CALLARI TEMA | ¿IMA LLULLACUNATA TAITA DIOSMANDA CARUYACHIN?
Llullacunamandami gentecunaca Taita Diospa shutita na rijsin
GENTECUNACA NINMI:
“Cutin cutin parlashpapash Taita Dios shutita charijtaca na yachanchichu. Shutita charijpipash ima shuti cajtaca na yachanchichu” nishpa (Profesor David Cunningham, libro Theological Studies).
BIBLIACA NINMI:
Taita Diosca nircami: “Ñucaca, Mandaj Dios shutimi cani” nishpa (Isaías 42:8) *. Hebreo shimipi Jehová nishpaca “Ñucaca, ñuca munashca shinami tucusha” nijunmi (Génesis 2:4, NM).
Jehová Diosca paipa shutita rijsichunmi munan. Bibliapica ninmi: ‘Paipa shutita cayaichi. Pai imatalla rurashcataca tucui gentecunaman villaichi. Paipa shuti jatunyachi tucushca cajta yarichi’ nishpa (Isaías 12:4).
Jesusca paipa yachajujcunapash Taita Diospa shutita rijsichunmi munarca. Shuj punllaca Taita Diosta mañarcami, ‘ñucata juyanshna paicunapash juyarichunmi canba shutitaca rijsichircani’ nishpa (Juan 17:26).
¿IMAMANDATA TAITA DIOSMANDA CABALTA YACHANA CANCHI?
Religiongunamanda yachachij profesor Walter Lowrie shutica nircami: ‘Taita Diospa shutita na rijsijcunaca Taita Diostaca na rijsinllu, na juyanllu’ nishpa.
Diospa shuti maijan cajta na villashpa o shuj shuticunatara nishpaca Bibliamanda Diospa shutita anchuchijuj cuentami canman
Victorca ninmi, ‘cada semana iglesiaman rishpapash Taita Diosmandaca na imatapash yachanllu cariani. Taita Diospa shuti Jehová cajta yachashpami Taita Diosta aliguta rijsishpa paipa amigo cuenda sintirircani’ nishpa.
Bibliapica ninmi: ‘Canba shutita rijsishpa causajcunataca napacha jichurcanguichu’ nishpa (Salmo 9:10). Taita Diosca paipa shutipi parlajpica bendicianmi. Bibliapica ninmi: ‘Maijan cashpapash Jatun Diospa shutipi mañashpaca quishpiringami’ nishpa (Romanos 10:13).
^ par. 4 Hebreo shimipica Taita Diospa shutica Jehovami can. Chaitami Biblia Quichua Imbaburapica “Mandaj Dios”, “Jatun Dios” nishpa churan.
Cai temacunata ashtahuan liipai
BIBLIAMANDA HUAQUIN YACHACHISHCACUNACA
Taita Diosca ¿ima shutita can?
Taita Diostaca Tucui Ushaita Charij, Tucuita Ruraj, Mandaj Dios nishpami rijsin. Cai videopica, Taita Diospa shuti 7 mil yali viajecunata Bibliapi tiajujtami ricuchin.
