Со откринѓе аменге о пекамберија башо Девел
Ко пурано време, о Девел вакерела сине важна пораке е манушенге преку о пекамберија. Дали акала пораке откринена аменге сар шај те добина берекетија таро Девел? Оја. Те дикха со шај те сикљова таро трин верна пекамберија.
ИБРАХИМ (Авраам)
О Девел нане пристрасно хем мангела те дел берекети са е манушенге.
О Девел денѓа лафи е пекамбереске е Ибрахимеске кај преку лесте „ка добинен берекети са о народија ки пхув“ (1. Мојсеева 12:3).
Со сикљоваја таро акава? О Девел бут мангела амен хем мангела те дел берекети сариненге сој леске послушна.
МУСА (Мојсеј)
О Девел тано милостиво хем дела берекети адаленге со трудинена пе те пенџарен ле.
О Семоќно Девел денѓа моќ е пекамбереске е Мусаске те керел баре чудија. Сепак, о Муса молинѓа пе: „Вакер манге, молинава тут, баши тле друмија, те шај те пенџарав ту хем те аракхав милост англо тле јакхја“ (2. Мојсеева 33:13). О Девел сине бахтало башо адава со родинѓа лестар о Муса хем денѓа ле берекети аѓаар со поможинѓа леске панда пошукар те хаљовел лескере особине хем о начин сар постапинела. На пример, о Муса халило кај о Створители тано „милостиво хем сочувствително“ (2. Мојсеева 34:6, 7).
Со сикљоваја таро акава? О Девел мангела те дел берекети сариненге со трудинена пе пошукар те пенџарен ле — муршенге, џувленге хем чхавенге. Преку пло Лафи ов вакерела аменге сар те служина леске. Освен адава, вакерела кај мангела те сикавел аменге милост хем те дел амен берекетија.
ИСА (Исус)
Шај те добина вечна берекетија таро Девел ако сикљоваја башо Иса, хем башо адава со керела сине хем со сикавела сине.
Ко е Девлескоро Лафи иси бут деталија башо е Исаскоро живото хем лескере сикајба. О Девел денѓа ле моќ те керел баре чудија сар, на пример, те сасљарел е королен, е кашукен хем е сакатен. Ов иранела сине чак е мулен ко живото. О чудија со керѓа лен о Иса сикавена со ка керел о Девел ки иднина. О Иса објаснинѓа сар секова јекх амендар шај те добинел адала берекетија. Ко Јован 17:3 пишинела: „Те шај те овел лен вечно живото ваљани шукар те пенџарен тут, е јекхе чачутне Девле, хем околе со бичхалѓан ле, о Исус Христос“.
О Иса сине сочувствително хем љубезно. Бут мануша, машкар коленде со сине мурша хем џувља, терне хем пхуре, авена сине ки лесте адалеске со шунѓе лескири љубезно покана: „Сикљовен мандар, соске ме на хољанава сигате хем сиум понизно ко вило, хем ка овел тумен неви сила!“ (Матеј 11:29). Исто аѓаар, различно таро мануша ко лескоро време кола со понашинена пе сине лошно е џувленцар, о Иса сине ленцар љубезно хем поштујнела лен сине.
Со сикљоваја таро акава? О Иса сикавѓа кај бут мангела е манушен хем денѓа амен бут шужо пример башо адава сар ваљани те понашина амен јекх јекхеа.
О ИСА НАНЕ ДЕВЕЛ
Таро е Девлескоро Лафи дознајнаја кај „иси само јекх Девел“ хем кај о Иса сине јекх понизно пекамбери со служинѓа е Девлеске (1. Коринќаните 8:6). О Иса јасно пхенѓа кај о Девел тано побаро лестар хем кај бичхалѓа ле ки Пхув (Јован 11:41, 42; 14:28). *