Para siempre causangapaj munanaca normalmi can. Bibliapica Taita Diosmi chai munaita ñucanchi shungupi churashcata nin (Eclesiastés 3:11). Shinallata “Taita Diosca, ninandapacha juyajmi” can ninmi (1 Juan 4:8). Shinaca gentecunata para siempre causachun rurashcamandami, Taita Diosca para siempre causana munaita ñucanchi shungupi churashca.

Nipipash na huañungapaca munapanchichu. Bibliapica huañuica shuj contra cuendami can ninmi (1 Corintios 15:26). Chaimi joven cashpa o mayorlla cashpa na yashcapi huañuita ushapanchi. Imashinami ricupanchi tucuicunallatami imahorapash huañunallata capanchi. Ashtaca gentecunaca huañunataca pensaitallapash na pensangapaj munanllu. Ashtahuangarin huaquingunaca huañunatami ninanda manllan. Shinaca ¿imahorapash huañuimandaca salvarita ushashunlla?

Taita Diosca gentecuna huañuchunga na munarcachu. Bibliapi Génesis libropica cai alpapi para siempre causachun gentecunata Taita Dios rurashcatami ricuchin. Chaimandami Jehová * Diosca gentecuna causachun nishpami cai alpataca juyaillaguta rurarca. Cai alpata rurashca jipaca, punda jari Adanda rurarca. Chai jipaca Adandaca Edén pushtupi tiashca juyailla pushtugupi churarca. Jipamanga “Taita Diosca, tucuita pai rurashcatami ricujurca. Chai rurashcacunaca, aligupacha cajtami ricujurca” (Génesis 1:26, 31).

Taita Diosca Adandaca jucha illajtami rurarca (Deuteronomio 32:4). Paipa huarmi Evatapashmi jucha illajta rurarca. Jehová Diosca paicunataca cashnami  mandarca: “Huacharishpa ninanda mirashpa, ashtacacunapacha tucushpa, cai pachapi jundanguichi. Cai pachapi imalla tiajcunata cazuchinguichi. Shinallata mama cuchapi causaj pijicunata, jahuata rij alasyu animalcunata, alpapi causaj tucuilla animalcunatapash mandanguichi” nishpa (Génesis 1:28).

Tiempohuanmi Adanba, Evapa huahuacunaca huahuacunata charishpa cai alpapi jundana carca. Chaipaca Evaca huahuacunata charinami carca. Shinallata paipa huahuacunapash huahuacunata charishpa cai alpapi jundanami carca. Shinami Taita Diospa munaica pactarina carca (Isaías 45:18). Adanbash, Evapash paicunapa huahuacunatalla, nietocunatalla ricushpa huañuna cajpica Taita Diosca cai alpapi mirashpa jundanguichi nishpaca na mandanmanllu carca.

Cunanga caipi pensaripashunchi, Adandaca animalcunatapash mandanguichi nishpami Jehová Diosca mandarca. Chai mandashcata pactachingapaca Adanga tucui animalcunatami shuticunata churana carca (Génesis 2:19). Shinallata, cai alpapi tiashca tucui animalcunata aliguta cuidangapaca Adanga paicunata aliguta rijsinami carca. Chaicunata rurangapaca ashtaca tiempomi minishtirirca.

Adandapash, Evatapash huahuacunata charishpa cai alpapi jundanguichi nishpa, animalcunatapash mandanguichi nishpami Taita Diosca mandarca. Jehová Dios Adanda, Evata shina mandashpaca paicunata para siempre causachun rurashcatami ricuchin. Adanga ashtaca huatacunatami causarca.

Bibliapica, nara Jatun manllanai tamia tiajpica gentecunaca ashtaca huatacunata causashcatami ricuchin. Génesis 5:5​pica ninmi: “Adanga tucuimandaca, iscun patsaj quimsa chunga huatata causashpami huañurca” nishpa. Shinallata Bibliapica 6 jaricunapash 900 yali huatacunata causashcatami ricuchin. Paicunaca: Set, Enós, Quenán, Jared, Matusalén, Noé jaricunami carca. Noeca 600 huatacunata charijpimi Jatun manllanai tamia shamurca (Génesis 5:6-27; 7:6; 9:29). Chai jaricunaca ¿imamandata ashtaca huatacunata causarca?

Adanbash, Evapash jucha illaj causaita chingachishca jipami chai jaricunaca nacirirca. Chaimi talvez chai jaricunaca ashtaca huatacunata causashcanga. Shinapash ¿jucha illaj causaica, ashtaca huatacunata causanahuanga igualchu can? Shinallata huañuica ¿imahorapash tucuringacha? Cai tapuicunamanda nara yachajushpallatami ¿imamandata mayoriashpa huañunchi? nishca tapuimanda pundapica yachajuna capanchi.