Sar izgledinela sine o Isus?
So vakerela i Biblija:
Nikoj na džanela sar točno izgledinela sine o Isus, soske ki Biblija nane opišimo leskoro fizičko izgled. Akava sikavela kaj nane važno sar ličinela sine o Isus. Sepak, i Biblija pomožinela amen te ovel amen jekh odredeno slika bašo adava sar izgledinela sine.
Detalija bašo Isus: O Isus sine Evrei hem šaj nasledingja semitska crte tari pli daj (Evreite 7:14). Sigurno na razlikujnela pe sine but taro javera manuša. Ki jekh prilika, ov tajno gelo tari Galileja ko Erusalim bizo nekoj te pendžarel le (Jovan 7:10, 11). Osven adava, verojatno ni na razlikujnela pe sine but taro ple najpaše učenikija. Adaleske keda valjani sine te astaren le, o Juda Iskariot čak mora sine te sikavel koj tano o Isus (Matej 26:47-49).
Leskere bala: Najverojatno e Isuse na sine le bare bala soske ki Biblija pišinela kaj ladžavo tano e muršeske te ovel le bare bala (1. Korinkjanite 11:14).
Brada: E Isuse sine le brada. Ov poštujnela sine o evrejsko zakoni kova so zabraninela sine e muršenge te ruminen o kraija taro pumare brade (3. Mojseeva 19:27; Galatite 4:4). Isto agjaar, e Isuseskiri brada tani spomnimi ko jekh proroštvo bašo leskoro mučibe (Isaija 50:6).
Telo: O Isus sine zoralo manuš. Na primer, džikote kerela sine pli služba ki Phuv, ov phirela sine but kilometre (Matej 9:35). Isto agjaar, duj puti čistingja o hrami adalea so prevrtingja o astalija okolengere so meninena sine pare. A jekh puti, paldingja e stoka kamšikoja (Luka 19:45, 46; Jovan 2:14, 15). Ki jekh enciklopedija pišinela: „Sa so pišinela ko Evangelija sikavela kaj [o Isus] sine sasto hem silno“ (McClintock and Strong’s Cyclopedia, tom IV, stranica 884).
Izrazija ko muj: O Isus sine ljubezno hem sočuvstvitelno, hem adava sigurno šaj sine te dikhel pe ko leskoro muj (Matej 11:28, 29). Razna manuša avena sine ki leste te šaj te dobinen uteha hem pomoš (Luka 5:12, 13; 7:37, 38). Čak o čhave osetinena pe sine but šukar uzi leste (Matej 19:13-15; Marko 9:35-37).
Pogrešno mislibe bašo adava sar izgledinela sine o Isus
Pogrešno mislibe: Nesave manuša vakerena kaj e Isuse sine le afrikansko poteklo adaleske so ko lil Otkrovenie leskere bala tane sporedime volnaja, a leskere pre bakarea (Otkrovenie 1:14, 15).
Čačipe: Jekh baro delo taro adava so pišinela ko lil Otkrovenie tano simbolično, javere lafencar „ko znakija“ (Otkrovenie 1:1). E Isuseskere bala hem pre sine opišime ko jekh simbolično način. I cel taro adava soske sine agjaar opišime tani, te istakninen pe nesave taro leskere osobine otkeda voskresningja, a na te sikavel sar izgledinela sine džikote sine ki Phuv. Ko Otkrovenie 1:14 pišinela: „Leskoro šero hem bala sine parne sar parni volna, sar iv“. Ko akava stiho kerela pe lafi baši boja e balengiri. O parne bala tane simboli baši i mudrost so avela e beršencar (Otkrovenie 3:14). Isto sar so na mislinaja kaj e Isuseskere bala sine parne sar iv, agjaar ni na valjani te mislina kaj leskere bala sine sar volna.
E Isuseskere pre tane opišime sar čisto bakari (Otkrovenie 1:15). Osven adava, i Biblija vakerela kaj leskoro muj tano sar kham kova so silno svetinela (Otkrovenie 1:16). Adaleske so na postojnela rasa koja so isi la asavki boja ki koža sar so pišinela ko akava stiho, i vizija taro Otkrovenie mora te ovel simbolično hem sikavela e voskresnime Isuse kova so živinela ki svetlina kolate so nane pristap e manušen (1. Timotej 6:16).
Pogrešno mislibe: O Isus sine slabo hem na sine le sila.
Čačipe: O Isus na sine slabo, nego silno hem hrabro. Na primer, ov hrabro iklilo angli grupa manuša kola so ale te astaren le hem vakergja lenge kaj ov tano adava kas so rodena (Jovan 18:4-8). Adaleske so koristinela sine različna alatija džikote kerela sine buti sar stolari, ov sigurno sine silno (Marko 6:3).
Tegani pojavinela pe jekh pučibe: Soske o Isus našti sine korkori te phiravel o stubo mučibaske dži ko than kote so valjani sine te mudaren le? Osven adava, soske mulo angleder o javera manuša so sine osudime? (Luka 23:26; Jovan 19:31-33). Angleder te ovel mudardo, o Isus sine but umorno. Na sukja celo rat hem isto agjaar sine le bari emocionalno dukh (Luka 22:42-44). Adaja rat, nesave Evreija asana sine leske hem khuvena le sine, a sabajle o Rimjanja mučingje le (Matej 26:67, 68; Jovan 19:1-3). Sa adava najverojatno kergja posigate te merel.
Pogrešno mislibe: O Isus nikogaš na sine raspoložimo hem bahtalo.
Čačipe: O Isus sovršeno sikavela sine o osobine ple nebesno Dadeskere e Jehovaskere koleske so i Biblija vakerela kaj tano bahtalo Devel (1. Timotej 1:11; Jovan 14:9). Ustvari, o Isus sikavela sine e javeren da sar te oven bahtale (Matej 5:3-9; Luka 11:28). Sa akava sikavela kaj o Isus sekogaš sine bahtalo.
Šaj isto ka interesinel tut
OSNOVNA BIBLISKA SIKLJOJBA
Dali adava so pišinela ki Biblija tano čače?
Ako i Biblija tani taro Devel, tegani oj valjani te razlikujnel pe taro sa o javera lila.
