Judá llactamanda Ester joven huarmiguca Persia llactapi Susa nishca pueblopimi causarca. Esterpa familiataca ashtaca huatacuna huashamanmi rey Nabucodonosorca Jerusalenman prezu apashca carca. Estertaca paipa primo Mardoqueomi viñachirca. Mardoqueoca rey Asuerota sirvijmi carca.

Rey Asueroca shuj mushuj reinatami agllangapaj munajurca. Chaimandami paita sirvijcunaca chai llactamanda juyailla huarmicunata reypaman aparca. Chai huarmicunahuanga Estertapashmi aparca. Chai huarmicunamanda paipa reina tucuchunga Estertami reyca agllarca. Shinapash Mardoqueoca Estertaca nircami, judiami cani nishpaca ama villanguichu nishpa.

Reypa cati mandajcunata mandaj Hamán runaca ninan jariyashcami carca. Tucuicuna paipa ñaupajpi cumurichunmi munan carca. Shinapash Mardoqueoca na paipa ñaupajpi cumurinllu carca. Chaimandami Hamán runaca ninanda culirashpa Mardoqueota huañuchingapaj munajurca. Hamán runa Mardoqueo judío cashcata yachaj chayashpaca, chai llactapi causaj tucuilla judiocunata imashina huañuchinatami pensarijurca. Chaimi rey Asueroman cashna nirca: Judiocunaca nalicunami can. ‘Can jatun mandajpaj ali cajpica, tucuicunatami tucuchina’ canchi nishpa. Shina nijpimi rey Asueroca cashna nirca: ‘Imata rurashpa canbi ali cana cajpipash ruranguilla’ nishpa. Shinami shuj mushuj leyta llujchichun permisota curca. Chai mushuj leypica cashnami nijurca, adar quillapa 13 punllapica gentecunaca tucuilla judiocunatami huañuchina can nishpa. Shinapash Jehová Diosca tucuitami ricujurca.

Reina Esterca cai mushuj ley llujshishcataca nimata na yacharcachu. Chaimi Mardoqueoca chai leymanda shuj copiata Esterman cachashpa cashna nirca: ‘Jatun mandajpaman rishpa parlanami cangui’ nishpa. Chaimi Esterca nirca: ‘Maijan cashpapash jatun mandaj na cayajpita ricungapaj yaicujpica huañuchi tucunami’. ‘Ñuca pai jatun mandajta ricuchunga, cai quillataca na cayahuashcachu’. Shinapash, ‘jatun mandajhuan parlangapaj yaicushami. Mandashcapi nijunshnallata na yaicunalla cajpipash, chaiman yaicujpi huañuchijpica, huañushatachari’ nishpa.

Reina Esterca jatun mandajpa ucu patiomanmi yaicurca. Rey Asuero, Esterta ricushpaca ‘oro varata paipa ñaupaman chutashpami ricuchirca’. Reina Ester, reypaman quimirijpimi reyca cashna tapurca: ‘¿Imatata munangui?’ nishpa. Shina  nijpimi Esterca nirca: ‘Can jatun mandaj ñuca rurashca jatun micuiman, Hamán runandi shamupanguichi’ nishpa. Chai jipaca Esterca cutinmi shuj micuiman invitarca. Chaipica cutinmi reyca Estertaca: ‘¿Imatata munangui?’ nishpa tapurca. Chaimi Esterca nirca: ‘Ñucata huañuchinata, ñuca llactamanda gentecunata huañuchinatapash jarcapayari’ nishpa. Chaimi reyca cashna nirca: ¿Pita cangunata huañuchingapaj munajunyari? nishpa. Shina tapujpimi Esterca nirca: ‘Ñucanchita fiñaj, ñucanchita na ricunayachij runaca Hamán shuti runami’ can nishpa. Chaita uyashpami rey Asueroca ninanda culirashpa chai rato Hamán runata huañuchichun mandarca.

Hamán Judiocunata huañuchingapaj rurashca leytaca ni pipash na cambiaita usharcachu. Ni rey Asueropash na cambiaita usharcachu. Chaimandami rey Asueroca paipa cati mandajcunata Mardoqueo mandachun churarca. Shinallata shuj mushuj leyta llujchichunbashmi permisota curca. Chai leypica cashnami nijurca, pipash judiocunata atacajpica paicunaca difindirinallami can nishpa. Adar quillapa 13 punllapimi judiocunaca paicunapa contracunata misharca. Chai punllamandami judiocunaca paicunapa contracunata mishashca punllata tucui huatacuna yari callarirca.