Huahuamandallatami urcucunata, quirucunata ricunata ninanda gushtan cashcani. Huahua cashpaca ñuca familiahuanmi Jyväskylä llacta bosquecunapi, lagunacunapi puringapaj rin carcanchi. Animalgucunatapash ninandami juyan carcani. Alcugucunata, misigucunata ricushcandimi ugllarin carcani. Viñashpaca animalcunata nali tratajta ricushpami shuj organizacionman yaicurcani. Chaipica shuj gentecunapash animalgucunata ñucashnallata juyan cashcatami cuenta japircani.

Animalgucunata difindingapaj munaimandami huaquin campañacunata ruran carcanchi. Chaipaca huaquin marchacunata, informaciongunatami cai animalpa caracunata jatushpa trabajaj tiendacunapa, laboratoriocunapa ñaupacunapi shayarishpa protestacunata ruran carcanchi. Chaimandami animalcunata cuidaj shuj organizacionda rurarcanchi. Chai organizacionda difindingapaj munaimandami huaquin problemacunapi satirircani. Shinallata huaquin viajecunami carcelpipash carcani.

Shinallata shuj problemacunamandapashmi preocupari callarircani. Chaimandami Amnistía Internacional shinallata Greenpeace nishca organizaciongunaman tucui shunguhuan apoyangapaj yaicurcani. Shinallata pobrella gentecunata, yarjai pasaj gentecunata ayudangapapashmi callarircani.

Shinapash tiempohuanmi cuenta japircani cai mundotaca na cambiai ushashcata. Aunque huaquin juiciocunata ganashpapash, shuj problemacunaca ashtahuan mirashpami catirca. Chaimandami pipash cai problemacunamandaca na preocuparinllu yashpa pensarin carcani. Chaimi maqui huatashcashna sintirin carcani.

Imatapash na rurai ushaimandami Taita Diospi, Bibliapipash pensari callarircani. Pundaca testigo de Jehovacunahuan Bibliamanda yachajurcanimi. Paicuna ali alicuna cashcatapash agradicircanimi. Shinapash ñuca causaipi cambiangapaca nara munarcanichu. Pero cai viajeca cambiangapapachami munarcani.

Chaimi Bibliata mascarcani y lii callarircani. Ciertopachami ali sintirichun ayudahuarca. Huaquin textogucunata liijushpami tarircani, maipimi animalgucunata ali tratana cashcata. Por ejemplo, Proverbios 12:10​pica: Alita “ruraj runaca, paipaj animaltapash aligutami charin” nijunmi. Chaipimi intindircani que Taita Diosca cai mundopi tiashca problemacunamandaca na culpata charin cashcata. Ashtahuangarin gentecuna Jehovapa guiata na catijushcamandami, cai problemacunaca mirashpa catijushca. Taita Dios ñucanchita ninanda juyashcata, ninanda llaquishcata ricushpami, ñucaca munailla, cushilla sintirircani (Salmo 103:​8-14).

Chai punllacunapillatami shuj cuponda tarircani. Chaica ¿Imatata Bibliaca Yachachin? nishca libromandami carca. Chaimi chai cuponda jundachishpaca correopi cacharcani. Chai jipallami, shuj Testigocuna visitamuhuarca y Bibliamanda yachachi callarihuarca. Chai jipallami, paicunapa tandanajuicunamanbash ri callarircani. Shinami Bibliapa yuyaigucunaca asha asha ñuca shunguman yaicurca.

Bibliamanda yachajushpami ñuca causaipica huaquin cambiocunata ruraparcani. Fumanatapash, yapata ufianatapash saquircani. Autoridadcunatapash respetanatapashmi yachajurcani (Romanos 13:1). Shinallata nali, mapa ruraicunata ruranatapashmi saquircani. Chaipimi ashtahuanbachaca cambiana carcani.

Cai organizaciongunata saquishpa cambianaca ñucapaca dificilmi caparca. Paicunata traicionajujtashnami sintijurcani. Shinapash Diospa Reinollami gentecunataca ciertopacha ayudai ushashcata cuenta japircani. Chaimi, Jehovamanda yachachingapaj, Diospa Reinota apoyangapaj, villachingapapash callarircani (Mateo 6:33).

Punda tiempopica gentecunata, animalcunata, shuj problemacunata difindingapaj munaimandami huaquin gentecunataca alicuna, nalicuna o contracunami can nishpa ricun carcani. Bibliata yachajushca horasmandami gentecunataca nalicachishpa ricunata saquishpa, juyanata yachajupashcani (Mateo 5:44). Diospa Reinomanda villachishpami, gentecunata juyashcataca ricuchipani. Diospa Reinomanda ali villaigucunami tranquilo, cushilla causachunbash gentecunataca ayudan. Gentecuna jipa punllacunapi ali causaigu tianapi crichunbashmi ayudan.

Ima problemacuna ricurijpipash Jehovapa maquipi saquinami tranquilo, ali cachunbash ayudahuashca. Tucuita Ruraj Taita Diosca gentecuna, animalcunapash sufrishpa catichunga na saquingachu. Cai alpa ashtahuan huaglishpa catichunbash na saquingachu. Chaitaca seguromi capani. Taita Diosca paipa Reinota apamushpami ñalla tucuilla llaquicunata tucuchinga (Isaías 11:1-9). Bibliamanda yuyaicunata yachajushcamandallaca na cushilla canichu, ashtahuangarin shujcuna Bibliapa yachachishcacunapi crichun ayudashcamandapashmi cushilla sintirini. Cai mundota cambiana yuyaihuanga ñana causajunichu.