ЕСЛИ тутэ или варикастэ анда тирэ чаче исин насвалимос, саво можэт тэ анэн каринг и смэрть, тоди ту полэс, кай кадэлэстар можно тэ умэкэс и вас. Ԥарэс можэт тэ авэл най кати лэ насвалимастар, но и кодэлэстар, со терэлпэ андо ди. О мануш можэт инке май бут тэ дарал и тэ гиндой важ кода, кай бут и долӷо тэ ԥирэл кай и врачоря, кай ԥарэс тэ домардёл лащи лечения и тэ потинэл важ и лечения, ай кадяжэ кодэлэстар, саво вэрытимос жал лэ драбэндар, савэ во пэл. Через о ԥаримос андо ди май фартэ лэл тэ дуқал и тила и кадэлэстар и жызня ашэл инке май ԥари.

Но кай тэ виарақэс помощь? Бутэнди фартэ поможысардя кода, кай вонэ мангэнаспэ лэ Дэвлэсти  и адинонас андэ Библия гиндоря, савэ подритярэн. Кадяжэ можэт тэ дэл зор кода, кай тут любин и подритярэн тирэ чаче и и друӷоря.

О Роберто, савэсти 58 бэрш, ԥэнэн: «Дэ лэ Дэвлэсти тэ авэл паша тутэ андэ кацави время и во поможыя тути тэ виритярэс кадэва ԥаримос. Мангпэ лэ Иеговасти. Росԥэн лэсти, со тутэ по ди. Манг лэс тэ дэл тути о свынто духо. Манг лэс тэ поможый тути тэ на умэкэс и вас и тэ подритярэс пэско ери, кай тэ авэс спокойно андэ кадэя ԥари время».

О Роберто кадяжэ ԥэнэн: «Фартэ баро зор дэл о ери, важ кода кай ту ӷанэс, кай андо любо маменто тут подритярэна! Еқвар или дувар андо дес варико можэт тэ позвоний и тэ пушэл, сар мандэ и дила. Мэрнэ друӷоря звонин и пистрон манди всаворэ ригэндар. Мэ диқав, кай вонэ дэн манди зор, и када поможый тэ на умэкав и вас».

Если ту камэс тэ жас кай тиро друӷо, саво фартэ занасвайля, приашундю каринг кода, со ԥэндя и Линда: «Кодэва, ко насвало, камэл тэ жувэл сар всаворэ мануша, пэ скати када лэстэ вижала, и во най вся и время камэл тэ дэл дума пала пэско насвалимос. Важ када дэ дума пала кода, пала со обычно дэс дума аврэ манушэнца».

Лэ Дэвлэско зор, гиндоря анда Библия и помощь лэ ерестар и лэ друӷонэндар поможына тути тэ полэс, кай тэ жувэс трэбуй, дажэ если тутэ ԥаро насвалимос.