Письмо андэ Филипы 2:1-30
2 Тумэ придэн зор ек еқэсти кодэлэса, со тумэндэ исин через о Христос, терэн аврэнди май вушэро по ди через кода, кай любин ек еқэс. Кадяжэ тумэ на дурён лэ Дэвлэстирэ ерестар, жалуин аврэн и глаба ек пала ек.
2 Если тумэ терэн кадя, тоди старыинпэ и май дур кадя тэ терэн. И кадэлэстар мэ авава фартэ бахтало. Мэк тумэндэ авэл ек гиндо, любин ек еқэс, авэн сар ек ери андо гиндо и андэ дила.
3 Нисо на́ терэн через о путяримос или через о споро, но авэн найабуримастирэ и май бари патив стон пэ авэр, чем пэр пэстэ.
4 Гиндон най кати пала пэстэ, но и пала авэр.
5 Мэк тумэндэ авэл кацаво жэ гиндо, сар и кай о Христос Исусо:
6 во, хоть и шоласпэ по Дэл, дажэ на гиндояс тэ залэл о ҭан, саво лэсти на прижал, и тэ ашэл сар о Дэл.
7 Наоборот, во отԥэнделя всаворэстар, шутяпэ по рабо и ашэля манушэса.
8 Тай инке, кала ашэля манушэса, во тэлярдя пэс и ашэласпэ кандино жы каринг и смэрть, кала лэс казнисардэ по столбо.
9 Важ када о Дэл дя лэсти инке май баро право тэ хулаий и па пэско баро ковло ди приԥэндя лэсти кацаво алав, саво май ашунгло любонэ аврэ алавэстар.
10 О Дэл стердя када, кай тэ стон патив пэ лэ Исусоско алав всаворэ, ко по нэбо, пэ ԥув и тала ԥув.
11 Кадяжэ кажно трэбуй тэ прижанэн, кай о Исусо Христос — Баро Хулай, через саво о Дэл, амаро Дад, ашэл ашунгло.
12 Мэрнэ кучутнэ ԥрала, тумэ вся и время кандэнас, кала мэ сымас, ай акана кандэн инке май фартэ, кала ман нинай паша тумэндэ. Важ када мангав тумэн: терэн вся, кай тэ спасынпэ, и домардён када дараса и баря пативаса.
13 Екжэно о Дэл, сар лэсти уӷодно, дэл тумэнди помощь тэ авэн май састэ, ай кадяжэ поможый, кай тумаро ди тэ цырдэлпэ и кай тумэндэ тэ авэл зор тэ терэн и дила.
14 На́ ровэнпэ и на́ споринпэ, кала варисо терэн,
15 кай сар лэ Дэвлэстирэ бэяцэ тэ авэн вужэ и бидошатирэ. Если тумэ ашэнпэ найвимақлэ, тумэ светин сар ярко свето андэ кадэя люма, хоть тумэ жувэн круӷом нэӷожи* и билажавардэ мануша.
16 Састэс ритярдён пала алав лэ Дэвлэстар, саво дэл и жызня. Тоди андэ лэ Христоско дес мэ лава тэ лошавав, важ кода кай ӷанав, кай мэ най евья приставас зор* и теравас дила.
17 Мэ отдав корко пэс, сар о вино, саво роспитялпэ па жэртва, сави тумэ анэн, кала терэн лэ Дэвлэстири дила. Тумэ терэн кадя, важ кода кай патян. Тоди мэ лошавав и радосавав всаворэнца тумэнца.
18 И тумэ лошавэн и радуинпэ вмести манца.
19 Патяв, кай ӥто, если о Баро Хулай о Исусо домэкэла, мэ бишалава каринг тумэндэ лэ Тимафеёс, кай тэ лошавав, кала уӷанава, сар тумэндэ и дила.
20 Мэ на ӷанав никас аврэс, ко анда вся ди позаботисайлоп пала тумэндэ.
21 Всаворэ авэр гиндон кати пала пэстэ, ай най пала кода, со камэл о Исусо Христос.
22 Но, сар тумэ ӷанэн, о Тимафе́ё сыкадя, кай во най кацаво. Но во, сар о бэято лэ дадэса, пристолас манца бут зор, кай тэ росԥэнэн и лащи новость.
23 Важ када мэ и камав тэ бишалав лэс каринг тумэндэ, сар кати уӷанава, со манца авэла.
24 Тай инке, мэ патяв, кай, если о Баро Хулай домэкэла, мэ екжэно ӥто авава.
25 Ай акана мэ диқав, кай манди трэбуй тэ бишалав каринг тумэндэ лэ Епафрадитос, мэрнэ ԥралэс, амалэс и лэ Христостирэ халавдэс, савэс тумэ бишалдэ тэ поможый манди.
26 Во фартэ камэл тэ диқэл всаворэн тумэн, и лэсти ашэля фартэ ԥарэс по ди, кала тумэ ашундэ пала лэско насвалимос.
27 Во чаче занасвайля, тай инке кадя, кай чуть на хынделя. Но о Дэл сас одяло каринг лэстэ, но и най кати каринг лэстэ, но и каринг мандэ, кай мэ совсем тэ на умэкав и вас.
28 Важ када мэ со май ӥто бишалава лэс каринг тумэндэ, кай тумэ упалэ тэ лошавэн, кала диқэна лэс, и тоди манди на трэбуй авэла тэ пэрэжываю пала тумэндэ.
29 Анда ди шон сама лэс, сар тумэ обычно шон сама лэ Барэ Хуластирэ учениконэн и цэнин кацавэ манушэн, сар во.
30 Кала во терэлас лэ Христостири дила, во чуть на хынделя и сас ӷотово тэ отдэл пэстири жызня важ мандэ, важ кода кай тумэ нэ моӷли тэ авэн паша мандэ и тэ поможын манди.