Jehová Diospa testigonkunaqa lliu religionmanta runakunawanmi Diosmanta rimayku. Ichaqa manan jayk’aqpas paykunawan kuskaqa Diosta adoraykuchu. Bibliaq nisqan jina, cristianokunaqa juj nisqallan kananku. Chaymi noqaykuqa kallpachakuyku juj piensaylla kanaykupaq (Efesios 4:16; 1 Corintios 1:10; Filipenses 2:2). Lliu religionpas allinpaqmi qhawarin munakuyniyoq kayta, khuyapayakuyniyoq kayta, perdonaykukuq kaytapas. Noqaykupas allinpaqmi qhawariyku. Ichaqa manan chayllachu kanan. Llapa ima creesqanchispas Bibliaq nisqanman jinan kanan, chaymi noqaykuqa Bibliaq nisqanman jina imapipas creeyku, mana chayqa yanqachá iñiyniyku kanman (Romanos 10:2, 3).

 Juj cristiano waj creenciayoq runawan kuska Diosta adoranman chayqa, manan allinchu kanman. Mana iñiq runawanpas ‘yugoman watasqa kashanman’ jinan chayqa kanman (2 Corintios 6:14-17). Chaymantapas chayta ruwaspaqa pantashanmanmi chay cristianoqa, jinapitaq wajllipunman. Señorninchis Jesuspas manapunin munaranchu discipulonkuna waj creenciayoq runakunawan juñukuspa Diosta adoranankutaqa (Mateo 12:30; Juan 14:6). Chaymantapas Moisesman Dios kamachikuykunata qosqanpin israelitakunata prohibiran waj creenciayoq nacionkunawan juñukuspa payta adoranankuta (Éxodo 34:11-14). Chay kamachikuyta kasukuspan juj kutipipas israelitakunaqa mana aceptarankuchu juj nacionpa yanapayninta. Aceptankuman karan chayqa, chay runakunaq diosnintan paykunapas adorankuman karan (Esdras 4:1-3).

 Arí. Apóstol Pablo jinan noqaykupas lliu runakunaq imayna piensasqankuta imapi creesqankuta ima yachayta munayku (1 Corintios 9:19-22). Chaymantapas paykunawan rimaspaqa Bibliaq nisqanman jinan ‘ancha respetowan’ chayta ruwayku (1 Pedro 3:15). Respetaykun imapi creesqankutapas.