Amen sikljovaja ando Devel kotar olese prorokija
Ko purano vreme, o Devel dinđa pe prorokonenđe but važna poruke aso sa o manuša. Da li šaj odola poruke te mothoven amenđe sar te dobina e Devleso blagoslov? Šaj. Hajde te dikha so šaj te sikljova ando trin verna prorokija.
O PROROK AVRAHAM
O Devel na ćerela razlika maškaro manuša hem mangela te blagoslovini sarinen.
O Devel obećinđa pe prorokose e Avrahamese: „Prekalo tute ka blagoslovinen pe sa o narodija ki phuv“ (Postanak 12:3).
So sikljovaja? O Devel but mangela amen hem mangela te blagoslovini sa e porodicen kola šunena le – e romen, e romnjen hem e ćhavoren.
O PROROK MOJSIJE
O Devel tano milostivo hem blagoslovini okolen kola dena sa pestar te penđaren le.
O Svemoćno Devel dinđa pe prorokose e Mojsijese moć te ćerel bare čudija. Ama, o Mojsije molinđa pe: „Mothov maje te drumija te šaj te penđarav tut pošukar hem te šaj hem ponodri te ovav pali ti volja“ (Izlazak 33:13). O Devel hine zadovoljno odoleja so o Mojsije rodinđa olestar hem blagoslovinđa le ađahar so pomožinđa le te penđari olese drumija hem olese osobine. Na primer, o Mojsije sikljilo soj tano o Devel „milosrdno hem samilosno“ (Izlazak 34:6, 7).
So sikljovaja? O Devel mangela te blagoslovini sarinen – e romen, e romnjen hem e ćhavoren – ako daja sa amendar te penđara le po šukar. Ko po Lafi ov mothovđa amenđe sar šaj te služina lese hem kobor mangela te blagoslovini amen.
O ISUS (O PROROK ISA)
O Isus samilosno saćarđa sa o nabormipa
Amen šaj te dobina e Devlese večna blagoslovija ako sikljovaja ando Isus hem ando odova so ćerđa hem so sikavđa.
Amen šaj te sikljova but buća ando e Devleso Lafi kotar e Isuseso životi hem kotar odova so sikavđa. O Devel dinđa moć e Isusese te ćerel but čudija, na primer te saćari okolen soj hine korore, kašuke hem sakata. Ov čak uskrsninđa e mulen. Odoleja o Isus mothovđa kola blagoslovija ka del o Devel aso sa o manuša ki budućnost. Ov phenđa so valjani svako amendar te ćerel te šaj te dobini odola blagoslovija: „A te šaj te dobinen o večno životi, valjani šukar te upoznajinen tut, e jedino ćaćutne Devle, hem okole kas bićhalđan, e Isuse Hriste“ (Jovan 17:3).
O Isus hine samilosno, ljubazno hem brininđa pe averendar. O murša hem o đuvlja, o terne hem o ćhavore hine privucime koro leste hem šunđe odova so sikavđa len te ćeren: „Sikljoven mandar, sose me hijum blago hem ponizno ko vilo, hem ka ovel tumen nevi snaga“ (Matej 11:29). Iako avera ko oleso vreme ponašinđe pe lošno premalo romnja, o Isus hine premalo lende ljubazno hem mothovđa so poštujini len.
So sikljovaja? O Isus mothovđa hor mangipe premalo manuša hem ađahar sikavđa amen sar valjani te ponašina amen averencar.
O ISUS NANE DEVEL
E Devleso Lafi sikavi so „postojini jekh Devel“ hem so o Isus Hrist hine e Devleso ponizno glasniko (1. Korinćanima 8:6). O Isus jasno mothovđa soj tano o Devel pobaro olestar hem so o Devel bićhalđa le ki phuv (Jovan 11:41, 42; 14:28). *
^ odl. 17 Te šaj pobuter te sikljove ando Isus Hrist dikh o 4. hem o 5. poglavlje ki knjiga So sikavi amen i Biblija? koja šaj te arakhe ko sajt www.isa4310.com.
