E Biblia phendias ke ande amare giesa sas te aven mundarimos, nasualimos, sas te izdral e phuv ai aver “zhungale bucha kai chi mai dichilia” (Luk 21:10, 11). Ando borsh 2022 kai keras buki a dikhliam ke kakala profesii kerdion chache. Iek ejemplo si, ke millonuria manush dikhle sar parhudile pengo traio pala o marimos ande Ucrania. But manush inke nai mishto pala so kerdias e pandemia katar o COVID-19. Ai vi but manush nakhle but kino pala le prame kai nakhen ande lumia sar kana izdraias e phuv ando Haití ai le bare brishinda ando Centroamérica, o Filipinas ai o sureste katar e África. Sar azhutisarde le marturia le Jehovaske kal manush kai kinuinas?

 Ando borsh 2022 kai keras buki, amari organizacion kerdias but buki te azhutil le manushen kai kinuinas pala 200 prame kai nakhle ande lumia. Diam uni 12 millonuria dolaria. b Aida dikhas so kerdiam le loventsa kai das amendar te azhutis le manushen kai kinuin pala le prame kai nakhen ande lumia.

 O 14 anda o agosto, 2021, izdraias e phuv zurales (7,2 de baro) ando sur katar o Haití. Dui anda amare phea ai iek phral jasarde o traio. Kako kai sas, andias bari dukh le manushenge kotsar. Iek Marturo kai bushelpe Stephane phendias: “But manush ando foro jasarde o traio ai pala godo suako kurko angroponas bute manushen”. Aver Marturo, o Eliezer, phenel: “But Marturia ashile vi kheresko, ma nas len gada ai prame kai trobulas len suako gies. Ai sar e phuv izdralas butivar, von traisarde darasa but shona”.

 Ande fuga, amari organizacion astardias te kerel buki. O kher Betel anda o Haití dias le phralen tseri, sheranda, uni prame te pheren o telefono te shai den duma ai vi mai but katar 53.000 kiluria anda jabe. Ai vi lashardepe mai katar 100 khera. Te keren kacha buki dinepe mai katar iek millono dolaria.

 Amare phral naisin sa peske ilesa sa so kerde pala lende. E Lorette phenel: “Kana izdraias e phuv jasardiam amaro kher ai amaro birto. Ai nas amen khanchi te jas. Numa e organizacion katar o Jehova sas amentsa ai dias amen sa so trobul amen”. Micheline serel: “Murhe shave ai me beshasas ande iek kher kai nas mishto kerdo, pala godo kana izdraias e phuv pharhadias but amaro kher. Numa so shai keravas sas te rhugiu man, ai o Jehova dias man suato mashkar peski organizacion. Naisis le phralenge, akana si amen iek kher mai mishto kerdo. O Jehova kerdias but pala mande, ai me kamau te sikavau leske suako gies ke sim naisime”.

 Le manush kai amperetsin o foro line sama sa e buki kai kerdiam te azhutis le manushen kai kinuin. O manush kai ningerel sa le prame ando L’Asile mothol: “Ke mishto ke avile fuga te azhutin. Ai na numa godo! Tumen respetin but le manushen kai ningeren o foro. Plachal man but te dikhau ke sikaven but kamlimos ka le manush ai chi keren les pala le love”.

 O 24 anda o enero, 2022, o baro brishind Ana areslo ando Mozambique ai polme ando Malaui. O baro brishind ai e bari barval aresle uni 100 kilometria po chaso. Ashile bi lusosko, pharhadias poduria, ai ande but foruria lias len o pai.

 O baro brishind ai e bari barval aresle ka mai katar 30.000 marturia le Jehovaske. O Charles, iek phral kai kerel buki te azhutil le manushen kas kinuin pa so sas ande lumia, mothol: “Chi aliaravas man mishto. Kana dikhlem sar kinuinas le phral ai sa so jasarde, shindilo murho ilo”. Von jasarde o tsirha jabe kai sas len garado ai le jabe kai barionas ande phuv. But jasarde peske khera. Ai, vi iek anda amare phral jasardias peska rhomnia ai anda leske dui shea, ke tasule ando pai.

 O brishind sas defial baro. O 1 la rakiako ando Nchalo, Malaui, e familia Sengeredo ashundias vareso kai daradias len: o pai pasholas ka lengo kher. Dui rekuria shordile! O phral Sengeredo alosardias te meken o kher. Vo alosardias mishto ke polme o pai peradias lengo kher ai ningerdias sa so sas andre. E familia geli zhi kai kidenaspe, kai sas 30 minutsi katar lengo kher, numa godo gies gelo lenge dui chasuria te aresen. Aresle kinge ai ma nas len zor, numa von sas mishto ai arakhade.

 Le khera Betel anda o Malaui ai o Mozambique lasharde ande fuga le bukia te azhutin kas kinuin. Mangle katar le phral kai aven duvar ando borsh ai katar le phure te len sama so trobun le phralen ai te azhutin len te aliarenpe mishto. Lasharde uni grupuria te azhutin le phralen kas kinuin te len sama godia buki. Pala e buki kai kerde, ande tsirha vriama, dine kal phral jabe ai aver prame kai trobulas len. Dine mai but katar 33.000 dolaria te azhutin le manushen ai mai but katar 300.000 dolaria te lasharen ai te vazden khera.

 Le grupuria andal phral kai azhutin kas kinuin ande lumia kerde iek bari buki le loventsa ai godo sas iek bari prama ke le prame kuchonas ande fuga. Iek ejemplo si, ke ande le pervo efta shon, de kin astarde te keren buki, le prame kuchile but, sar o arho —vareso kai savorhe trobun len ando Malaui— kuchilo 70%. Ai vi kuchilo o combustible. Te aresen mishto le love, kinenas but kiluria jabe ai gadia nas defial kuchi. Gadia, anklisto lenge mai lezni ai chi pokinde but kana trade len.

 Le marturia le Jehovaske si defial veselime pala sa e buki kai kerelpe. O Felisberto, iek phral katar Mozambique, mothol: “Chi prinzharau aver organizacion kai del suako fialo sa peske ilesa: den tu le prame kai trobul tu te vazdes kiro kher, manush kai azhutin tu, jabe ai keren sa gadala prame ulimasa. Kako si o ulimos chacho kai o Jesus phendias ando Iovano 13:34, 35”. E Ester, iek phei anda Malaui kai si phivli ai jasardias pesko kher, mothol: “Chi zhanavas so te kerau! Nas man love te vazdau mange aver kher. Pala godo, kana le phral aresle ai vazde mange iek kher, mialas mange ke gata simas ande nevi lumia”.

 Zhi kai chi aresela e nevi lumia si te nakhen mai prame chorhe (Mate 24:7, 8). Naisis pala sa le love kai tumen den, kai azhutil le phralen kai kinuin pa so nakhel ande lumia. Ando donate.isa4310.com shai dikhen sar te den love te azhutin ande kacha buki. Sam defial naisime ke tumen den ilesa!