярэл и Библия и болдёл, када уӷодно лэ Дэвлэсти (1 Тимофею 2:3, 4). Но кала во патял кодэлэсти, сости на сытярэл и Библия, и болдёл, лэ Дэвлэсти када нэ уӷодно (Иоанна 4:23, 24). Исин кацаво, кай мануш болдёл всаворэ одестар, но лэстири жызня на сжалпэ кодэлэса, со пистромэ андэ Библия (Римлянам 10:2). Тоди лэсти трэбуй май драго тэ уӷанэл о чачимос анда Библия, тэ залэл тэ жувэл па кода, со уӷангля, тэ дэл алав лэ Дэвлэсти, кай жувэла важ лэстэ и кати тоди упалэ тэ болдёл. И кала о мануш кадя болдёла, када на авэла ӷрехо, ай авэла правильно англа Дэл.

 Пала сави инке крещения ԥэнэнпэ андэ Библия?

 Андэ Библия пистромэ най кати пала ек крещения, кала лэ Иисусотирэ ученикоря болдёнас андо паи. Исин и авэр крещения. Акэ дэсавэ примероря.

 Крещения, сар болэлас о Иоано Крестителё d. О Иоано болэлас лэ евреёнэн и лэ манушэн анда авэр народоря, савэ каинаспэ андэ пэстирэ бэзэха, савэ стердэ против лэ Моисеёско законо. Кадэва законо о Дэл дя лэ израильтянонэнди через о Моисеё. Кадэя крещения поможыяс лэ манушэнди тэ прижанэн, кай о Иисусо анда Назарето, када о Мессия или Христос (Луки 1:13—17; 3:2, 3; Дила 19:4).

 Лэ Иисусостири крещения. Лэ Иисусос болдя о Иоано Крестителё. Кадэя крещения най кацави сар всаворэ авэр, важ кода кай о Иисусо сас совершэно мануш, саво на терэлас бэзэха (1 Пётро 2:21, 22). Вижал, лэстири крещения на сыкавэлас, кай во трэбуй тэ каийпэ англа Дэл, кай лэстэ тэ авэл вужи совесть (1 Пётро 3:21). Кала болделя о Иисусо, во сыкадя, кай ӷотово тэ стерэл вся, со аштярэлас лэстар о Дэл и тэ ашэл Мессия или Христос. Када кадяжэ сыкавэлас, кай во отдэла важ амэндэ пэстири жызня (Евреям 10:7—10).

 Крещения свынтонэ духоса. О Иисусо и о Иоано Крестителё ԥэнэнас пала кадэя крещения (Матфеё 3:11; Луки 3:16; Дила 1:1—5). Но када най еқэндар кодэлэса, кала болдён через о алав лэ свынтонэ духоско (Матфеё 28:19). Соза катэ разница?

 Кати найбутэ манушэндэ исин крещения свынтонэ духоса. Кадэла мануша помазани свынтонэ духоса, важ кода кай лэн витидя о Дэл тэ правин и тэ авэн рашая по нэбо лэ Иисусоса (1 Пётро 1:3, 4; Откровение 5:9, 10) e. Вонэ лэна тэ правин милиононэ манушэнца, савэ кадяжэ лэ Иисусостирэ ученикоря, но савэ аштярэн пэстири наӷрада вечно жызня пэ ԥув (Матфеё 5:5; Луки 23:43).

 Крещения андо Христос и лэстири смэрть. Христианоря, савэндэ исин крещения свынтонэ духоса, и савэ лэна тэ правин лэ Иисусоса по нэбо, кадяжэ «болдён андо Христос Иисус» (Римлянам 6:3). Када сыкавэл, кай вонэ ужан андэ лэстири собрания, вонэ сар лэстири тила и вонэ кандэн лэ Иисусос, сар пэстирэ Ӷосподинос (1 Коринфянам 12:12, 13, 27; Колоссянам 1:18).

 Памазаникоря кадяжэ болдён и андэ лэ Иисусостири смэрть (Римлянам 6:3, 4). Кадяжэ сар и о Иисусо вонэ стон лэ Дэвлэско Царство по пэрво ҭан андэ пэсти жызня и отԥэндён тэ жувэн вечно пэ ԥув. Лэндири крещения андэ лэ Иисусостири смэрть кончийпэ, кала вонэ мэрэн пэ ԥув и ринпэ каринг и жызня по нэбо (Римлянам 6:5; 1 Коринфянам 15:42—44).

 Крещения ягаса. О Иоано Крестителё ԥэндя: «[О Иисусо] лэла тэ болэл тумэн через о свынто духо и ягаса. Лэстэ андо вас и лопата, кай тэ веий о зэрно. Во вужарэла пэско участко, кай мэлий о зэрно, и стидэла и пшэница андо складо, ай и шулуха сԥабарэла андэ вечно яг» (Матфеё 3:11, 12). Андэ кадэла алава дицол, кай крещения свынтонэ духоса и крещения ягаса када най еқэндар. Пала со дэлас дума о Иоано?

 Пшэница — када и мануша, савэ приашундёнпэ каринг лэ Иисусостирэ алава и терэн кадя, сар во сытярэл. Важ лэндэ появийпэ возможность тэ авэн болдэ свынтонэ духоса. Ай шулуха — када и мануша, савэ на кандэн лэ Иисусос. Лэн болэна ягаса, када сыкавэл, кай вонэ авэна уничтожэни пэ вся и вечность (Матфеё 3:7—12; Луки 3:16, 17).