But manuša so pućena pe akava doživinđe bari tragedija hem on na rodena samo odgovorija nego hem uteha. A avera manuša dikhena ko holokaust sar najlošno događaj ki manušikani istorija hem odolese lenđe tano pharo te verujinen ko Devel.

 Ćaćipe: But verna e Devlese sluge pućlje pe sose o Devel dozvolini o lošnipe hem muke. Na primer, o prorok Avakum pućlja e Devle: „Sose mukheja man te dikhav o lošnipe, te dikhav muke, ćoribe, nasilje hem sar svađinena pe jekh jekheja?“ (Avakum 1:3, prevod Daničić-Karadžić). Umesto te ukorini e Avakume, o Devel dozvolinđa olese pućiba te oven pisime ki Biblija te šaj amen te čitina len.

 Ćaćipe: O Devel mrzini i patnja hem o lošnipe (Poslovice 6:16-19). Sebepi so o manuša ko Nojese dive hine but nasilna, o Devel „osetinđa dukh ko vilo“ (Postanak 6:5, 6). Sigurno o Devel isto ađahar osetini pe hem sebepi o holokaust (Malahija 3:6).

 Ćaćipe: O Devel dozvolinđa o Rimljanija te uništinen o Jerusalim ko prvo veko (Matej 23:37–24:2). Kotar tegani, o Devel na kazninđa nijekhe narodo, niti mothovi so mangela jekhe narodo pobuter ando aver narodo. Ko Devlese jaćha „nane razlika maškaro Judejco hem Grko“ (Rimljanima 10:12).

 Ćaćipe: Iako o Devel na ćerela o manuša te patinen, podijekh puti ov dozvolini odova disavo vreme (Jakovljeva 1:13; 5:11).

 O Devel dozvolinđa o holokaust ando isto razlog sebepi kova dozvolinđa sa o manuša te patinen – te šaj te odgovorini pe ko pućiba kola hine postavime ko početko andi manušikani istorija. I Biblija jasno phenela so o Devel na vladini e svetoja nego o Beng (Luka 4:1, 2, 6; Jovan 12:31). Duj osnovna buća andi Biblija objasninena sose o Devel dozvolinđa te oven mudarde but manuša.

1.   Ked stvorinđa e manušen o Devel dinđa len slobodno volja. O Devel phenđa e prvo manušenđe so očekujini olendar, ama na ćhivđa len zorjeja te šunen le. On kokri odlučinđe soj tano šukar hem soj tano lošno hem olengi lošno odluka anđa bare dukha sa e manušenđe. Slična odluke anđe hem but avera manuša (Postanak 2:17; 3:6; Rimljanima 5:12). Sar so pisini ki knjiga Statement of Principles of Conservative Judaism: „O manuša ko sveto patinena sose i slobodno volja koristini pe ko lošno način“. Umesto te lel amendar i slobodno volja, o Devel dinđa amen vreme te dikha da li šaj te živina bizo leste.

2.   O Devel šaj te cidel sa o posledice ando holokaust. O Devel obećini so ka uskrsnini bute manušen, čak hem okolen so mulje ko holokaust. Isto ađahar, ov ka cidel sa i dukh hem o lošna uspomene ando okola so preživinđe o holokaust (Isaija 65:17; Dela apostolska 24:15). E Devleso mangipe uverini sa e manušen so ov ka ispunini sa pe obećanja (Jovan 3:16).

 But manuša so preživinđe o holokaust na našalđe pi vera ko Devel hem arakhlje smisao ko životi odolese so haljilje sose o Devel dozvolini asavke buća hem so pana hari ka cidel sa o lošnipe.